Plant Benefits / ଘରବାହାରେ ଲଗାଇଲେ ଏହି ୬ଟି ଗଛ ମିଳିବ ଅନେକ ଫାଇଦା

Key Points
ବଗିଚାରେ ଲଗାଇଲେ ଏହି ୬ଟି ଗଛ ମିଳିବ ଅନେକ ଫାଇଦା
ଅନେକ ସ୍ଥାନରେ ସାପଙ୍କ ଯାତାୟାତ ଲାଗି ରହିଥାଏ । ବିଶେଷକରି ଜଙ୍ଗଲ ନିକଟବର୍ତ୍ତୀ ଅଞ୍ଚଳ ଓ ଗ୍ରାମାଞ୍ଚଳରେ ଘର ଭିତରକୁ ସାପ ପଶିବାର ଆଶଙ୍କା ଅଧିକ ରହିଥାଏ । ତେଣୁ ଏଭଳି ଅଞ୍ଚଳରେ ରହୁଥିବା ଲୋକମାନେ ସାପଙ୍କଠାରୁ ସୁରକ୍ଷିତ ରହିବା ପାଇଁ ବିଭିନ୍ନ ଉପାୟ ଆପଣାଇଥାନ୍ତି ।
କେତେକ ଗଛକୁ ପ୍ରାକୃତିକ ସ୍ନେକ୍ ରିପେଲେଣ୍ଟ ବା ସାପ ଘଉଡ଼ାଇବା ଗଛ ବୋଲି କୁହାଯାଏ । ଏହି ଗଛଗୁଡ଼ିକୁ ଘର ବା ବଗିଚାରେ ଲଗାଇବାକୁ ନେଇ ଅନେକ ଲୋକଙ୍କ ମଧ୍ୟରେ ଧାରଣା ରହିଛି । ତେବେ ଜାଣନ୍ତୁ ଏପରି ୬ଟି ଗଛ ବିଷୟରେ ।
୧. ଗେଣ୍ଡୁ ଫୁଲ ଗଛ
ଗେଣ୍ଡୁ ଫୁଲ ଗଛକୁ ଅନେକେ ସାପ ଦୂରେଇ ରଖିବା ପାଇଁ ବଗିଚାରେ ଲଗାଇଥାନ୍ତି । ଏହି ଫୁଲର ଗନ୍ଧ ସାପଙ୍କୁ ଦୂରେଇ ରଖେ ବୋଲି ଲୋକମାନଙ୍କ ମଧ୍ୟରେ ବିଶ୍ୱାସ ରହିଛି । ଏହା ସହିତ ଗେଣ୍ଡୁ ଗଛ ଲଗାଇବା ମଧ୍ୟ ସହଜ ଏବଂ ଏହା ଘରର ସୌନ୍ଦର୍ଯ୍ୟ ବଢ଼ାଇଥାଏ ।
୨. ପିଆଜ ଓ ରସୁଣ ଗଛ
ପିଆଜ ଓ ରସୁଣର ଗନ୍ଧ ପାଇଁ ଏହାକୁ ସାପ ଦୂରେଇ ରଖୁଥିବା ଗଛ ମଧ୍ୟରେ ଗଣାଯାଏ । ଆପଣ ନିଜ ବାଡ଼ି ବଗିଚାରେ ଏହି ଗଛ ଲଗାଇପାରିବେ । ଏହାଦ୍ୱାରା ରୋଷେଇ ପାଇଁ ତାଜା ପିଆଜ ଓ ରସୁଣ ମଧ୍ୟ ମିଳିପାରିବ ।
୩. ସର୍ପଗନ୍ଧା ଗଛ
ସର୍ପଗନ୍ଧା ଏକ ବହୁବର୍ଷୀୟ ଔଷଧୀୟ ଗୁଳ୍ମ ଜାତୀୟ ଗଛ । ଏହାର ଔଷଧୀୟ ଗୁଣ ପାଇଁ ଏହା ବେଶ୍ ପରିଚିତ । ଲୋକକଥା ଅନୁସାରେ, ଏହି ଗଛର ଗନ୍ଧ ସାପଙ୍କୁ ଦୂରେଇ ରଖେ । ତେଣୁ କେତେକ ଲୋକ ଘର ବାହାରେ ସର୍ପଗନ୍ଧା ଗଛ ଲଗାଇଥାନ୍ତି ।
