ଅର୍ଗସ ବ୍ୟୁରୋ : ଶିବା ସର୍କାର । ଜଣେ ସାଧାରଣ ଡେଲିଭରୀ ବୟ । ଜୋମାଟରୁ ଖାଦ୍ୟ ଲୋକଙ୍କ ପାଖକୁ ଡେଲିଭରୀ କରିଥାନ୍ତି । କିନ୍ତୁ ମନ ଭିତରେ ସାଇତି ରଖିଥାନ୍ତି ନିଜ ଛାତି ତଳର କୋହ, ଯନ୍ତ୍ରଣାକୁ । ଯାହାକୁ ଲୋକଙ୍କ ସାମ୍ନାକୁ ଆଣିଛନ୍ତି ହିମାଂଶୁ ବୋହରା । ଏମିତି ଏକ କାହାଣୀ ଯାହା କେବଳ ହିମାଂଶୁ ନୁହେଁ, ବରଂ ସେ କାହାଣୀକୁ ପଢିଥିବା ପ୍ରତ୍ୟେକଟି ପାଠକଙ୍କ ହୃଦୟକୁ ବିଚଳିତ କରିଛି । କାହାଣୀ ଲେଖିବାର ମୁଖ୍ୟ ଉଦ୍ଦେଶ୍ୟ ଥିଲା, ଶିବା ସର୍କାରଙ୍କ ଭଳି ଅନେକ ଡେଲିଭରୀ ବୟଙ୍କୁ କିପରି ସାହାଯ୍ୟ କରାଯାଇପାରିବ । ଦିଲ୍ଲୀର ଜଣେ ବ୍ୟକ୍ତି ହିମାଂଶୁ ବୋରା ଏପରି ଏକ କାହାଣୀ ଲିଙ୍କଡେନ ପ୍ରୋଫାଇଲରେ ଶେୟାର କରିଛନ୍ତି, ଯାହା ଅନେକଙ୍କୁ ପ୍ରଭାବିତ କରିଛି । କେବଳ ସେମିତି ନୁହେଁ ଏଥିପାଇଁ ସେ ଜୋମାଟୋ ସିଇଓ ଦିପିନ୍ଦର ଗୋୟଲଙ୍କୁ ଏକ ଅନୁରୋଧ ମଧ୍ୟ କରିଛନ୍ତି ।

କାହାଣୀ ଆରମ୍ଭରେ ସେ ଲେଖିଛନ୍ତି, ଦିନେ ରାତି ୩ଟାରେ ସେ ନିଜର ଅଫିସ କାମ ସାରିବା ପରେ ଜୋମାଟୋରୁ କିଛି ଖାଦ୍ୟ ଅର୍ଡର କରିଥିଲେ । କିଛି ସମୟ ପରେ ଜଣେ ଡେଲିଭରୀ ବୟ ଖାଦ୍ୟ ନେଇ ପହଞ୍ଚିଥିଲେ । ଆଉ ହିମାଂଶୁ ତାଙ୍କ ପାଖରୁ ଖାଦ୍ୟ ଆଣିବା ବେଳେ ସେ ତାଙ୍କୁ ଚାହିଁ ସ୍ମିତହାସ୍ୟ ଦେଇଥିଲେ । କିନ୍ତୁ ସେ ହସ ପଛରେ ଲୁଚିଥିଲା ଅନେକ ଯନ୍ତ୍ରଣା, ଅନେକ କାହାଣୀ । ଯେଉଁ କାହାଣୀକୁ ଶୁଣିବାକୁ ତାକୁ ଘର ଭିତରକୁ ଡାକିଥିଲେ ହିମାଂଶୁ । ଆଉ ସେତେବେଳେ ତାଙ୍କୁ ପାଣି ପିଇବାକୁ କହିଥିଲେ । ଏହାପରେ ଶିବା ଆରମ୍ଭ କରିଥିଲେ ନିଜର ସଂଘର୍ଷମୟ ଜୀବନର କାହାଣୀ । ଶିବାଙ୍କୁ ମାତ୍ର ୨୦ ରୁ ୨୧ ବର୍ଷ । ଯେଉଁ ବୟସରେ କଲେଜରେ ପାଠପଢି ସାଙ୍ଗସାଥୀଙ୍କ ମଉଜ ମସ୍ତି କରି ଜୀବନକୁ ଉପଭୋଗ କରିବା କଥା, ସେହି ବୟସରେ ପରିବାରର ଦାୟିତ୍ବକୁ ନିଜ ଉପରେ ସମ୍ପୁର୍ଣ୍ଣ ଭାବେ ଲଦି ନିଜ ସ୍ବପ୍ନକୁ ଜଳାଞ୍ଜଳି ଦେଇଛନ୍ତି । ବାପା ଚାଲିଯିବା ପରେ ଅଷ୍ଟମ ଶ୍ରେଣୀରୁ ପାଠରେ ଡୋରୀ ବାନ୍ଧିଥିଲେ । ପରିବାରର ଭରଣ ପୋଷଣ ତଥା ବଡ ଭଉଣୀକୁ ବାହା କରେଇବା ପାଇଁ ଏମିତି ଏକ ରୋଜଗାରର ପନ୍ଥା ବାଛିଥିଲେ ଶିବା ।

