ଆପଣଙ୍କ ଚର୍ମ ପରି, ଆପଣଙ୍କ ଓଠରେ ମଧ୍ୟ ଆର୍ଦ୍ରତା ଆବଶ୍ୟକ ହୋଇଥାଏ । କାରଣ ଶୀତଦିନେ ଓଠ ଫାଟିବା ସହ କେତେକଙ୍କ ଓଠ ଫାଟି ରକ୍ତ ମଧ୍ୟ ବାହାରି ଥାଏ । ପ୍ରାୟତଃ ଶୀତ ଦିନରେ ଲୋକମାନେ ଓଠ ଫଟିବାକୁ ନେଇ ଚିନ୍ତାରେ ରୁହନ୍ତି । ଏହି ସମସ୍ୟାକୁ କେମିତି ମାତ୍ ଦେଇ ହେବ ସେନେଇ ମଧ୍ୟ ଉପାୟ ରହିଛି । ଏବଂ ଏହି ସମସ୍ୟା ନେଇ ଡାକ୍ତର ମାନେ କୁହନ୍ତି ଯେ, ଶରୀରରେ ଜଳ ଅଭାବ କାରଣରୁ ଏଭଳି ସମସ୍ୟା ଦେଖାଦେଇଥାଏ । ଶୀତ ଦିନ ଆସିବା ମାତ୍ରେ ଜଳର ବ୍ୟବହାର ମଧ୍ୟ କମିଯାଇଥାଏ । ଯେଉଁ କାରଣରୁ ଶୀତଦିନେ ଶୁଖିଲା ଚର୍ମ ଏବଂ ଶୁଖିଲା ଓଠର ସମସ୍ୟା ଦେଖାଯାଇଥାଏ ।

ଶୀତ ଦିନରେ ଓଠ ଫାଟିବା ଏକ ସାଧାରଣ ସମସ୍ୟା । ବହୁ ଲୋକ ଏହି ସମସ୍ୟାରୁ ରକ୍ଷା ପାଇବା ପାଇଁ ଲିପ୍ ବାମ ଓ ପେଟ୍ରୋଲିୟମ୍ ଜେଲି ଆଦି ବ୍ୟବହାର କରିଥାନ୍ତି । ଓଠ ଫାଟିବା ଦ୍ବାରା ବହୁ କଷ୍ଟ ମଧ୍ୟ ଅନୁଭୂତ ହୋଇଥାଏ । ଏହି ସମସ୍ୟାରୁ ରକ୍ଷା ପାଇବା ପାଇଁ ବଜାରରେ ବହୁ ସାମଗ୍ରୀ ଉପଲବ୍ଧ । ହେଲେ ଏହି ଉତ୍ପାଦ କେମିକାଲ ଯୁକ୍ତ ହୋଇଥିବାରୁ ସମସ୍ୟା ସୃଷ୍ଟି କରିପାରେ । ଏହିପରି କ୍ଷେତ୍ରରେ ଆପଣ ଘରୋଇ ଉପାୟରେ ଏହି ସମସ୍ୟାରୁ ଆରାମ ପାଇ ପାରିବେ ବୋଲି ବିଶେଷଜ୍ଞ କହିଛନ୍ତି ।

ଚିନି:

ଶୁଖିଲା ଓଠ ଉପରେ ବହୁ ମୃତ କୋଷିକାମାନେ ଜମା ବାନ୍ଧି ରହିଥାନ୍ତି । ଏହାକୁ ହଟାଇବା ପାଇଁ ସ୍କ୍ରବିଂ ଜରୁରୀ ଅଟେ । ଏଥିପାଇଁ ଏକ ଚାମୁଚ ଚିନି, ମହୁ ଓ ଅଲିଭ ତେଲ ଏବଂ ପେଟ୍ରୋଲିୟମ୍ ଜେଲି ନିଅନ୍ତୁ । ଏହି ସମସ୍ତ ସାମଗ୍ରୀକୁ ମିଶାଇ ଏକ ମିଶ୍ରଣ ପ୍ରସ୍ତୁତ କରନ୍ତୁ । ଏହାକୁ ଧୀରେ ଧୀରେ ଓଠରେ ମାଲିସ କରନ୍ତୁ । କିଛି ସମୟ ପରେ ସାମାନ୍ୟ ଉଷୁମ ପାଣିରେ ଧୋଇ ନେଇ ତୁରନ୍ତ ଲିପ୍ ବାମ୍ ଲଗାନ୍ତୁ । ଏପରି କରିବା ଦ୍ବାରା ଓଠ ଖୁବ ଶୀଘ୍ର ନରମ ହୋଇଯାଏ । ସପ୍ତାହକୁ 2ଥର ଏହାକୁ କରିଲେ ଭଲ ଫଳାଫଳ ମିଳିଥାଏ ।

