ମହାକୁମ୍ଭରେ ସଙ୍ଗମରେ ସ୍ନାନ ପାଇଁ ସମସ୍ତେ ଆତୁର । ଏଥିପାଇଁ ଲାଗିଛି ଲମ୍ବା ଲାଇନ୍ । ଷ୍ଟେସନରେ ପାଦ ରଖିବାକୁ ଜାଗା ନଥିବା ବେଳେ ରାଜପଥ ବି ଜାମ୍ । କିଏ ବସ୍‌ରେ ତ ଆଉ କିଏ ନିଜେ କାର ଧରି ବାହାରିଛନ୍ତି ପ୍ରୟାଗରାଜ ଅଭିମୁଖେ । ସମସ୍ତଙ୍କ ଲକ୍ଷ୍ୟ ୧୪୪ ବର୍ଷରେ ଆସିଥିବା ମହାକୁମ୍ଭରେ ବୁଡ଼ ପକାଇବା ।

ପ୍ରୟାଗରାଜକୁ ଶ୍ରଦ୍ଧାଳୁଙ୍କ ସୁଅ ଛୁଟୁଥିବା ବେଳେ ଆସିଛି ବଡ଼ ଦୁର୍ଘଟଣାର ଖବର । ସଙ୍ଗମରେ ସ୍ନାନ ସାରି ଘରକୁ ଫେରୁଥିବା ବେଳେ ଦୁର୍ଘଟଣାରେ ୭ ଜଣଙ୍କ ଜୀବନ ହାନି ଘଟିଛି । ଏହି ଭୟଙ୍କର ଦୁର୍ଘଟଣା ହୋଇଛି, ମଧ୍ୟପ୍ରଦେଶର ଜବଲପୁର ସ୍ଥିତ ସିହୋରାରେ । ଏକ ବ୍ରିଜ୍‌ ଉପରେ ଟ୍ରାଭେଲରକୁ ଚାପି ଦେଇଛି ଏକ ଟ୍ରକ୍ । ଏହି ଦୁର୍ଘଟଣାରେ ମହାକୁମ୍ଭରୁ ଫେରୁଥିବା ୭ ଶ୍ରଦ୍ଧାଳୁ ପ୍ରାଣ ହରାଇଛନ୍ତି ।

ମିଳିଥିବା ସୂଚନା ଅନୁସାରେ, ଏକ ସିମେଣ୍ଟ ବୋଝେଇ ଟ୍ରକ୍ ଟ୍ରାଭେଲର ସହ ଆଉ ଏକ କାରକୁ ଧକ୍କା ଦେଇଛି । ଦୁର୍ଘଟଣାର ଚିତ୍ର ଦେଖିଲେ ଏହା କେତେ ଯେ ଭୟଙ୍କର ଥିଲା ବୁଝି ହେଉଛି । ଟ୍ରାଭେଲରଟି ସମ୍ପୂର୍ଣ୍ଣ ଭାଙ୍ଗି ଯାଇଥିବା ବେଳେ କାରଟି କ୍ଷତିଗ୍ରସ୍ତ ହୋଇଛି । ଘଟଣାସ୍ଥଳରେ ହିଁ ୭ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟମାନଙ୍କୁ ଉଦ୍ଧାର କରାଯାଇ ମେଡିକାଲ୍ ନିଆ ଯାଇଛି ।

ଏହି ଦୁର୍ଘଟଣା ମଙ୍ଗଳବାର ସକାଳ ଜାତୀୟ ରାଜପଥ-୩୦ର ମୋହଲା ବରଗି ନିକଟ ବ୍ରିଜ୍‌ରେ ଘଟିଛି । ମିଳିଥିବା ସୂଚନା ଅନୁସାରେ, ସମସ୍ତ ମୃତକ ଆନ୍ଧ୍ରପ୍ରଦେଶର । ସଙ୍ଗମରେ ସ୍ନାନ ପରେ ସମସ୍ତେ ଆନ୍ଧ୍ରପ୍ରଦେଶ ଟ୍ରାଭେଲର ଯୋଗେ ଫେରୁଥିବା ବେଳେ ଟ୍ରକ୍ ଧକ୍କା ଦେଇଥିଲା ।

Argus News | argus news | -Argusnews Home: Odisha Latest News, Breaking News, Trending News, Live TV and more