ଆକାଶ ଛୁଇଁଲା ସୁନା ଦର । ପ୍ରଥମ କରି ୨୨କ୍ୟାରେଟ୍ ଗୋଲ୍ଡ ରେଟ୍ ଗ୍ରାମ ପିଛା ୧୦ହଜାର ହୋଇଛି । ଗହଣା ପାଇଁ ମୁଖ୍ୟତଃ ୨୨କ୍ୟାରେଟ୍ ସୁନା ବ୍ୟବହାର ହୋଇଥାଏ । ଆଉ ଏବେ ୨୨କ୍ୟାରେଟ୍ ସୁନାର ଦାମ ବି ପାର କରିଛି ୧ଲକ୍ଷ । ଆଗକୁ ଦଶହରା, ଦୀପାବଳି, ଧନତେରାସ ଭଳି ପର୍ବ ଆସୁଥିବା ବେଳେ ଏହା ପୂର୍ବରୁ ୨୨କ୍ୟାରେଟ୍ ସୁନାର ଦାମ ଲକ୍ଷେ ପାର କରିଛି । ଏହି ଦାମ ଆହୁରି ବଢ଼ିପାରେ ବୋଲି ମଧ୍ୟ ଆକଲନ କରାଯାଉଛି । ଆଜି ୨୪ କ୍ୟାରେଟ ସୁନା ୧ ଲକ୍ଷ ୧୦ହଜାର ୨୯୦ ଟଙ୍କା ଥିବା ବେଳେ ୨୨ କ୍ୟାରେଟ ସୁନା ଦର ୧ଲକ୍ଷ ୧ହଜାର ୧୦୦ ଟଙ୍କାରେ ପହଞ୍ଚିଛି ।

ପୂର୍ବରୁ ୨୪ କ୍ୟାରେଟ୍ ଗୋଲ୍ଡ ୧ଲକ୍ଷ ଛୁଇଁଥିବା ବେଳେ ଏବେ ୨୨କ୍ୟାରେଟ୍ ବି ହୋଇଛି ୧ଲକ୍ଷ । ଭାରତରେ ମୁଖ୍ୟତଃ ମହିଳା ମାନଙ୍କର ଗରଣା କିଣିବା ପ୍ରତି ଅଧିକ ସଉକ ଥାଏ । ବିଭିନ୍ନ ପର୍ବପର୍ବାଣୀରେ ଘରକୁ ସୁନା କିଣାଯାଏ । ଘରେ ବାହାଘର ବ୍ରତଘରରେ ମଧ୍ୟ ସୁନା ଉପହାର ଭାବେ ଦିଆଯାଏ । ହେଲେ ବର୍ତ୍ତମାନ ରକେଟ୍ ବେଗରେ ବଢ଼ୁଥିବା ସୁନାର ଦାମକୁ ଦେଖି ବାହାଘରରୁ ସୁନା ଗାଏବ୍ ହେବ ବୋଲି ଚର୍ଚ୍ଚା ହେଉଛି ।

ତେବେ କେବଳ ସୁନା ନୁହେଁ ଧଳା ଧାତୁ ରୁପାର ଦାମରେ ବି ବ୍ରେକ୍ ଲାଗୁନି। ଏକ କେଜି ରୁପାର ଦାମ ୮୮ ହଜାର ୪୦୦ରେ ପହଞ୍ଚିଛି । ଯାହା କି ବର୍ତ୍ତମାନର ସବୁଠାରୁ ଅଧିକ । ଚଳିତ ବର୍ଷ ଜାନୁଆରୀରୁ ବର୍ତ୍ତମାନ ମଧ୍ୟରେ ସୁନା ଦର ୩୦ହଜାରରୁ ଅଧିକ ବଢ଼ିଲାଣି । ସୁନା ଦର ବଢ଼ିବାର ୫ଟି ପ୍ରମୁଖ କାରଣ ହେଉଛି ଟ୍ରମ୍ପଙ୍କ ଅନିଶ୍ଚିତ ଟାରିଫ ନୀତି । ବାଣିଜ୍ୟ ଯୁଦ୍ଧ ଡରରେ ଲୋକମାନେ ସୁନାରେ ଅଧିକ ନିବେଶ କରୁଛନ୍ତି ।

ଚୀନ ଓ ଋଷ ଭଳି ଦେଶ ଅଧିକ ମାତ୍ରାରେ ସୁନା କିଣୁଛନ୍ତି। ଯାହା କି ସୁନା ରୁପାର ଚାହିଦା ବଢ଼ାଉଛି । ଚାହିଦା ବଢ଼ିବା ସହ ଦର ବି ବଢ଼ୁଛି । ଋଷ-ୟୁକ୍ରେନ ଯୁଦ୍ଧର ଅସ୍ଥିରତା ଭିତରେ ଲୋକେ ସୁନାରେ ଅଧିକ ନିବେଶ କରୁଛନ୍ତି । ମୁଦ୍ରାସ୍ଫୀତି ଡ଼ର ଓ ଫେଡେରାଲ ରିଜର୍ଭର କମ୍ ସୁଧ ହାର ଯୋଗୁଁ ସୁନା ନିବେଶର ମାଧ୍ୟମ ପାଲଟିଛି । ଏହା ମଧ୍ୟ ଦର ବୃଦ୍ଧିର ଏକ ପ୍ରମୁଖ କାରଣ । ସେହିପରି ଡଲାର ତୁଳନାରେ ସୁନାର ବିନିମୟ ମୂଲ୍ୟରେ ହ୍ରାସ ବି ସୁନାକୁ ମହଙ୍ଗା କରୁଛି ।