ତେଲେଙ୍ଗାନାର ଶ୍ରୀଶୈଲମ ଲେଫ୍ଟ ବ୍ୟାଙ୍କ କେନାଲ ଟନେଲରେ ଫସିଥିବା ଶ୍ରମିକଙ୍କୁ ଉଦ୍ଧାର କରିବା ଲାଗି ଜୋରଦାର ପ୍ରୟାସ ଜାରି ରହିଛି। ଟନେଲ ଭିତରେ ଫସି ରହିବାର ୭୨ ଘଣ୍ଟା ବିତିଯାଇଥିଲେ ସୁଦ୍ଧା ଏଯାଏଁ ସେମାନଙ୍କ ସହ ଯୋଗଯୋଗ ମଧ୍ୟ ହୋଇପାରିନି। ଉଦ୍ଧାର କାର୍ଯ୍ୟରେ ସେନା, ନୌସେନା, ଏନଡିଆରଏଫ୍ ର ଟିମ ସମେତ ରାଟ ମାଇନରମାନେ ମଧ୍ୟ ନିୟୋଜିତ ହୋଇଛନ୍ତି। କେନ୍ଦ୍ର ସରକାର ରାଜ୍ୟ ସରକାରଙ୍କୁ ଶ୍ରମିକଙ୍କ ଉଦ୍ଧାର ନିମନ୍ତେ ସମସ୍ତ ପ୍ରକାର ସହଯୋଗ ପ୍ରଦାନ କରିଛନ୍ତି।

ତେଲେଙ୍ଗାନାରେ ସୁଡ଼ଙ୍ଗ ଭୁଶୁଡ଼ି ପଡ଼ିଥିବା ଅଂଶରେ ଫସି ରହିଥିବା ୮ ଜଣଙ୍କୁ ଉଦ୍ଧାର କରିବା ପାଇଁ ପ୍ରୟାସ ଏବେ ପଞ୍ଚମ ଦିନରେ ପହଞ୍ଚିଛି। ଦୁର୍ଘଟଣାସ୍ଥଳରେ ପଙ୍କ ଓ କାଦୁଅର ପରିମାଣ ବୃଦ୍ଧି ପାଉଥିବାରୁ ବିଶେଷଜ୍ଞମାନେ ଅସ୍ଥାୟୀ ଭାବେ ଖନନ କାର୍ଯ୍ୟ ବନ୍ଦ କରିଦେଇଛନ୍ତି। ବର୍ତ୍ତମାନ ପାର୍ଶ୍ୱପଥ ଦେଇ ପହଞ୍ଚିବାକୁ ଚେଷ୍ଟା ଚାଲିଛି।

କୁହାଯାଉଛି ଯେ, ଯଦି ଗଭୀର ଖନନ କରାଯାଏ ତେବେ ଢାଞ୍ଚାଗତ ସ୍ଥିରତାରେ ସମସ୍ୟା ସୃଷ୍ଟି ହୋଇପାରେ, ଯାହା କେବଳ ଫସି ରହିଥିବା ଶ୍ରମିକମାନଙ୍କୁ ବିପଦରେ ପକାଇବ ନାହିଁ ବରଂ ଉଦ୍ଧାରକାରୀ ଦଳର ଜୀବନକୁ ମଧ୍ୟ ବିପଦରେ ପକାଇପାରେ। ପ୍ରତି ମିନିଟରେ ପ୍ରାୟ ୩୨୦୦ ଲିଟର ପାଣି ସୁଡ଼ଙ୍ଗରେ ଭର୍ତ୍ତି ହେଉଛି, ଯେଉଁଥିରେ ବିପୁଳ ପରିମାଣର ବାଲି, ପଥର ଓ ଆବର୍ଜନା ମିଶି ଅଧିକ ପଙ୍କ ଓ କାଦୁଅ ତିଆରି ହେଉଛି। ଶନିବାର ସକାଳେ ଶ୍ରୀଶୈଲମ୍ ଲେଫ୍ଟ ବ୍ୟାଙ୍କ କେନାଲ (ଏସ୍‌ଏଲ୍‌ବିସି) ଟନେଲର ଏକ ଅଂଶ ଭୁଶୁଡ଼ି ପଡ଼ିବା ପରେ ଫସି ରହିଥିବା ୮ ଜଣ ବ୍ୟକ୍ତିଙ୍କ ସହ ଉଦ୍ଧାରକାରୀ ଦଳ ଏପର୍ଯ୍ୟନ୍ତ କୌଣସି ଯୋଗାଯୋଗ କରିପାରି ନାହାନ୍ତି। ସେମାନଙ୍କ ମଧ୍ୟରେ ୨ ଜଣ ଇଞ୍ଜିନିୟର, ୨ ଜଣ ଅପରେଟର ଓ ୪ ଜଣ ଶ୍ରମିକ ଅଛନ୍ତି।