୪. ରୋଜମେରୀ ଗଛ
ରୋଜମେରୀ ଏକ ସୁଗନ୍ଧିତ ଔଷଧୀୟ ଗଛ । ଏହାର ପତ୍ରକୁ ଖାଦ୍ୟ ପ୍ରସ୍ତୁତିରେ ବ୍ୟବହାର କରାଯାଏ । କେଶର ଯତ୍ନ ପାଇଁ ମଧ୍ୟ ରୋଜମେରୀ ପତ୍ର ବ୍ୟବହାର ହୋଇଥାଏ । ଏହାର ସୁଗନ୍ଧ ସାପଙ୍କୁ ଦୂରେଇ ରଖେ ବୋଲି ଧାରଣା ରହିଛି । ତେଣୁ ଘର ବା ବଗିଚାରେ ଏହି ଗଛ ଲଗାଇପାରିବେ ।
୫. ଲାଭେଣ୍ଡର ଗଛ
ଲାଭେଣ୍ଡରର ସୁଗନ୍ଧ ମଣିଷଙ୍କୁ ଖୁବ୍ ଭଲ ଲାଗିଥାଏ । ଏହାକୁ ସୁଗନ୍ଧିତ ତେଲ ଓ ବିଭିନ୍ନ ସୌନ୍ଦର୍ଯ୍ୟ ସାମଗ୍ରୀ ପ୍ରସ୍ତୁତିରେ ମଧ୍ୟ ବ୍ୟବହାର କରାଯାଏ । ତେବେ ଏହାର ଗନ୍ଧ ସାପଙ୍କୁ ଭଲ ଲାଗେ ନାହିଁ ଏବଂ ସାପ ଏହି ଗଛଠାରୁ ଦୂରେଇ ରହନ୍ତି ବୋଲି କୁହାଯାଏ ।
୬. ପାନମଧୁରୀ ଗଛ
ସାପ ଦୂରେଇ ରଖୁଥିବା ଗଛ ମଧ୍ୟରେ ପାନମଧୁରୀ ଗଛର ନାମ ମଧ୍ୟ ରହିଛି । ଏହାର ମଞ୍ଜି ଖାଦ୍ୟ ଓ ମସଲା ଭାବେ ବ୍ୟବହାର ହୋଇଥାଏ । ଏହାକୁ ଘର ବଗିଚାରେ ଲଗାଇ ଉପଯୋଗ କରିପାରିବେ ।
ସାପଠାରୁ ସୁରକ୍ଷିତ ରହିବା ପାଇଁ ଜରୁରୀ ସତର୍କତା
ଉପରୋକ୍ତ ଗଛଗୁଡ଼ିକ ସାପଙ୍କୁ ନିଶ୍ଚିତ ଭାବେ ଦୂରେଇ ରଖନ୍ତି ବୋଲି କୌଣସି ଠୋସ୍ ବୈଜ୍ଞାନିକ ପ୍ରମାଣ ନାହିଁ । କେବଳ ଏହି ଗଛ ଲଗାଇ ସାପଙ୍କଠାରୁ ସୁରକ୍ଷା ମିଳିବ ବୋଲି ଭାବନ୍ତୁ ନାହିଁ । ଘର ଚାରିପାଖ ସଫା ରଖନ୍ତୁ, ଅଳିଆ ଓ କାଠ ଗଦା କରି ରଖନ୍ତୁ ନାହିଁ, ଘରର ଫାଙ୍କ ଓ ଗାତ ବନ୍ଦ କରନ୍ତୁ । ସାପ ଦେଖିଲେ ତାକୁ ଧରିବାକୁ କିମ୍ବା ମାରିବାକୁ ଚେଷ୍ଟା ନକରି ତୁରନ୍ତ ସ୍ଥାନୀୟ ସାପ ଉଦ୍ଧାରକାରୀଙ୍କ ସହାୟତା ନିଅନ୍ତୁ ।
📱 Get Argus News App
✨Related Topics
Explore more stories