ଅର୍ଗସ ବ୍ୟୁରୋ: ପୋଙ୍ଗଲ ଅବସରରେ ପାରମ୍ପରିକ ଭାବେ ଆୟୋଜିତ ହେଉଥିବା ଜଲ୍ଲିକଟ୍ଟୁ ପ୍ରତିଯୋଗିତାରେ ଅଘଟଣ । ତାମିଲନାଡ଼ୁର ମଦୁରାଇରେ ଆୟୋଜିତ ପ୍ରତିଯୋଗିତାରେ ଜଣଙ୍କ ଜୀବନ ଯାଇଥିବା ବେଳେ ୭୫ ଜଣ ଆହତ ହୋଇଛନ୍ତି ।

ମୃତକ ୨୨ ବର୍ଷୀୟ ବି ନବୀନ କୁମାର ବୋଲି ଜଣାପଡ଼ିଛି । ଫସଲ ଅମଳ ଅବସରରେ ପୋଙ୍ଗଲ ପର୍ବ ପାଳିତ ହୁଏ । ମଙ୍ଗଳବାର ମଦୁରାଇରେ ପୋଙ୍ଗଲ ଅବସରରେ ଜଲ୍ଲିକଟ୍ଟୁ ପ୍ରତିଯୋଗିତା ଆରମ୍ଭ ହୋଇଥିଲା । ୩ ଦିନ ଧରି ଚାଲିବାକୁ ଥିବା ଷଣ୍ଢ ଲଢ଼େଇ ପ୍ରତିଯୋଗିତାର ପ୍ରଥମ ଦିନରେ ଅଘଟଣ ଘଟିଛି । ଲଢ଼େଇ ଚାଲିଥିବା ବେଳେ ଜଣଙ୍କ ଜୀବନ ଯାଇଛି ।

ଚଳିତ ବର୍ଷ ମଦୁରାଇରେ ଆୟୋଜିତ ଜଲ୍ଲିକଟ୍ଟୁ ପ୍ରତିଯୋଗିତାରେ ପ୍ରାୟ ୧୧୦୦ ଷଣ୍ଢ ଭାଗ ନେଇଛନ୍ତି । ଷଣ୍ଢଙ୍କୁ ନିୟନ୍ତ୍ରଣ କରିବା ଲାଗି ୯୦୦ ଟେମର୍ସ ସାମିଲ୍ ହୋଇଛନ୍ତି । ମୃତ୍ୟୁ ଘଟିଥିବା ବି ନବୀନ କୁମାର ଷଣ୍ଢଙ୍କୁ କାବୁ କରିବା ଲାଗି ଉଦ୍ୟମ କରୁଥିଲେ ।

ମଦୁରାଇ ଜିଲ୍ଲାପାଳ ସଙ୍ଗୀତାଙ୍କ ଅନୁସାରେ, ଚିକିତ୍ସାଧୀନ ଅବସ୍ଥାରେ ବି ନବୀନଙ୍କ ମୃତ୍ୟୁ ହୋଇଛି । ପ୍ରାୟ ୭୫ ଜଣ ଆହତ ହୋଇଥିବା ବେଳେ ଚିକିତ୍ସା ପରେ ଘରକୁ ଫେରିଛନ୍ତି । ଆହତଙ୍କ ମଧ୍ୟରୁ ୨୫ ଜଣଙ୍କ ଠାରେ ଷ୍ଟିଚ୍ ପଡ଼ିଛି । ସମସ୍ତଙ୍କ ସ୍ଵାସ୍ଥ୍ୟାବସ୍ଥା ସ୍ଥିର ରହିଥିବା ଜିଲ୍ଲାପାଳ ସୂଚନା ଦେଇଛନ୍ତି ।

ଜଲ୍ଲିକଟ୍ଟୁରେ ଶ୍ରେଷ୍ଠ ଷଣ୍ଢ ମାଲିକଙ୍କୁ ୧୧ ଲକ୍ଷ ଟଙ୍କା ମୂଲ୍ୟର ଟ୍ରାକ୍ଟର ପ୍ରଦାନ କରାଯାଉଥିବାବେଳେ ଶ୍ରେଷ୍ଠ ଷଣ୍ଢ-ଟେମରଙ୍କୁ ଅନ୍ୟ ପୁରସ୍କାର ସହିତ ୮ ଲକ୍ଷ ମୂଲ୍ୟର କାର ମିଳିବ ।

Argus News | argus news | Odisha Latest News, Breaking News, Trending News, Live TV