ଅର୍ଗସ ବ୍ୟୁରୋ: ଧାର୍ମିକ କାର୍ଯ୍ୟକ୍ରମରେ ବଡ଼ ଧରଣର ଅଘଟଣ । ମଞ୍ଚ ଭୁଶୁଡ଼ିବାରୁ ଚାଲିଗଲା ୭ ଶ୍ରଦ୍ଧାଳୁଙ୍କ ଜୀବନ । ଉତ୍ତରପ୍ରଦେଶର ବାଗପତ ଜିଲ୍ଲାରେ ଏହି ଅଘଟଣ ଘଟିଛି । ବଡ଼ୌତରେ ଭଗବାନ ଆତିନାଥଙ୍କ ନିର୍ବାଣ ଲଡୁ ପର୍ବ ଲାଗି ୬୫ ଫୁଟ୍ ଉଚ୍ଚର କାଠ ମଞ୍ଚ ତିଆରି ହୋଇଥିଲା । ଶ୍ରଦ୍ଧାଳୁଙ୍କ ପ୍ରବଳ ଭିଡ଼ରେ ଭୁଶୁଡ଼ି ପଡ଼ିଛି ।

ମଞ୍ଚ ଭୁଶୁଡ଼ିବାରୁ ଶତାଧିକ ଶ୍ରଦ୍ଧାଳୁ ତଳେ ଚାପି ହୋଇ ଯାଇଥିଲେ । ୬୫ ଫୁଟ୍ ଉଚ୍ଚରୁ ପଡ଼ିବା ଫଳରେ ଅନେକ ଶ୍ରଦ୍ଧାଳୁ ଆହତ ହୋଇଥିବା ବେଳେ ଭଗ୍ନାବଶେଷ ତଳେ ଅନେକ ଚାପି ହୋଇ ଯାଇଥିଲେ ଏବଂ ଦଳାଚକଟାରେ ୭ ଶ୍ରଦ୍ଧାଳୁଙ୍କ ମୃତ୍ୟୁ ହୋଇଛି । ୭୫ରୁ ଅଧିକ ଶ୍ରଦ୍ଧାଳୁ ଆହତ ହୋଇଥିବା ବେଳେ ୨୦ ଜଣଙ୍କ ଅବସ୍ଥା ଗୁରୁତର ଅଛି ।

ମଞ୍ଚ ଭୁଶୁଡ଼ିବା ପରେ ପ୍ରଶାସନିକ ଅଧିକାରୀ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିବା ସହ ଆହତଙ୍କୁ ମେଡିକାଲ ପଠାଇ ଥିଲେ । ତେବେ ମଞ୍ଚ ଭୁଶୁଡ଼ିବାର କାରଣ ସୁରକ୍ଷାରେ ଆୟୋଜକଙ୍କ ତ୍ରୁଟି ବୋଲି କୁହା ଯାଉଛି । ଘଟଣାରେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଦୁଃଖ ପ୍ରକାଶ କରିବା ସହ ଆହତଙ୍କ ଉଚିତ୍ ଚିକିତ୍ସା ଲାଗି ନିର୍ଦ୍ଦେଶ ଦେଇଛନ୍ତି ।

ନିର୍ବାଣ ମହୋତ୍ୱ ଲାଗି ଗାନ୍ଧୀ ରୋଡ୍ ସ୍ଥିତ ଶ୍ରୀ ଦିଙ୍ଗବର ଜୈନ ଡିଗ୍ରୀ କଲେଜ ପଡ଼ିଆରେ ୬୫ ଫୁଟ୍ ଉଚ୍ଚର ଅସ୍ଥାୟୀ ମଞ୍ଚ ବନ୍ଧା ଯାଇଥିଲା । ମଙ୍ଗଳବାର ସକାଳ ୮ଟାରେ ମହୋତ୍ସବରେ ପ୍ରବଳ ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ମଞ୍ଚକୁ ଏକମାତ୍ର ସିଢ଼ି ରହିଥିବା ବେଳେ ତା ପ୍ରଥମେ ଭାଙ୍ଗିଥିଲା । ଦେଖୁ ଦେଖୁ କେଇ ସେକେଣ୍ଡରେ ଭୁଶୁଡ଼ି ପଡ଼ିଥିଲା ପୂରା ମଞ୍ଚଟି ।