ଅର୍ଗସ ବ୍ୟୁରୋ: ପ୍ରାଣ ନେଇଗଲା ପରିବାର ପୋଷୁଥିବା ପରିବା । ପ୍ରତ୍ୟୁଷରେ ଚାଲିଗଲା ୧୧ ଜଣଙ୍କ ଜୀବନ । ଯେଉଁ ପରିବା ୫ ପ୍ରାଣୀର କୁଟୁମ୍ବ ପୋଷୁଥିଲା, ଆଜି ବେସାହାରା କରି ଦେଲା । ପରିବା ନେଇ ବଜାରକୁ ବିକ୍ରି ଲାଗି ଯାଉଥିବା ବେଳେ ଦୁର୍ଘଟଣାରେ ୧୧ ଜଣଙ୍କ ମୃତ୍ୟୁ ହୋଇଛି । ଦୁର୍ଘଟଣାରେ ୧୫ ଜଣ ଗୁରୁତର ଆହତ ହୋଇଛନ୍ତି ।

ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି, କର୍ଣ୍ଣାଟକର ଉତ୍ତର କନ୍ନଡ଼ ଜିଲ୍ଲାରେ । ବୁଧବାର ଭୋର୍ ସମୟରେ ୟେଲ୍ଲାପୁରାରରେ ଏକ ଟ୍ରକ୍‌ ଘାଟିରୁ ୫୦ ଫୁଟ୍ ତଳକୁ ଖସିବାରୁ ୧୧ ଚାଷୀଙ୍କ ମୃତ୍ୟୁ ହୋଇଛି । ସ୍ଥାନୀୟ ପୋଲିସ ଅନୁସାରେ, ଚାଷୀମାନେ ଫଳ ଓ ପରିବା ନେଇ ଏକ ଟ୍ରକ୍‌ରେ ଯାଉଥିଲେ । ଉକ୍ତ ଟ୍ରକ୍‌ରେ ପ୍ରାୟ ୨୫ ଜଣ ଥିଲେ ।

ସକାଳ ପ୍ରାୟ ୫ଟା ସମୟରେ ସାବନୁର-ହୁବଳି ରାଜପଥରେ ଟ୍ରକ୍ ଚାଳକ ଆଉ ଏକ ଗାଡ଼ି ରାସ୍ତା ଦେବାକୁ ଯାଇ ଗାଡ଼ି ଉପରୁ ନିୟନ୍ତ୍ରଣ ହରାଇଥିଲେ । ଫଳରେ ଟ୍ରକ୍‌ଟି ଘାଟି ତଳକୁ ଖସି ପଡ଼ିଥିଲା । ଘଟଣାସ୍ଥଳରେ ୧୧ ଜଣଙ୍କ ମୃତ୍ୟୁ ହୋଇଥିବା ବେଳେ ୧୫ ଜଣଙ୍କୁ ମେଡିକାଲ୍‌ରେ ଭର୍ତ୍ତି କରାଯାଇଛି । ତେବେ ଦୁର୍ଘଟଣା ଘଟିଥିବା ସ୍ଥାନରେ କୌଣସି ସୁରକ୍ଷା ପ୍ରାଚୀର ନଥିବା ଜଣାପଡ଼ିଛି ।

ଦୁର୍ଘଟଣା ପରେ ଉଦ୍ଧାର ଲାଗି କ୍ରେନ୍ ନିୟୋଜନ କରାଯାଇଥିଲା । କ୍ରେନ୍ ଦ୍ଵାରା ଆହତଙ୍କ ସହ ମୃତକଙ୍କ ଶବକୁ ଉପରକୁ ଅଣାଯାଇଥିଲା ବୋଲି ପୋଲିସ ପକ୍ଷରୁ କୁହାଯାଇଛି ।

Argus News | argus news | Odisha Latest News, Breaking News, Trending News, Live TV