ଅର୍ଗସ ବ୍ୟୁରୋ: 2026 ସୁଦ୍ଧା ଭାରତ ବିଶ୍ୱର ତୃତୀୟ ବୃହତ୍ତମ ଅର୍ଥନୀତିରେ ପରିଣତ ହେବ । ଏହି ଆକଳନ କରିଛନ୍ତି ନିତି ଆୟୋଗର ପୂର୍ବତନ ଉପାଧ୍ୟକ୍ଷ ଅରବିନ୍ଦ ପାନଗାରିୟା। ଆସନ୍ତା ୩ ବର୍ଷ ମଧ୍ୟରେ ଜର୍ମାନୀ କିମ୍ବା ଜାପାନ ଅର୍ଥନୀତିର ଆକାର ୫ ଟ୍ରିଲିଅନ ଡଲାର ଟପିବା ସମ୍ଭାବନା ନଥିବା ସେ କହିଛନ୍ତି ।

ଏହାସହ ପାନାଗାରିୟା କହିଛନ୍ତି ୨୦୨୬ରେ ଭାରତ ୫ ଟ୍ରିଲିଅନ ଡଲାର ଏବଂ ୨୦୨୭ରେ ୫.୫ ଟ୍ରିଲିଅନ ଡଲାର ଅର୍ଥନୀତିରେ ପହଞ୍ଚିବ । ଏହାର ଅର୍ଥ, ଆଶା କରାଯାଉଛି ଯେ 2026 ଶେଷ ସୁଦ୍ଧା ଭାରତ ବିଶ୍ୱର ତୃତୀୟ ଅର୍ଥନୀତିରେ ପରିଣତ ହେବ । ଅଷ୍ଟାଦଶ ସି ଡି ଦେଶମୁଖ ସ୍ମାରକୀ ବକ୍ତୃତା ଦେବା ଅବସରରେ ଏହା କହିଛନ୍ତି ପାନଗାରିୟା ।

ଅଗ୍ରଣୀ ଅର୍ଥନୀତିଜ୍ଞଙ୍କ ଅନୁଯାୟୀ, ଭାରତ ସଂସ୍କାର ଆରମ୍ଭ କରିବା ଆବଶ୍ୟକ ରହିଛି । ଯାହା ଶିଳ୍ପ ଏବଂ ସେବାରେ ଥିବା ଉଦ୍ୟୋଗଗୁଡିକୁ ବୃଦ୍ଧି କରିବାରେ ସାହାଯ୍ୟ କରିବ ଯାହା ନିଯୁକ୍ତି ସୁଯୋଗ ସୃଷ୍ଟି କରିବ । ଏହାଦ୍ୱାରା ଶ୍ରମିକମାନଙ୍କ ପାଇଁ ଗ୍ରାମାଞ୍ଚଳରୁ ସହରାଞ୍ଚଳକୁ ସ୍ଥାନାନ୍ତର ପାଇଁ ବାଟ ଖୋଲିବ ।

ତେବେ ନିକଟରେ ଆମେରିକା-ଇଣ୍ଡିଆ ଷ୍ଟ୍ରାଟେଜିକ୍ ପାର୍ଟନରସିପ୍ ଫୋରମର ଚେୟାରମ୍ୟାନ୍ ଜନ୍ ଚାମ୍ବରସ୍ ଏକ କାର୍ଯ୍ୟକ୍ରମରେ କହିଥିଲେ ଯେ ଭାରତ ବିଶ୍ୱର ଏକ ନମ୍ବର ଅର୍ଥନୀତି ହେବା ଦିଗରେ ଯାତ୍ରା କରୁଛି । ସେ ଏହା କହିବାର ଦିନକ ପରେ ଭାରତ ଅର୍ଥନୀତିକୁ ନେଇ ଏପରି ଆକଳନ କରିଛନ୍ତି ନିତି ଆୟୋଗର ପୂର୍ବତନ ଉପାଧ୍ୟକ୍ଷ ଅରବିନ୍ଦ ପାନଗାରିୟା ।

ଆହୁରି ପଢନ୍ତୁ ଭାରତ ଖବର...

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV