ମୁର୍ସିଦାବାଦ ହିଂସା ଘଟଣାରେ ୧୧୮ ଅଭିଯୁକ୍ତ ଗିରଫ
Key Points
ୱାକଫ ଆଇନକୁ ନେଇ ପଶ୍ଚିମବଙ୍ଗରେ ହିଂସା
ମୁର୍ସିଦାବାଦ ହିଂସା ଘଟଣାରେ ୧୧୮ ଅଭିଯୁକ୍ତ ଗିରଫ
`ହିଂସା ପଛରେ ରୋହିଙ୍ଗ୍ୟା ଓ ବାଂଲାଦେଶୀଙ୍କ ହାତ'
ମୁର୍ସିଦାବାଦ ହିଂସାକୁ ନେଇ ଦିଦି ଖୋଲିଲେ ମୁହଁ
ମମତାଙ୍କ ଉପରେ ଦୋଷ ଲଦିଲେ କେନ୍ଦ୍ରମନ୍ତ୍ରୀ ସୁକାନ୍ତ ମଜୁମଦାର
ହିଂସା ନିଆଁରେ ଜଳୁଛି ଦିଦିଙ୍କ ଗଡ଼ । ପଶ୍ଚିମବଙ୍ଗରେ ୱାକଫ ଆଇନ ଲାଗୁ ହେବନି ବୋଲି ଗତ ୧୦ ତାରିଖରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଘୋଷଣା ପରେ ବି ମୁର୍ସିଦାବାଦରେ ଘଟିଛି ବ୍ୟାପକ ହିଂସାକାଣ୍ଡ । ରାଜ୍ୟ ସରକାର ତୁରନ୍ତ ଦଙ୍ଗାକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପରିବର୍ତ୍ତେ ୱାକଫ ଆଇନକୁ ନେଇ କେନ୍ଦ୍ରକୁ ଜବାବ ମାଗିବାକୁ କହି ହଂସା ବଢ଼ାଇଥିବା ଅଭିଯୋଗ କରିଛନ୍ତି ପଶ୍ଚିମବଙ୍ଗ ବିଜେପି ସଭାପତି ତଥା କେନ୍ଦ୍ରମନ୍ତ୍ରୀ ସୁକାନ୍ତ ମଜୁମଦାର । ହିନ୍ଦୁଙ୍କୁ ଭୟଭୀତ କରି ମମତା ସରକାର ପଶ୍ଚିମବଙ୍ଗକୁ ଦ୍ବିତୀୟ ବାଂଲାଦେଶ ବନାଇବାକୁ ଷଡ଼ଯନ୍ତ୍ର କରୁଥିବା ସେ ଅଭିଯୋଗ କରିଛନ୍ତି । ୨ ଦିନ ଧରି ଦଙ୍ଗାକାରୀ ରେଳ ମନ୍ତ୍ରାଳୟର ବ୍ୟାପକ ସମ୍ପତ୍ତି ନଷ୍ଟ କରିଥିବାରୁ ରେଳମନ୍ତ୍ରୀଙ୍କୁ ଚିଠି ଲେଖି କାର୍ଯ୍ୟାନୁଷ୍ଠାନ ଦାବି କରିଛନ୍ତି ପଶ୍ଚିମବଙ୍ଗରେ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ।
ଏପଟେ ମୁର୍ସିଦାବାଦ ହିଂସାକାଣ୍ଡର ଗୋଟିଏ ପରେ ଗୋଟିଏ ଭୟଙ୍କର ଦୃଶ୍ୟ ସାମ୍ନାକୁ ଆସୁଛି । ଲୋକଙ୍କ ଘର, ବିଭିନ୍ନ ଅନୁଷ୍ଠାନ ସହ ସରକାରୀ କାର୍ଯ୍ୟାଳୟରେ ନିଆଁ ଲଗାଇଥିଲେ ଦଙ୍ଗାକାରୀ । ଦଙ୍ଗାକାରୀଙ୍କ ମଧ୍ୟରେ ବହୁସଂଖ୍ୟାରେ ରୋହିଙ୍ଗ୍ୟା ଓ ବାଂଲାଦେଶୀ ସାମିଲ ହୋଇ ହିନ୍ଦୁ ସଂପ୍ରଦାୟ ଉପରେ ଆକ୍ରମଣ କରିଥିବା ଅଭିଯୋଗ କରିଛନ୍ତି ବରିଷ୍ଠ ବିଜେପି ନେତା ଦିଲ୍ଲୀପ ଘୋଷ । ବର୍ତ୍ତମାନ ସୁଦ୍ଧା ହିଂସା ଘଟଣାରେ ୧୧୮ ଜଣଙ୍କୁ ଗିରଫ କରାଯାଇଥିବା କହିଛନ୍ତି ପଶ୍ଚିମବଙ୍ଗ ଡିଜିପି ରାଜୀବ କୁମାର ।
ରାଷ୍ଟ୍ରପତିଙ୍କ ଅନୁମୋଦନ ପରେ ଗୃହ ମନ୍ତ୍ରଣାଳୟ ପକ୍ଷରୁ ଗତ ୮ ତାରିଖରେ ଜାରି ହୋଇଥିଲା ୱାକଫ ବିଜ୍ଞପ୍ତି । ସଂସଦରେ ଦୀର୍ଘ ଚର୍ଚ୍ଚା ପରେ ବିଲ୍ ପାସ୍ ହୋଇଥିଲେ ବି ୱାକଫ ଆଇନ ସପକ୍ଷରେ ଓ ବିପକ୍ଷରେ ଦେଶର ବିଭିନ୍ନ ରାଜ୍ୟ ହାଇକୋର୍ଟ ସହ ସୁପ୍ରିମକୋର୍ଟରେ ଦାୟର ହୋଇଛି ପିଟିସନ । ଆସନ୍ତା ୧୬ ତାରିଖରେ ସୁପ୍ରିମକୋର୍ଟ ୱାକଫ ଆଇନକୁ ନେଇ ଶୁଣାଣି କରିବା ସମ୍ଭାବନା ରହିଛି । ଅପର ପକ୍ଷରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟରେ ୱାକଫ ଆଇନ ଲାଗୁ ହେବନାହିଁ ବୋଲି ପ୍ରତିଶ୍ରୁତି ପରେ ବି ମୁର୍ସିଦାବାଦ ସମେତ ରାଜ୍ୟର ବିଭିନ୍ନ ସ୍ଥାନରେ ହିଂସା ଘଟଣା ପଛରେ ଦେଶ ବିରୋଧୀ ଗୋଷ୍ଠୀର ହାତ ଥିବା ସନ୍ଦେହ କରିଛି ବିଜେପି । ରେଳ କାର୍ଯ୍ୟାଳୟ ଓ ରେଲ ଧାରଣାରେ ଭଙ୍ଗାରୁଜା ଘଟଣାରେ NIA ଦ୍ବାରା ତଦନ୍ତ କରିବାକୁ କେନ୍ଦ୍ର ସରକାରଙ୍କୁ ଅନୁରୋଧ କରିଛି ରାଜ୍ୟ ବିଜେପି ।