ଗୋଲାପ ପାଖିୁଡ଼ା:

କିଛି ଗୋଲାପର ପାଖୁଡ଼ାକୁ କଞ୍ଚା କ୍ଷୀରରେ ବତୁରାଇ ଛାଡ଼ି ଦିଅନ୍ତୁ । ଏହାକୁ ପେଶି ଏକ ଚିକ୍କଣ ପେଷ୍ଟ ବନାଇ ଦିଅନ୍ତୁ । ଏହି ମିଶ୍ରଣକୁ ଆପଣ ଲିପ୍ ବାମ୍ ଭଳି ଲଗାଇପାରିବେ । ଏହି ମିଶ୍ରଣକୁ ଦୈନିକ 3ରୁ 4 ଥର ଓଠରେ ଲଗାଇଲେ, ଏହା ଓଠକୁ କୋମଳ ରଖିଥାଏ ।

ଲେମ୍ବୁ ରସ:

କିଛି ଲୋକଙ୍କ ଓଠ କଳା ପଡ଼ିଯାଏ । ସେମାନେ ଏକ ଚାମୁଚ ଲେମ୍ବୁ ରସରେ ମହୁକୁ ମିଶାଇ ଏହି ମିଶ୍ରଣକୁ ନିଜ ଓଠରେ ଲଗାଇ ଶୁଖିବାକୁ ଛାଡ଼ି ଦିଅନ୍ତୁ । ଏହା ପରେ ନିଜ ଓଠରେ ଏକ ପେଟ୍ରୋଲିୟମ୍ ଜେଲି ବା ବାମ୍ ଲଗାନ୍ତୁ । ଏପରି ବାରମ୍ବାର କରିବା ଦ୍ବାରା ଆପଣଙ୍କ ଓଠ ଶୁଖିବ ନାହିଁ ଏବଂ ରଙ୍ଗରେ ମଧ୍ୟ ପରିବର୍ତ୍ତନ ଦିଶିଥାଏ ।

ଡାଳିମ୍ବ ରସ:

ଏକ ଚାମଚ ମହୁ ଓ କିଛି ପରିମାଣର ଡାଳିମ୍ବ ରସକୁ ନେଇ ଭଲ ଭାବରେ ମିଶାଇ ନିଅନ୍ତୁ । ଏହି ମିଶ୍ରଣକୁ ନିଜ ଓଠରେ ଲଗାନ୍ତୁ । ଏପରି 15ରୁ 20 ମିନିଟ୍ ପର୍ଯ୍ୟନ୍ତ ଶୁଖିବାକୁ ଦିଅନ୍ତୁ । ଶୁଖିବା ପରେ ପାଣିରେ ଏହାକୁ ଧୋଇ ତୁରନ୍ତ ଲିପ୍ ବାମ୍ ଲଗାନ୍ତୁ । ଏପରି କରିବା ଦ୍ବାରା ଆପଣଙ୍କ ଓଠ ଲମ୍ବା ସମୟ ପର୍ଯ୍ୟନ୍ତ ଆର୍ଦ୍ର ରହିଥାଏ । ସେହିପରି ଏକ କାକୁଡ଼ିକୁ ଏହାର ଚୋପା ସହିତ ବାଟି ନିଅନ୍ତୁ । ଏହାର ରସକୁ ଓଠରେ ଲଗାନ୍ତୁ । 20 ମିନିଟ ପର୍ଯ୍ୟନ୍ତ ଶୁଖିବାକୁ ଛାଡନ୍ତୁ । ଏହାକୁ ଥଣ୍ଡା ପାଣିରେ ଧୋଇ ନିଅନ୍ତୁ ।

ଘିଅ କିମ୍ବା ନଡିଆ ତେଲ ବ୍ୟବହାର କରନ୍ତୁ:

ଖରାଦିନେ ମଧ୍ୟ ଓଠରେ ଘିଅ ଲଗାଇପାରିବେ । ଏହା ଓଠକୁ ପୁଷ୍ଟିକର କରିଥାଏ । ଶୀତଦିନେ, ଓଠକୁ ଶୁଷ୍କତା ଏବଂ ଫାଟିବାରୁ ରକ୍ଷା କରିବା ପାଇଁ ନିୟମିତ ନଡିଆ ତେଲ ଲଗାନ୍ତୁ । ଭିତରରୁ ଓଠକୁ ଉଜ୍ୱଳ ଓ ଆର୍ଦ୍ର କରିବା ପାଇଁ ନାଭିରେ ନଡିଆ ତେଲ ମଧ୍ୟ ଲଗାଇ ପରିବେ ।

ଅଧିକ ପଢ଼ନ୍ତୁ ଜୀବନ ଶୈଳୀ ଖବର: