ରାୟପୁର: ଦେଶ ସ୍ଵାଧୀନତାକୁ ୭୮ ବର୍ଷ ବିତିଲାଣି । କିନ୍ତୁ ସେମାନେ ଆଜି ଯାଏଁ ପରାଧୀନ ଥିଲେ । ସ୍ଵାଧୀନ ଭାରତ ଭିତରେ ଏହା ଥିଲା ଏକ ପରାଧୀନ ଭୂ-ଖଣ୍ଡ । ଯେଉଁଠିକାର ଏକାଧିକ ଗାଁର ଲୋକେ ସ୍ଵାଧୀନ ଭାରତରେ ରହୁଥିଲେ ସତ କିନ୍ତୁ ଉଡ଼ାଇ ପାରୁନଥିଲେ ତ୍ରିରଙ୍ଗା ।

ବର୍ଷ ବର୍ଷର ପ୍ରତୀକ୍ଷା ପରେ ଏବେ ୪୧ ଖଣ୍ଡ ଗାଁ ପାଇଁ ଗଣତନ୍ତ୍ର ଦିବସ ଆଣି ଦେଇଛି ଗୌରବର ମୁହୂର୍ତ୍ତ । ଯେଉଁ ମୁହୂର୍ତ୍ତକୁ ଏହି ଭୂ-ଖଣ୍ଡର ଲୋକେ ଦୀର୍ଘ ବର୍ଷରୁ ଚାତକ ପରି ଚାହିଁ ରହିଥିଲେ ।

ଏଥିସହ ପଢ଼ନ୍ତୁ: ଗଣତନ୍ତ୍ର ଦିବସ ପରେଡ୍ ବେଳେ ଧସିଥିଲା ଏକାଧିକ ବହୁତଳ କୋଠା

ଏହି ଅଞ୍ଚଳ ହେଉଛି ଓଡ଼ିଶାର ପଡ଼ୋଶୀ ଛତିଶଗଡ଼ର ବିଜାପୁର, ନାରାୟଣପୁର ଓ ସୁକମା ଜିଲ୍ଲା । ଏହି ୩ ଜିଲ୍ଲାର ପ୍ରାୟ ୪୧ ଖଣ୍ଡ ଗାଁ ପ୍ରଥମଥର ପାଇଁ ଜାନୁଆରୀ ୨୬ରେ ତ୍ରିରଙ୍ଗା ଉଡ଼ାଇ ସାଧାରଣତନ୍ତ୍ର ଦିବସ ସମାରୋହରେ ସାମିଲ୍ ହୋଇଛନ୍ତି ।

ବିଗତ ୨ ବର୍ଷ ହେଲା ଏଥିପାଇଁ କେନ୍ଦ୍ର ସରକାର ଓ ରାଜ୍ୟ ସରକାର ସମନ୍ଵିତ ରଣନୀତି ଆପଣାଇଥିଲେ । ସୁରକ୍ଷାକର୍ମୀଙ୍କ ନିରନ୍ତର ଅଭିଯାନ ଫଳରେ ଅଞ୍ଚଳରେ ସୁରକ୍ଷା ସ୍ଥିତିରେ ବେଶ୍ ସୁଧାର ଆସିଛି ।

ଛତିଶଗଡ଼ର ଏହି ଅଞ୍ଚଳ ଦଶନ୍ଧି ଦଶନ୍ଧି ଧରି ବାମପନ୍ଥୀ ତଥା ନକ୍ସଲଙ୍କ କବ୍‌ଜାରେ ରହିଥିଲା । ଉକ୍ତ ମାଓ ପ୍ରଭାବିତ ଅଞ୍ଚଳରେ ପ୍ରାୟ ୫୯ଟି ନୂଆ ସୁରକ୍ଷା ଶିବିର ପ୍ରତିଷ୍ଠା କରାଯାଇଛି । ଫଳରେ ପ୍ରଶାସନ ଓ ସୁରକ୍ଷା ସୁନିଶ୍ଚିତ ହୋଇ ପାରିଛି । ସ୍ଥାନୀୟ ଲୋକଙ୍କ ସହଯୋଗ ଫଳରେ ମିଳିଛି ଐତିହାସିକ ଉପଲବ୍ଧି ।

ଗତବର୍ଷ ଏହି ଅଞ୍ଚଳର ୫୩ଟି ଗାଁ ଗଣତନ୍ତ୍ରର ମହାନ ପର୍ବରେ ସାମିଲ୍ ହୋଇଥିଲେ । ଚଳିତବର୍ଷ ଆଉ ୪୧ଟି ଗାଁ ଏଥରକ ଯୋଡ଼ି ହୋଇଛନ୍ତି । ଲାଲଗଡ଼ରେ ଫର୍ ଫର୍ ହୋଇ ତ୍ରିରଙ୍ଗା ଉଡ଼ିଛି । ଜାତୀୟ ପତାକା ତଳେ ଛିଡ଼ା ହୋଇ ବସ୍ତରର ୪୧ଟି ଗାଁରେ ଲୋକେ ଗଣତନ୍ତ୍ର ଦିବସ ମନାଇଛନ୍ତି ।

ଏଥିସହ ପଢ଼ନ୍ତୁ: ରାଜ୍ୟସ୍ତରୀୟ ସାଧାରଣତନ୍ତ୍ର ଦିବସ; ତ୍ରିରଙ୍ଗା ଉଡ଼ାଇଲେ ରାଜ୍ୟପାଳ

ଆଉ ନାହିଁ ନକ୍ସଲ ଡର

ବସ୍ତରର ଏହି ଦୁର୍ଗମ ଅଞ୍ଚଳରେ ପୂର୍ବରୁ ରାଷ୍ଟ୍ରୀୟ ପର୍ବ ପାଳନ ସମ୍ଭବ ହେଉ ନଥିଲା । ଏବେ ଅଞ୍ଚଳ ନକ୍ସଲବାଦରୁ ମୁକୁଳୁଥିବା ବେଳେ ଚିତ୍ର ବଦଳୁଛି । ସୁରକ୍ଷାକର୍ମୀଙ୍କ ସ୍ଥାୟୀ ଉପସ୍ଥିତି ଯୋଗୁ ମାଓ ଶିବିର ଦୁର୍ବଳ ହେଉଛି ।

ବିଜାପୁର ଜିଲ୍ଲାର ଉଲ୍ଲୁର, ଚିଲମସକା, ପେଦ୍ଦାକୋମରା, କୋମାଗୁଡ଼ା, ବେଲନାର, ତାଡ଼ପାଳ, କୋଡାପାଲି, ଦନ୍ତେୱାଡ଼ାର ପିଲ୍ଲୁର, ଡୋଡିସୁମାର, କମାଲୁର, ନାରାୟଣପୁର-ଓରଛାର ପଲୱାୟା, ଏଡୁମ, ଈଦୱାୟା, କୁକଡ଼ମେଲ ଆଦି ଗାଁ ପ୍ରଥମଥର ପାଇଁ ଗଣତନ୍ତ୍ର ଦିବସରେ ତ୍ରିରଙ୍ଗା ଉଡ଼ାଇ ରାଷ୍ଟ୍ରୀୟ ପର୍ବରେ ସାମିଲ୍ ହୋଇଛନ୍ତି । ଯାହାକୁ ସୁରକ୍ଷା ବ୍ୟବସ୍ଥା ଓ ଗଣତନ୍ତ୍ର ବଡ଼ ସଫଳତା ବିବେଚନା କରାଯାଉଛି ।