Diwali Safety Tips / ବାଣ ଫୁଟାଇବାଠାରୁ ଦୀପ ଜାଳିବା ପର୍ଯ୍ୟନ୍ତ ମାନନ୍ତୁ ଏହି ସବୁ ସତର୍କତା ରହିବେ ସୁରକ୍ଷିତ

ଦୀପାବଳି ହେଉଛି ଆଲୋକ, ଖୁସି ଓ ଉତ୍ସାହର ପର୍ବ... ଏହି ପର୍ବକୁ ସମସ୍ତେ ପରିବାର ଓ ବନ୍ଧୁବାନ୍ଧବଙ୍କ ସହ ମିଶି ଆନନ୍ଦର ସହ ପାଳନ କରିବାକୁ ଭଲ ପାଆନ୍ତି । ଦୀପାବଳି ଅବସରରେ ବାଣ ଫୁଟାଇବା ମଧ୍ୟ ଏକ ପରମ୍ପରା ରହିଛି । କିନ୍ତୁ ବାଣ ଓ ଆତସବାଜି ଯୋଗୁଁ ଅନେକ ସମୟରେ ଲୋକମାନେ ଦୁର୍ଘଟଣାର ଶିକାର ହୋଇଥାନ୍ତି । ଏପରି ସ୍ଥିତିରେ ସତର୍କତା ଅବଲମ୍ବନ କରିବା ଅତ୍ୟନ୍ତ ଜରୁରୀ ।

AIIMS, ନୂଆଦିଲ୍ଲୀର ପ୍ଲାଷ୍ଟିକ୍, ରିକନକ୍ଟିଭ୍ ଆଣ୍ଡ ବର୍ନ୍ସ ସର୍ଜରୀ ବିଭାଗର ମୁଖ୍ୟ ପ୍ରଫେସର ଡାକ୍ତର ମନୀଷ ସିଂଘଲଙ୍କ ଅନୁସାରେ, ଦୀପାବଳିରେ କିଛି ସତର୍କତା ଅବଲମ୍ବନ କଲେ ପୋଡ଼ିଯିବା ଭଳି ଦୁର୍ଘଟଣାକୁ ଏଡ଼ାଇ ହେବ । ଏଥିପାଇଁ ଉପଯୁକ୍ତ ପୋଷାକ ପିନ୍ଧିବା ସହ ଆବଶ୍ୟକ ସୁରକ୍ଷା ସାମଗ୍ରୀ ପାଖରେ ରଖିବା ଜରୁରୀ ।

ଦୀପାବଳିରେ ପୋଡ଼ିଯିବାରୁ କିପରି ରହିବେ ସୁରକ୍ଷିତ ?
ଦୀପାବଳିରେ ପିଲାମାନଙ୍କୁ ବାଣ ଫୁଟାଇବାକୁ ବହୁତ ଭଲ ଲାଗିଥାଏ । କିନ୍ତୁ କେବେ ବି ପିଲାମାନଙ୍କୁ ଏକୁଟିଆ ବାଣ ଫୁଟାଇବାକୁ ଦିଅନ୍ତୁ ନାହିଁ । ସେମାନଙ୍କ ସହ ସବୁବେଳେ ଜଣେ ବଡ଼ ଲୋକ ରହିବା ଆବଶ୍ୟକ ।

କୌଣସି ବାଣକୁ ହାତରେ ଧରି ଜାଳିବାକୁ ଚେଷ୍ଟା କରନ୍ତୁ ନାହିଁ । ବିଶେଷକରି କିଛି ବୋମା ଆଦିକୁ ହାତରେ ଧରି ଜାଳିବା ବିପଜ୍ଜନକ । ଏପରି କରିବା ଦ୍ୱାରା ହାତରେ ଗୁରୁତର ଆଘାତ ଲାଗିପାରେ । ଏପରିକି ହାତ ଓ ଆଖିର ସ୍ଥାୟୀ କ୍ଷତି ହେବାର ଆଶଙ୍କା ରହିଛି ।