ଧିରେଧିରେ ତାଙ୍କର ସବୁ ସ୍ବପ୍ନ ଆଖିରେ ମିଳେଇ ଯାଇଥିଲା । କେବଳ ଗୋଟିଏ ଆଶା ପରିବାରକୁ କିପରି ସମ୍ଭାଳିବେ । ମନରେ ହଜାରେ ଇଚ୍ଛା ଥିଲେ ବି ପରିବାରର ବୋଝ ତାଙ୍କୁ ବାଧ୍ୟ କରିଥିଲା ଏମିତି ରୋଜଗାର କରିବାକୁ । କେବଳ ଶିବା ନୁହନ୍ତି, ଶିବାଙ୍କ ଭଳି ଏମିତି ଅନେକ ଯୁବକ ଯୁବତୀ ଅଛନ୍ତି, ଯିଏ ନିଜ ସ୍ବପ୍ନକୁ ଧୂଳିସାତ୍ କରିଦେଇଛନ୍ତି ପରିବାରର ଚାପରେ । ସେମାନଙ୍କ ପାଇଁ କିଛି ସାହାଯ୍ୟ କରିବାକୁ ଲେଖିଛନ୍ତି ହିମାଂଶୁ । ସେ ଏହାକୁ ନେଇ ଜୋମାଟୋର ସିଇଓଙ୍କୁ ଲେଖିଛନ୍ତି, ଯଦି ଜୋମାଟୋ ଦ୍ବାରା କିଛି ସ୍କଲାରସିପ , କିଛି ଲୋନ୍‌ର ବ୍ୟବସ୍ଥା କରାଯାଇ ପାରନ୍ତା, ତେବେ ଶିବାଙ୍କ ଭଳି ଜୋମାଟୋରେ କାମ କରୁଥିବା ଆଉ କିଛି ଡେଲିଭରୀ ବୟଙ୍କ ସ୍ବପ୍ନ କିଛି ପରିମାଣରେ ପୂରଣ ହୋଇପାରନ୍ତା । ଏହି ପୋଷ୍ଟରେ ଜୋମାଟୋର ଅଫିସିଆଳ ଆକାଉଣ୍ଟ ପକ୍ଷରୁ ଉତ୍ତର ମଧ୍ୟ ରଖାଯାଇଛି । ସେ କହିଛନ୍ତି, "ଏମିତି ଏକ କାହାଣୀକୁ ଆମ ସାମ୍ନାକୁ ଆଣିଥିବାରୁ ଆପଣଙ୍କୁ ଧନ୍ୟବାଦ । ଆମେ ଆମର କର୍ମାଚାରୀ ମାନଙ୍କ ପାଇଁ ସତରେ ଗର୍ବିତ ।" ଏଥିସହ ସେହି ଡେଲିଭରୀ ପାର୍ଟନରଙ୍କ ଅର୍ଡର ଆଇଡି ମଧ୍ୟ ତାଙ୍କୁ ଧନ୍ୟବାଦ ଦେବାପାଇଁ ମାଗିଛନ୍ତି ।

Argus News | argus news | -Argusnews Home: Odisha Latest News, Breaking News, Trending News, Live TV and more