ଅର୍ଗସ ବ୍ୟୁରୋ: ଭାରତୀୟ ନୈସେନା ପାଇଁ ଐତିହାସିକ ଦିନ । ଜାଗ୍ରତ ପ୍ରହରୀ ସାଜି ଦେଶବାସୀଙ୍କ ଶାନ୍ତି, ସୁରକ୍ଷା ଓ ଏକତା ସୁନିଶ୍ଚିତ କରୁଥିବା ନୌସେନାକୁ ମିଳିଛି ମହାଶକ୍ତି । ମହାରାଷ୍ଟ୍ରରେ 3ଟି ଫ୍ରଣ୍ଟଲାଇନ ନୌସେନା ଯୁଦ୍ଧପୋତକୁ ଦେଶ ପାଇଁ ଉତ୍ସର୍ଗ କରିଛନ୍ତି ପ୍ରଧାନମନ୍ତ୍ରୀ ମୋଦି । INS ସୁରଟ, INS ନୀଳଗିରି ଓ INS ଭାଗଶୀରକୁ ମୁମ୍ବାଇର ନାଭାଲ୍ ଡକୟାର୍ଡରେ ନୌସେନାକୁ ହସ୍ତାନ୍ତର କରିଛନ୍ତି ମୋଦି । ଭାରତ ଇତିହାସରେ ଏମିତି ପ୍ରଥମଥର ହୋଇଛି, ଦିନକରେ ଗୋଟିଏ ବୁଡ଼ାଜାହାଜ ସହ 3ଟି ଯୁଦ୍ଧ ଜାହାଜର ଜଳାବତରଣ କରାଯାଇଛି। ଯାହା ପ୍ରତିରକ୍ଷା କ୍ଷେତ୍ରରେ ଦେଶକୁ କରିଛି ଆହୁରି ମଜଭୁତ୍।
Byte- ନରେନ୍ଦ୍ର ମୋଦି, ପ୍ରଧାନମନ୍ତ୍ରୀ

INS ନୀଳଗିରି, P17A ଷ୍ଟିଲ୍ ଫ୍ରିଗେଟ୍ ପ୍ରୋଜେକ୍ଟର ପ୍ରଥମ ଜାହାଜ। ଭାରତୀୟ ନୌସେନାର ୱାରସିପ୍ ଡିଜାଇନ୍ ବ୍ୟୁରୋ ପ୍ରସ୍ତୁତ କରିଛି ଏହାର ଡିଜାଇନ୍ । INS ସୁରଟ, P15B ଗାଇଡ୍ ମିଶାଇଲ୍ ବିନାଶକାରୀ ପ୍ରକଳ୍ପର ଚତୁର୍ଥ ତଥା ଅନ୍ତିମ ଜାହାଜ ଯାହା ବିଶ୍ବର ବୃହତ୍ତମ ଓ ଅତ୍ୟାଧୁନିକ ବିନାଶକାରୀ ମହାଶକ୍ତି ମଧ୍ୟରେ ସ୍ଥାନିତ ହୋଇଛି । ସେହିପରି P75 ସ୍କର୍ପିନ୍ ପ୍ରକଳ୍ପର ଷଷ୍ଠ ତଥା ଅନ୍ତିମ ବୁଡ଼ାଜାହାଜ INS ଭାଗଶୀର ବୁଡ଼ାଜାହାଜ, ଫ୍ରାନ୍ସର ନାଭାଲ୍ ଗ୍ରୁପ୍ ସହଯୋଗରେ ନିର୍ମିତ ହୋଇଛି ।

ସେପଟେ ୭୭ତମ ସ୍ଥଳସେନା ଦିବସ ଅବସରରେ ପୁନେରେ ହୋଇଛି ଆର୍ମି ଡେ ପରେଡ୍। ଦେଖିବାକୁ ମିଳିଛି ବୀର ଯବାନଙ୍କ ବୀରତ୍ବ, ଶୌର୍ଯ୍ୟ, ପରାକ୍ରମର ଅଦ୍ବିତୀୟ ଝଲକ । ପ୍ରଥମ ଥର ପାଇଁ ସେନାରେ ସାମିଲ ଶହେ ରୋବୋ ଡଗ୍ ସ୍କ୍ବାର୍ଡର କାରନାମା ଦର୍ଶକଙ୍କୁ ବିସ୍ମିତ କରିବା ସହ ହଜାଇଛି ଶତ୍ରୁଙ୍କ ନିଦ । ଭାରତୀୟ ସେନାର ପ୍ରମୁଖ ଅଙ୍ଗ ପଦାତିକ ବାହିନୀ ୧୯୪୯ ଜାନୁଆରୀ ୧୫ରୁ ନିରବଚ୍ଛିନ୍ନ ଭାବେ ଦେଶବାସୀଙ୍କୁ ସୁରକ୍ଷା ଯୋଗାଇଦେଇ ଆସୁଛନ୍ତି । ୧୯୪୭ରେ ସ୍ବାଧୀନତା ପରେ ବି ୧୯୪୯ ଯାଏଁ ଭାରତ ସେନାରେ ବ୍ରିଟିଶ ସେନା ବରିଷ୍ଠ ଅଧିକାରୀ ଭାବେ କାର୍ଯ୍ୟ କରୁଥିଲେ । ୧୯୪୯ ଜାନୁଆରୀ 15ରେ ଶେଷ ବ୍ରିଟିଶ ସେନାଧ୍ୟକ୍ଷ କମାଣ୍ଡର ଇନ ଚିଫ ଜେନେରାଲ ଫ୍ରାନ୍ସିସ ବୁଚର, ଲେଫ୍ଟନାଣ୍ଟ ଜେନେରାଲ କେଏମ କରିୟପ୍ପାଙ୍କୁ ଭାରତୀୟ ସେନାର ଦାୟିତ୍ବ ହସ୍ତାନ୍ତର କରିଥିଲେ । ଏହି ଐତିହାସିକ ଦିନର ସ୍ମରଣରେ ପ୍ରତିବର୍ଷ ଜାନୁଆରୀ 15ରେ ସୀମାରେ ମୁତୟନ ଯବାନଙ୍କ ସେବା, ତ୍ୟାଗ ଓ ବଳିଦାନକୁ ସମ୍ମାନ ଜଣାଇ ଆସୁଛନ୍ତି ଦେଶବାସୀ ।

Argus News | argus news | Odisha Latest News, Breaking News, Trending News, Live TV