ଦିଲ୍ଲୀ ପ୍ରଦୂଷଣ ନିୟନ୍ତ୍ରଣ କରିବାକୁ କେନ୍ଦ୍ର ସରକାର ଉଠାଇଥିବା ପକ୍ଷେପକୁ କଡ଼ାକଡ଼ି କାର୍ଯ୍ୟାକାରୀ କରାଯାଇଛି। ପ୍ରଦୂଷଣ ରୋକିବାକୁ ସରକାର ନୋ ପିୟୁସି, ନୋ ଫ୍ୟୁଲ୍ ଅଭିଯାନ ପ୍ରଥମ ଦିନରେ ହିଁ ଏହାର ବ୍ୟାପକ ପ୍ରଭାବ ପଡ଼ିଥିଲା। ଏହି ଅଭିଯାନ ଚଳାଇବାର ୨୪ ଘଣ୍ଟା ମଧ୍ୟରେ ଦିଲ୍ଲୀରେ ୩୭୦୦ରୁ ଅଧିକ ଗାଡ଼ିର ଚାଲାଣ କଟାଯାଇଛି । ନିୟମ ପାଳନ କରୁ ନଥିବା କିମ୍ବା ଭୁଲ ଜାଗା ଯାଉଥିବା ୫୭୦ ଗାଡ଼ିକୁ ଫେରାଇ ଦିଆଯାଇଛି। ଏନେଇ ଦିଲ୍ଲୀ ପରିବେଶ ମନ୍ତ୍ରୀ ମନଜିନ୍ଦର ସିଂହ ସିରସା ସୂଚନା ଦେଇଛନ୍ତି ।

ଦିଲ୍ଲୀ ଟ୍ରାଫିକ୍ ପୋଲିସ ଏବଂ ପରିବହନ ବିଭାଗର ମିଳିତ ଟିମର ଚଢ଼ାଉରେ ପ୍ରଥମ ଦିନରେ ଜାତୀୟ ରାଜଧାନୀର ପ୍ରମୁଖ ପ୍ରବେଶ ସ୍ଥାନରେ ପ୍ରାୟ ୫,୦୦୦ ଯାନବାହନ ଯାଞ୍ଚ କରିଯାଇଥିଲା। ଅଧିକାରୀମାନେ କହିଛନ୍ତି ଯେ ବୈଧ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର (Pollution Under Control Certificate) ନଥିବା ପାଇଁ ୩,୭୪୬ ଗାଡ଼ିର ଚାଲାଣ କଟା ଯାଇଥିଲା । ସେହିପରି ଭୁଲରେ ଆସୁଥିବା ୫୬୮ ଗାଡ଼ିକୁ ଦିଲ୍ଲୀରେ ପ୍ରବେଶ କରିବାକୁ ମନା କରାଯାଇଥିଲା। ଏହାସହିତ, ସହର ମଧ୍ୟକୁ ଅନାବଶ୍ୟକ ପ୍ରବେଶକୁ ରୋକିବା ପାଇଁ ୨୧୭ ଅନବାଶ୍ୟକ ଟ୍ରକକୁ ପୂର୍ବ ଏବଂ ପଶ୍ଚିମ ପେରିଫେରାଲ ଏକ୍ସପ୍ରେସୱେ ଦେଇ ଗତିପଥ ପରିବର୍ତ୍ତନ କରାଯାଇଥିଲା ।

ଏହି ଅଭିଯାନ ସହିତ ଦିଲ୍ଲୀରେ ପିୟୁସିସି ଆବେଦନ ବହୁ ସଂଖ୍ୟାରେ ବଢ଼ି ଯାଇଥିଲା । ଡିସେମ୍ବର ୧୭ ରୁ ୧୮ ମଧ୍ୟରେ ୬୧,୦୦୦ରୁ ଅଧିକ ପ୍ରମାଣପତ୍ର ପ୍ରଦାନ କରାଯାଇଥିଲା । ପରିବେଶ ମନ୍ତ୍ରୀ ମଞ୍ଜିନ୍ଦର ସିଂହ ସିରସା ଦିଲ୍ଲୀ-ଗୁରୁଗ୍ରାମ ସୀମା ଏବଂ ଜନପଥରେ ଥିବା ପେଟ୍ରୋଲ ପମ୍ପ ଗୁଡ଼ିକ ପରିଦର୍ଶନ କରିଥିଲେ । ସେ କର୍ମଚାରୀ ଏବଂ ଡ୍ରାଇଭରମାନଙ୍କ ସହିତ କଥାବାର୍ତ୍ତା କରିଥିଲେ, ସେମାନଙ୍କୁ ବୈଧ PUCC ବିନା କୌଣସି ଯାନରେ ତେଲ ନଦେବାକୁ ସ୍ପଷ୍ଟ ଭାବରେ ନିର୍ଦ୍ଦେଶ ଦେଇଥିଲେ । ସେ ସେମାନଙ୍କୁ ନିୟମଗୁଡ଼ିକୁ କଡ଼ାକଡ଼ି ଭାବରେ ଲାଗୁ କରିବାକୁ କହିଛନ୍ତି ।

ଦିଲ୍ଲୀ ଟ୍ରାଫିକ ପୋଲିସର ଅତିରିକ୍ତ କମିଶନର ଦିନେଶ କୁମାର ଗୁପ୍ତା କହିଛନ୍ତି ଯେ GRAP-IV କାର୍ଯ୍ୟକାରୀ ହେବା ପରଠାରୁ ସମସ୍ତ ଦିଲ୍ଲୀ ସୀମାରେ କର୍ମଚାରୀ ନିୟୋଜିତ କରାଯାଇଛି। ସେ ଆହୁରି ମଧ୍ୟ କହିଛନ୍ତି ଯେ ଦିଲ୍ଲୀରେ ମୋଟ ୧୨୬ ସୀମା ଅଛି, ଯାହା ମଧ୍ୟରୁ ୫୬ଟି ସୀମା ଜୋନ୍-୨ ପଡ଼ିଥାଏ, ଯେତେବେଳେ ପ୍ରମୁଖ ସୀମାରେ ଅତିରିକ୍ତ ଟ୍ରାଫିକ କର୍ମଚାରୀ, ସ୍ଥାନୀୟ ପୋଲିସ, ବାହାର କର୍ମଚାରୀ ଏବଂ ପରିବହନ ବିଭାଗ ଦଳ ନିୟୋଜିତ କରାଯାଇଛି ।

ଅଧିକ ପଢ଼ନ୍ତୁ ଦେଶ ଖବର...