ଜେଡ୍-ମୋଡ୍ ଟନେଲର ଲୋକାର୍ପଣ କଲେ ପ୍ରଧାନମନ୍ତ୍ରୀ, ଏଣିକି ସବୁ ଋତୁରେ ଯାଇ ହେବ ଲଦାଖ

ଅର୍ଗସ ବ୍ୟୁରୋ: ଜମ୍ମୁ ଓ କାଶ୍ମୀରରେ ବଦଳୁଛି ଭିତ୍ତିଭୂମି । ସୁଦୃଢ଼ ହେଉଛି ଯୋଗାଯୋଗର ମାଧ୍ୟମ । ରଣନୀତିକ ଦୃଷ୍ଟିରୁ ବି ମିଳିବ ଲାଭ । ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାମ୍ମୁ ଓ କାଶ୍ମୀର ଗସ୍ତରେ ଯାଇ ଜେଡ୍ ମୋଡ୍ ଟନେଲର ଉଦ୍‌ଘାଟନ କରିଛନ୍ତି । ୬.୪ କିଲୋମିଟର ଲମ୍ବର ଏହି ଟନେଲ୍ ଗାନ୍ଦରବଲ ଜିଲ୍ଲାରେ ରହିଛି । ଯାହାକି ସବୁ ଋତୁରେ ଯାତାୟତ ଲାଗି ସହାୟକ ହେବ ।

ଶ୍ରୀନଗର-ଲେହ ହାଇୱେ ଏନଏଚ୍-୧ରେ ନିର୍ମିତ ଏହି ଡବଲ୍ ଲେନ୍ ଟନେଲ୍ ସୋନମର୍ଗକୁ ଯୋଡ଼ୁଛି । ପୂର୍ବରୁ ବରଫ ବର୍ଷା ପାଇଁ ଏହି ରାଜପଥ ୬ ମାସ ବନ୍ଦ ରହୁଥିଲା । ଏବେ ଟନେଲ୍ ଫଳରେ ବର୍ଷର ଯେ କୌଣସି ଋତୁ ଓ ଯେ କୌଣସି ସମୟରେ ଲୋକେ ଯାତାୟତ କରି ପାରିବେ ।

ପୂର୍ବରୁ ଶ୍ରୀନଗର-ଲେହ ରାଜପଥରେ ସୋନମର୍ଗ ପହଞ୍ଚିବା ଲାଗି ଘଣ୍ଟାଏ ସମୟ ଲାଗୁଥିଲା । ଏବେ ଏହି ଟନେଲ୍ ଯୋଗୁଁ ମାତ୍ର ୧୫ ମିନିଟ୍‌ରେ ପହଞ୍ଚି ହେବ । ଏହା ଛଡ଼ା ଗାଡ଼ିର ବେଗ ମଧ୍ୟ ବଢ଼ିବ । ଦୁର୍ଗମ ପାହାଡ଼ ଘେରା ଏହି ଅଞ୍ଚଳ ପାର ଲାଗି ପୂର୍ବରୁ ୩ରୁ ୪ ଘଣ୍ଟା ସମୟ ଲାଗୁଥିବା ବେଳେ ଏବେ ମାତ୍ର ୪୫ ମିନିଟ୍ ଲାଗିବ ।

ପର୍ଯ୍ୟଟନ ସହ ଦେଶର ସୁରକ୍ଷା ପାଇଁ ଏହି ଟନେଲ୍ ବେଶ୍ ମହତ୍ତ୍ଵପୂର୍ଣ୍ଣ । ଏହି ଟନେଲ୍ ଦେଇ ଲଦାଖ ପହଞ୍ଚିବା ବେଶ୍ ସହଜ ହୋଇଯିବ । ଅର୍ଥାତ୍ ବରଫ ବର୍ଷା ସମୟରେ ସେନାର ଏୟାରଫୋର୍ସ ବିମାନ ନେଇ ଯାଉଥିବା ସାମଗ୍ରୀ ଏବେ କମ୍ ଖର୍ଚ୍ଚରେ ସଡ଼କ ପଥରେ ପଠାଇ ହେବ । ଜେଡ୍ ମୋଡ୍ ଟନେଲ୍‌ ୨୭୦୦ କୋଟି ଟଙ୍କାରେ ନିର୍ମିତ ହୋଇଛି । ସମୁଦ୍ର ପୃଷ୍ଠରୁ ୮ ହଜାର ୬୫୦ ଫୁଟ୍ ଉପରେ ଏହି ଟନେଲ୍ ନିର୍ମାଣ ହୋଇଛି ।