ପୋଟାସ୍ ଗନ୍‌ରେ ତିଆରି ବାଣଠାରୁ ଦୂରେଇ ରୁହନ୍ତୁ
ଆଜିକାଲି ପୋଟାସ୍ ଗନ୍‌ରେ ତିଆରି ବାଣ ଫୁଟାଇବାର ଏକ ନୂଆ ଚଳଣି ଦେଖିବାକୁ ମିଳୁଛି । ଡାକ୍ତରଙ୍କ ଅନୁସାରେ, ଏହି ପ୍ରକାର ବାଣ ଅତ୍ୟନ୍ତ ବିପଜ୍ଜନକ । ଏହା ଫୁଟାଇବା ଦ୍ୱାରା ଗୁରୁତର ଆଘାତ ଲାଗିପାରେ । ତେଣୁ ଏପରି ବାଣ ବ୍ୟବହାର ନକରିବା ସହ ଏଥିଠାରୁ ଦୂରେଇ ରହିବା ଉଚିତ।

କେଉଁଠି ଓ କିପରି ଫୁଟାଇବେ ବାଣ ?
- ସବୁବେଳେ ଖୋଲା ଓ ନିରାପଦ ସ୍ଥାନରେ ବାଣ ଫୁଟାନ୍ତୁ ।
- ପିଲାମାନେ ବାଣ ଫୁଟାଇବା ସମୟରେ ନିକଟରେ ଜଣେ ବୟସ୍କ ବ୍ୟକ୍ତି ରହିବା ଜରୁରୀ ।
- ବାଣ ଫୁଟାଉଥିବା ସ୍ଥାନରେ ପାଣି ଭର୍ତ୍ତି ବାଲ୍ଟି ନିଶ୍ଚିତ ଭାବେ ରଖନ୍ତୁ ।
- ଜଳୁଥିବା ବାଣ ପାଖକୁ ଯାଆନ୍ତୁ ନାହିଁ ।

ଦୀପ ଓ ମହମବତୀ ଜାଳିବା ସମୟରେ ରୁହନ୍ତୁ ସତର୍କ
ଦୀପାବଳି ହେଉଛି ଆଲୋକର ପର୍ବ । ଏହି ଦିନ ଘରକୁ ଦୀପ ଓ ମହମବତୀରେ ସଜାଇବାର ପରମ୍ପରା ରହିଛି । କିନ୍ତୁ ଏହାକୁ ଜାଳିବା ସମୟରେ ମଧ୍ୟ ସତର୍କ ରହିବା ଆବଶ୍ୟକ । ଘରର ମୁଖ୍ୟ ଦ୍ୱାର, ସିଡ଼ି କିମ୍ବା ତଳେ ଏପରି ସ୍ଥାନରେ ଦୀପ ଓ ମହମବତୀ ରଖନ୍ତୁ ନାହିଁ, ଯେଉଁଠାରେ ଢିଲା ପୋଷାକ ସହଜରେ ନିଆଁ ସଂସ୍ପର୍ଶରେ ଆସିପାରିବ । ଦୀପକୁ ସବୁବେଳେ ଏକ ସୁରକ୍ଷିତ ଓ ଖୋଲା ସ୍ଥାନରେ ରଖନ୍ତୁ । ପରଦା, ସୋଫା, କାଗଜ ଓ ଅନ୍ୟ ଜ୍ୱଳନଶୀଳ ସାମଗ୍ରୀ ପାଖରେ ଦୀପ କିମ୍ବା ମହମବତୀ ରଖନ୍ତୁ ନାହିଁ । ଏହାଦ୍ୱାରା ଘରେ ନିଆଁ ଲାଗିବାର ଆଶଙ୍କା ରହିଥାଏ ।

କେଉଁ କପଡ଼ା ପିନ୍ଧିବେ ?
ଦୀପାବଳିରେ ପୋଡ଼ିଯିବାରୁ ବର୍ତ୍ତିବା ପାଇଁ ସିନ୍ଥେଟିକ୍ କପଡ଼ା ପିନ୍ଧିବାଠାରୁ ଦୂରେଇ ରୁହନ୍ତୁ । ଏହା ବଦଳରେ ସୂତା କପଡ଼ା ବା କଟନ୍ ପୋଷାକ ପିନ୍ଧନ୍ତୁ । ବିଶେଷକରି ବାଣ ଫୁଟାଇବା ସମୟରେ ସିନ୍ଥେଟିକ୍ କପଡ଼ା ପିନ୍ଧନ୍ତୁ ନାହିଁ । ଏହା ନିଆଁ ସଂସ୍ପର୍ଶରେ ଆସିଲେ ଶରୀରରେ ଲାଗିଯାଇ ଗୁରୁତର କ୍ଷତି କରିପାରେ ।

ପୋଡ଼ିଗଲେ କ'ଣ କରିବେ?
ଯଦି କୌଣସି କାରଣରୁ ଶରୀରର କୌଣସି ଅଂଶ ପୋଡ଼ିଯାଏ, ତେବେ ଭୟଭୀତ ନହୋଇ ତୁରନ୍ତ ଠିକ୍ ପଦକ୍ଷେପ ନିଅନ୍ତୁ ।
- ପୋଡ଼ିଯାଇଥିବା ସ୍ଥାନକୁ ୧୫ରୁ ୨୦ ମିନିଟ୍ ପର୍ଯ୍ୟନ୍ତ ଥଣ୍ଡା ଚାଲୁ ପାଣିରେ ରଖନ୍ତୁ ।
- ଏହାଦ୍ୱାରା ଚର୍ମ ଭିତରେ ଥିବା ତାପ କମିଥାଏ ଏବଂ ପୋଡ଼ା କ୍ଷତିର ଗଭୀରତା ହ୍ରାସ ପାଇପାରେ ।
- ପୋଡ଼ିଥିବା ସ୍ଥାନରେ ପାଣି ବ୍ୟତୀତ ଅନ୍ୟ କୌଣସି ଜିନିଷ ଲଗାନ୍ତୁ ନାହିଁ । ଘିଅ, ତେଲ, ଟୁଥ୍‌ପେଷ୍ଟ କିମ୍ବା ଅନ୍ୟ ଘରୋଇ ଉପଚାର ବ୍ୟବହାର କରନ୍ତୁ ନାହିଁ ।
- ପାଣିରେ ଥଣ୍ଡା କରିବା ପରେ ପୋଡ଼ା ସ୍ଥାନକୁ ଏକ ସଫା, ନରମ ଓ ଲୋମମୁକ୍ତ କପଡ଼ା କିମ୍ବା ଷ୍ଟେରାଇଲ୍ ଡ୍ରେସିଂରେ ହାଲୁକା ଭାବେ ଢାଙ୍କନ୍ତୁ ।
- ବିଳମ୍ବ ନକରି ନିକଟସ୍ଥ ଡାକ୍ତର କିମ୍ବା ହସ୍ପିଟାଲର ଜରୁରୀକାଳୀନ ବିଭାଗକୁ ଯାଆନ୍ତୁ ।
ମୁହଁ, ଆଖି, ହାତ ପୋଡ଼ିଯାଇଥିଲେ, ଗଭୀର କ୍ଷତ ହୋଇଥିଲେ ତୁରନ୍ତ ଡାକ୍ତରୀ ସହାୟତା ନିଅନ୍ତୁ ।

ନିଜ ସ୍ୱାସ୍ଥ୍ୟର ମଧ୍ୟ ଯତ୍ନ ନିଅନ୍ତୁ
ଦୀପାବଳିରେ କେବଳ ବାଣ ଓ ନିଆଁଠାରୁ ସୁରକ୍ଷିତ ରହିବା ନୁହେଁ, ନିଜ ସାଧାରଣ ସ୍ୱାସ୍ଥ୍ୟର ଯତ୍ନ ନେବା ମଧ୍ୟ ଜରୁରୀ । ଡାକ୍ତରଙ୍କ ପରାମର୍ଶ ଅନୁସାରେ, ଯେଉଁମାନଙ୍କର ଡାଇବେଟିସ୍, ହୃଦ୍‌ରୋଗ, ଉଚ୍ଚ ରକ୍ତଚାପ କିମ୍ବା ଅନ୍ୟ କୌଣସି ସ୍ୱାସ୍ଥ୍ୟ ସମସ୍ୟା ରହିଛି, ସେମାନେ ମିଠା ଓ ତେଲରେ ଛଣା ଖାଦ୍ୟ ଖାଇବାରେ ସଂଯମ ରଖିବା ଉଚିତ । ତେଣୁ ଏହି ଦୀପାବଳିରେ ନିଜେ ସୁରକ୍ଷିତ ରହିବା ସହ ପରିବାର ଓ ପିଲାମାନଙ୍କ ସୁରକ୍ଷା ପ୍ରତି ମଧ୍ୟ ଧ୍ୟାନ ଦିଅନ୍ତୁ । ସତର୍କତା ଅବଲମ୍ବନ କରନ୍ତୁ ଏବଂ ଖୁସିର ସହ ଦୀପାବଳି ପାଳନ କରନ୍ତୁ ।