ଅଣ୍ଟାରେ ବାନ୍ଧି ଆଣିଥିବା ପୁଡିଆ ଟାକୁ ଲଥ୍‌ କରି ଅଜାଡି ଦେଲେ ଦୋକାନର କାଚ ଟେବୁଲ ଉପରେ । ପୁଡିଆରେ ଥିବା ଟଙ୍କାଏ, ୨ ଟଙ୍କା, ୧୦ ଟଙ୍କା ଗୁଡା ଖେଳାଇ ହୋଇଗଲା । ଦମ୍ପତ୍ତି କିଛି କହିବା ପୂର୍ବରୁ ତ ଦୋକାନୀ ମାନେ ତାଙ୍କୁ ନେଇ ଅନେକ କିଛି ଭାବି ସାରିଥିଲେ । କିଏ ଭିକାରୀ ବୋଲି ଭାବୁଥିଲେ ତ କିଏ ଆଉ କିଛି ... ହେଲେ ବୃଦ୍ଧ ଜଣକ ନିଜ ମନକଥା କହିବା ପରେ ସମସ୍ତଙ୍କ ଆଶ୍ଚର୍ଯ୍ୟର ସୀମା ନଥିଲା ।

ଚମ ଧୁଡୁଧୁଡୁ ହାତରେ ଟଙ୍କାଗୁଡିକ ଗଣୁଗଣୁ କହିଥିଲେ, ଏତିକିରେ ମୋ ସ୍ତ୍ରୀ ପାଇଁ ମଙ୍ଗଳସୂତ୍ରଟିଏ ହୋଇ ପାରିବ ? ସେଠାରେ ଥିବା ସୁନା ଦୋକାନୀ ଏପରି ଶୁଣିବା ପରେ ଭାରି ଆଶ୍ଚର୍ଯ୍ୟ ହୋଇ ଯାଇଥିଲେ । ଏ ବୟସରେ ବି ନିଜ ସ୍ତ୍ରୀର ମନକଥା ବୁଝି ତା ପାଇଁ ମଙ୍ଗଳସୂତ୍ରଟିଏ କିଣିବାକୁ ସ୍ତ୍ରୀକୁ ଧରି ଚାଲି ଆସିଛନ୍ତି । ମନରେ ସେ ଉତ୍ସାହ, ସେ ଆଗ୍ରହ ଆଖିରେ ପତ୍ନୀଙ୍କ ପ୍ରତି ଥିବା ଭଲପାଇବା ବେଶ ବାରି ହୋଇ ପଡୁଥିଲା । ଆଉ ସ୍ଵାମୀର ଭଲ ପାଇବା ଦେଖି ସ୍ତ୍ରୀ ବି ମୁରୁକି ମୁରୁକି ହସି ଦେଉଥିଲେ । ଯେଉଁଠି ଟଙ୍କା ପଇସାର ବ୍ୟାପାର ନଥିଲା, ଥିଲା ଯଦି କେବଳ ଭଲପାଇବାର ବ୍ୟାପାର । ଯେଉଁଠି ଏତେ ଭଲ ପାଇବା ଥାଏ, ସେଠି ଟଙ୍କା ପଇସା ସବୁ ତୁଚ୍ଛ ହେଇଯାଏ ।

ସମୁଦାୟ ୧୨୦୦ ଟଙ୍କା ହାତରେ ଧରି ସେ ଆସିଥିଲେ ମଙ୍ଗଳସୂତ୍ରଟେ କିଣିବାକୁ । ହେଲେ ବୟସର ଅପରାହ୍ନରେ ବି ଦମ୍ପତ୍ତିଙ୍କର ଏପରି ଭଲପାଇବା ସୁନା ଦୋକାନୀ ମାଲିକଙ୍କୁ ବିମୁଗ୍ଧ କରି ଦେଇଥିଲା । ଦମ୍ପତ୍ତିଙ୍କ ଠାରୁ ମାତ୍ର ୨୦ ଟଙ୍କା ରଖି ବାକି ସବୁତଙ୍କ ଟଙ୍କା ତାଙ୍କୁ ଫେରସ୍ତ କରି ଦେଇଥିଲେ । ଆଉ ପ୍ରତି ବଦଳରେ ମାଗିଥିଲେ ଆଶୀର୍ବାଦ । ଯାହାକୁ ଦେଖି ଦମ୍ପତ୍ତି ଭାବବିହ୍ଵଳ ହୋଇ ପଡିଥିଲେ ।

ଭିକ ମାଗି ମାଗି ଟଙ୍କାଏ ଟଙ୍କା ସଞ୍ଚୟ କରି ରଖିଥିଲେ, ନିଜ ପତ୍ନୀଙ୍କ ଇଚ୍ଛା ପୂରଣ କରିବା ପାଇଁ । ଆଉ ଆଷାଢ ଏକାଦଶୀ ପାଇଁ ଚାଲିଚାଲି ପାନ୍ଧାରପୁରକୁ ଆସିଥିଲେ । ଆଉ ସେଠାରୁ ଛତ୍ରପତି ସାମ୍ଭାଜୀନଗରଠାରେ ଥିବା ଗହଣା ଦୋକାନକୁ ମଙ୍ଗଳସୂତ୍ର ପାଇଁ ଯାଇଥିଲେ ।
ସ୍ଥାନୀୟ ଲୋକଙ୍କ କହିବା ଅନୁସାରେ, ସେମାନେ ସବୁବେଳେ ସାଥିହୋଇ ସବୁସ୍ଥାନକୁ ଯାଆନ୍ତି । ଆଉ ଭିକମାଗି ଚଳନ୍ତି ।

ଭିଡିଓ ଏବେ ସମସ୍ତଙ୍କର ଦୃଷ୍ଟି ଆକର୍ଷଣ କରିଛି । ବର୍ତ୍ତମାନ ଅନେକ ଦମ୍ପତ୍ତିଙ୍କର ହତ୍ୟା , ଛାଡପତ୍ର ଅଭିଯୋଗ ଚର୍ଚ୍ଚା ହେଉଥିବା ବେଳେ ଏହି ବୃଦ୍ଧ ଦମ୍ପତ୍ତିଙ୍କ ଭିଡିଓ ସମସ୍ତଙ୍କୁ ଭାବବିହ୍ଵଳ କରିଦେଇଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more