ଅର୍ଗସ ବ୍ୟୁରୋ: ଦୁନିଆର ଅନ୍ୟତମ ଗରିବ ଦେଶ ହେଉଛି ଭେନେଜୁଏଲା । କିଛିବର୍ଷ ତଳେ ଭେନେଜୁଏଲାରେ ଦରଦାମ ଏତେ ବଢ଼ି ଯାଇଥିଲା ଯେ, ସେଠାକାର ଟଙ୍କାର ମୂଲ୍ୟ କାଗଜ ବରାବର ହୋଇ ଯାଇଥିଲା । କିନ୍ତୁ ସବୁ ପ୍ରକାର ଦୁଃସ୍ଥିତିକୁ ସାମ୍ନା କରି ସମ୍ବଳ ଅଭାବ ସତ୍ତ୍ଵେ ଗରିବ ରାଷ୍ଟ୍ର ଭେନେଜୁଏଲା ଏକ ବଡ଼ କାମ କରି ଉଦାହରଣ ସୃଷ୍ଟି କରି ପାରିଛି । ସେଠାରେ ହେଉଥିବା ସଡ଼କ ଦୁର୍ଘଟଣା ମୃତ୍ୟୁସଂଖ୍ୟା ୫୦ ପ୍ରତିଶତ ପର୍ଯ୍ୟନ୍ତ ହ୍ରାସ ପାଇଛି । ଆଉ ଯେଉଁଥିରେ ସରକାରଙ୍କ ସହ ନାଗରିକଙ୍କ ରହିଛି ବଡ଼ ଭୂମିକା ।

ଅନ୍ୟପଟେ ଭାରତ ଭଳି ବୃହତ୍ତ ରାଷ୍ଟ୍ରରେ ସମ୍ବଳର ଅଭାବ ନଥିବା ସତ୍ତ୍ଵେ ସଡ଼କ ଦୁର୍ଘଟଣା ମୃତ୍ୟୁ ସଂଖ୍ୟା ହ୍ରାସ ପାଉ ନାହିଁ । ଦେଶରେ ୨୦୨୪ ମସିହାରେ ସଡ଼କ ଦୁର୍ଘଟଣାରେ ୧ ଲକ୍ଷ ୮୦ ହଜାର ଜୀବନ ଯାଇଛି । ଯେତେବେଳେ କି ଦେଶରେ ୨୦୨୩ ମସିହାରେ ସଡ଼କ ଦୁର୍ଘଟଣାରେ ୧ ଲକ୍ଷ ୭୨ ହଜାର ଲୋକଙ୍କ ମୃତ୍ୟୁ ହୋଇଥିଲା ।

ଦେଶରେ ବଢ଼ୁଥିବା ସଡ଼କ ଦୁର୍ଘଟଣା ଓ ମୃତ୍ୟୁ ରୋକିବାକୁ ପ୍ରତିବର୍ଷ ସଡ଼କ ସୁରକ୍ଷା ମାସ ପାଳନ ହେଉଛି । ଏଥିସହ ଜାନୁଆରୀ ୧୧ରୁ ୧୭ ତାରିଖ ପର୍ଯ୍ୟନ୍ତ ପାଳନ ହେଉଛି ସଡ଼କ ସୁରକ୍ଷା ସପ୍ତାହ । ଚଳିତଥର ଏହାର ଥିମ୍ ରହିଛି 'ବି ଏ ରୋଡ୍ ସେଫଟି ହିରୋ' । ଯାହାର ମୁଖ୍ୟ ଉଦ୍ଦେଶ୍ୟ ଦେଶରେ ସଡ଼କ ଦୁର୍ଘଟଣା ସଂଖ୍ୟା କମାଇବା ।

ଏଥିପାଇଁ ସରକାର ଓ ପରିବହନ ବିଭାଗ ବିଭିନ୍ନ ଏନଜିଓ, ସ୍କୁଲ, କଲେଜ ଛାତ୍ରଛାତ୍ରୀଙ୍କ ସହ ମିଶି ଲୋକଙ୍କୁ ସଡ଼କ ସୁରକ୍ଷା ପ୍ରତି ସଚେତନ କରିଥାନ୍ତି । ପଥପ୍ରାନ୍ତ ନାଟକ ସହ ଅନ୍ୟ ମାଧ୍ୟମରେ ସଚେତନତା ସୃଷ୍ଟି କରାଯାଇଥାଏ ।

ସଡ଼କ ସୁରକ୍ଷାର ଆରମ୍ଭ ଛୋଟ ଛୋଟ ନିୟମ ପାଳନରୁ ହୋଇଥାଏ । ଯେମିତି କି ଟ୍ରାଫିକ୍ ସିଗନାଲ୍ ମାନିବା ଓ ଗାଡ଼ିର ବେଗ ଉପରେ ନିୟନ୍ତ୍ରଣ ରଖିବା । ବାଇକ୍ ଚାଳନା ବେଳେ ହେଲମେଟ୍ ଓ କାର୍ ଚଳାଇବା ବେଳେ ସିଟ୍ ବେଲ୍ଟ ପିନ୍ଧିବା ବେଶ୍ ଜରୁରି ।

ତେବେ ସଡ଼କ ଦୁର୍ଘଟଣାର ମୁଖ୍ୟ କାରଣ ହେଲା- ଦ୍ରୁତଗତିରେ ଗାଡ଼ି ଚାଳନା, ମଦ୍ୟପାନ କରି ଗାଡ଼ି ଚାଳନା, ଡ୍ରାଇଭିଂ ବେଳେ ମୋବାଇଲରେ କଥା ହେବା, ଓଭରଟେକିଂ, ଖରାପ ସଡ଼କ । ଆପଣଙ୍କ ଗାଡ଼ିର ବେଗ ଅଧିକ ଥିଲେ ହଠାତ୍ ଅଟକିବା ବେଳେ ଗାଡ଼ି ଉପରୁ ନିୟନ୍ତ୍ରଣ ହରାଇ ପାରନ୍ତି । ଏହା ଛଡ଼ା ନିୟମିତ ବ୍ୟବଧ୍ୟାନରେ ଗାଡ଼ିର ସର୍ଭିସିଂ ମଧ୍ୟ ଜରୁରି । ଯାହାକି ଗାଡ଼ିର କାର୍ଯ୍ୟକ୍ଷମତା ବଢ଼ାଇବା ସହ ସୁରକ୍ଷା ନିଶ୍ଚିତ କରେ ।

୨୦୨୪ ମସିହାରେ ଦେଶରେ ସଡ଼କ ଦୁର୍ଘଟଣାରେ ପ୍ରାୟ ୧୦ ହଜାର ଛୁଆଙ୍କ ମୃତ୍ୟୁ ହୋଇଛି । ତେଣୁ ବୟସ୍କଙ୍କ ସହ ଛୁଆଙ୍କୁ ମଧ୍ୟ ସଡ଼କ ସୁରକ୍ଷା ଦିଗରେ ସଚେତନ କରାଇବା ଆବଶ୍ୟକ ।

Argus News | argus news | Odisha Latest News, Breaking News, Trending News, Live TV