Murder Case / ମା’ ଓ ପ୍ରେମିକଙ୍କୁ ଆପତ୍ତିଜନକ ଅବସ୍ଥାରେ ଦେଖିବାରୁ ୧୪ ବର୍ଷୀୟ ପୁଅକୁ ହତ୍ୟା !

ଉତ୍ତରପ୍ରଦେଶର କାନପୁର ଜିଲ୍ଲା ମହାରାଜପୁର ଥାନା ଅଞ୍ଚଳରୁ ଏକ ଅତ୍ୟନ୍ତ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି । ନିଜ ମା’ ଓ ପଡ଼ୋଶୀ ଯୁବକଙ୍କୁ ଆପତ୍ତିଜନକ ଅବସ୍ଥାରେ ଦେଖିବା ପରେ ବିରୋଧ କରିବାରୁ ୧୪ ବର୍ଷୀୟ ଜଣେ ନାବାଳକଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି । ଅଭିଯୋଗ ଅନୁସାରେ, ନାବାଳକଙ୍କ ମା’ ତାଙ୍କ ପ୍ରେମିକଙ୍କ ସହ ମିଶି ପୁଅର ଗଳା ଚିପି ହତ୍ୟା କରିଥିଲେ ।

ଘଟଣା ପରେ ଅଭିଯୁକ୍ତ ମହିଳା ସାରା ରାତି ପୁଅର ମୃତଦେହ ନିକଟରେ ବସି ରହିଥିବା ଅଭିଯୋଗ ହୋଇଛି । ଶୁକ୍ରବାର ସକାଳେ ସେ ପୁଅର ହଠାତ୍ ଅସୁସ୍ଥତା ଯୋଗୁଁ ମୃତ୍ୟୁ ହୋଇଥିବା ନେଇ ପଡ଼ୋଶୀ ଓ ଗ୍ରାମବାସୀଙ୍କୁ କହିଥିଲେ । ତେବେ ଗାଁରେ ମହିଳାଙ୍କ ପ୍ରେମ ସମ୍ପର୍କ ଓ ହତ୍ୟାକୁ ନେଇ ଚର୍ଚ୍ଚା ଜୋର ଧରିଥିଲା । ଘଟଣାକୁ ନେଇ ସନ୍ଦେହ ବଢ଼ିବାରୁ ଗ୍ରାମବାସୀ ପୋଲିସ କଣ୍ଟ୍ରୋଲ୍ ରୁମକୁ ଖବର ଦେଇଥିଲେ ।

ମୃତଦେହରେ ମିଳିଲା ସନ୍ଦେହଜନକ ଚିହ୍ନ
ସୂଚନା ପାଇ ମହାରାଜପୁର ଥାନା ପୋଲିସ ଓ ଫୋରେନସିକ୍ ଟିମ୍ ଘଟଣାସ୍ଥଳରେ ପହଞ୍ଚିଥିଲେ । ଯାଞ୍ଚ ସମୟରେ ନାବାଳକଙ୍କ ବେକ ଓ ଶରୀରରେ କିଛି ସନ୍ଦେହଜନକ ଆଘାତ ଚିହ୍ନ ଦେଖିବାକୁ ମିଳିଥିଲା । ଏହାପରେ ଏହା ସ୍ୱାଭାବିକ ମୃତ୍ୟୁ ନୁହେଁ ବୋଲି ପୋଲିସର ସନ୍ଦେହ ହୋଇଥିଲା । ପୋଲିସ ମୃତଦେହକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଥିଲା ।

ପୋଷ୍ଟମର୍ଟମରେ ଗଳା ଚିପି ହତ୍ୟା ନେଇ ସ୍ପଷ୍ଟତା
ପୋଷ୍ଟମର୍ଟମ ରିପୋର୍ଟ ଆସିବା ପରେ ନାବାଳକଙ୍କ ମୃତ୍ୟୁ ସମ୍ପର୍କରେ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଥିଲା । ରିପୋର୍ଟ ଅନୁସାରେ, କୌଣସି ରୋଗ ଯୋଗୁଁ ନୁହେଁ, ବରଂ ଗଳା ଚିପିବା କାରଣରୁ ତାଙ୍କ ମୃତ୍ୟୁ ହୋଇଥିଲା । ମୃତ ନାବାଳକଙ୍କ ବାପା ମୁମ୍ବାଇରେ ଶଟରିଂ କାମ କରନ୍ତି ଏବଂ ସେଠାରୁ ପରିବାରର ଖର୍ଚ୍ଚ ଚଳାନ୍ତି । ଘରେ ତାଙ୍କ ପତ୍ନୀ ଓ ତିନି ପୁଅ ରହୁଥିଲେ । ଗ୍ରାମବାସୀଙ୍କ କହିବା ଅନୁସାରେ, ମହିଳାଙ୍କର ପଡ଼ୋଶର ଜଣେ ଯୁବକଙ୍କ ସହ ଦୀର୍ଘଦିନ ଧରି ପ୍ରେମ ସମ୍ପର୍କ ଥିଲା । ଗୁରୁବାର ରାତିରେ ନାବାଳକ ଦୁହିଁଙ୍କୁ ଏକାଠି ଦେଖିଥିବା ପରେ ଘଟଣା ଘଟିଥିବା ଅଭିଯୋଗ ହୋଇଛି ।

ଗିରଫ ଭୟରେ ପ୍ରେମିକଙ୍କ ଆତ୍ମହତ୍ୟା ଉଦ୍ୟମ
ଏପଟେ ଗାଁରେ ହତ୍ୟା ଘଟଣାକୁ ନେଇ ଚର୍ଚ୍ଚା ବଢ଼ିବା ସହ ପୋଲିସର ତଦନ୍ତ ଜୋରଦାର ହୋଇଥିଲା । ଏହାପରେ ଅଭିଯୁକ୍ତ ପ୍ରେମିକ ଗିରଫ ହେବା ଭୟରେ ନିଜ ଘରେ ଫାଶୀ ଲଗାଇ ଆତ୍ମହତ୍ୟା କରିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି । ତେବେ ଠିକ୍ ସମୟରେ ପରିବାର ଲୋକ ଓ ପଡ଼ୋଶୀଙ୍କ ନଜର ପଡ଼ିଯିବାରୁ ସେମାନେ ଚିତ୍କାର କରି ଯୁବକଙ୍କୁ ଫାଶୀରୁ ତଳକୁ ଓହ୍ଲାଇଥିଲେ । ଏହାପରେ ସୁଯୋଗ ପାଇ ଅଭିଯୁକ୍ତ ଯୁବକ ଗାଁରୁ ଫେରାର ହୋଇଯାଇଥିବା ଜଣାପଡ଼ିଛି ।

ପୋଲିସ ସୂଚନା ଅନୁସାରେ, ହତ୍ୟା ମାମଲାରେ ଆଇନ ଅନୁଯାୟୀ ମାମଲା ରୁଜୁ ହୋଇଛି । ଅଭିଯୁକ୍ତ ମା’ଙ୍କୁ ପଚରାଉଚରା କରାଯାଉଛି । ଏଥିସହ ଫେରାର ପ୍ରେମିକଙ୍କୁ ଧରିବା ପାଇଁ ପୋଲିସର ବିଭିନ୍ନ ଟିମ୍ ଚଢ଼ାଉ ଜାରି ରଖିଛନ୍ତି । ଘଟଣାର ସମସ୍ତ ପାର୍ଶ୍ୱକୁ ନେଇ ପୋଲିସ ତଦନ୍ତ ଜାରି ରହିଛି ।