କମ୍ପ୍ୟୁଟର... ଏହି ଶବ୍ଦ ଟି ଯେତିକି ସାଧାରଣ... ଏହାର କାର୍ଯ୍ୟ ଅସାଧାରଣ, ଅକଳ୍ପନୀୟ ଅତୁଳନୀୟ । ସାମ୍ପ୍ରତିକ ସମୟରେ କମ୍ପ୍ୟୁଟର ବିନା ଜୀବନ ଅଚଳ । କମ୍ପ୍ୟୁଟର ବଦଳାଇ ଦେଇଛି ବଞ୍ଚିବାର ପରିଭାଷା । କମ୍ପ୍ୟୁଟର ଏବେ ମାନବ ସମାଜ ପାଇଁ ପାଲଟିଛି ଅମୋଘ ଅସ୍ତ୍ର । ଆଉ ଏହି କମ୍ୟୁଟରକୁ ନେଇ ପ୍ରତିବର୍ଷ ଆଜିର ଦିନରେ ତଥା ଡିସେମ୍ବର ୨ରେ ସାରା ବିଶ୍ୱରେ ପାଳିତ ହେଉଛି ବିଶ୍ୱ କମ୍ପ୍ୟୁଟର ସାକ୍ଷରତା ଦିବସ ।

ସାମ୍ପ୍ରତିକ ଯୁଗରେ କାଗଜ କଲମର ବ୍ୟବହାର କମିଚାଲିଛି । ଦିନେ ଯେଉଁ ନଥିପତ୍ର ଠାରୁ ଆରମ୍ଭ କରି ସ୍କୁଲ କଲେଜରେ ଶିକ୍ଷାଦାନ ଯାଏଁ କାଗଜ କଲମ ଥିଲା ମୁଖ୍ୟ ଆଧାର ଆଜି ସେହି ସ୍ଥାନ ନେଇ ଗଲାଣି କମ୍ପ୍ୟୁଟର । ବିଜ୍ଞାନର ଅଗ୍ରଗତି ହେବା ସହିତ କମ୍ପ୍ୟୁଟରର ଆଗମନ ହେଲା । ସମସ୍ତ କାର୍ଯ୍ୟାଳୟରେ କମ୍ପ୍ୟୁଟର ବ୍ୟବହାର ବଢିଲା କାଗଜ କଲମ ପ୍ରାୟତଃ ନିଶ୍ଚିହ୍ନ ହେବାରେ ଲାଗିଛି ।

କାରଣ କମ୍ପ୍ୟୁଟରରେ ସମସ୍ତ ତଥ୍ୟ ଗଚ୍ଛିତ, ସୁରକ୍ଷିତ ସହ କ୍ଷଣିକ ମଧ୍ୟରେ ଆଦାନ ପ୍ରଦାନ ହୋଇ ପାରୁଛି । ଫଳରେ ସାରା ବିଶ୍ୱରେ ବଢିବାରେ ଲାଗିଛି କମ୍ପ୍ୟୁଟରର ଚାହିଦା ଓ ଏହାକୁ ଚଳାଇବାର ଶୈଳୀ । ଏଥିପାଇଁ ପ୍ରତିବର୍ଷ ୨ ଡିସେମ୍ବର ଅର୍ଥାତ ଆଜିର ଦିନରେ ପାଳନ କରାଯାଉଛି ବିଶ୍ୱ କମ୍ପ୍ୟୁଟର ସାକ୍ଷରତା ଦିବସ । ବିଶେଷ କରି ଶିଶୁ ଓ ମହିଳାମାନଙ୍କର ବୈଷୟିକ ଜ୍ଞାନକୌଶଳକୁ ପ୍ରୋତ୍ସାହିତ କରିବା ପାଇଁ ଦିନ ଟିଏ ।

ଲୋକମାନଙ୍କୁ କମ୍ପ୍ୟୁଟର ଓ ଏହାର ଶିକ୍ଷା ବିଷୟରେ ଅବଗତ କରାଇବା ପାଇଁ ବିଶ୍ୱ କମ୍ପ୍ୟୁଟର ସାକ୍ଷରତା ଦିବସ ଆରମ୍ଭ ହୋଇଥଲା । କାରଣ ବର୍ତ୍ତମାନ ଯାଏଁ ପର୍ଯ୍ୟାପ୍ତ ଲୋକଙ୍କ ପାଖରେ କମ୍ପ୍ୟୁଟର ଶିକ୍ଷା ପହଞ୍ଚି ପାରିନାହିଁ । ୨୦୦୧ ମସିହାରେ ଭାରତୀୟ କମ୍ପ୍ୟୁଟର କମ୍ପାନୀ NIIT ନିଜର ୨୦ତମ ପ୍ରତିଷ୍ଠା ଦିବସ ଅବସରରେ ପ୍ରତିବର୍ଷ ୨ ଡିସେମ୍ବରକୁ ବିଶ୍ୱ କମ୍ପ୍ୟୁଟର ସାକ୍ଷରତା ଦିବସ ପାଳନ ପାଇଁ ଘୋଷଣା କରିଥିଲା । ସେହି ଦିନ ଠାରୁ ଏହା ସାରା ବିଶ୍ୱରେ ପାଳନ କରାଯାଉଛି । ବର୍ତ୍ତମାନ ସମୟରେ କମ୍ପ୍ୟୁଟରର ଏକ ଅତୁଳନୀୟ ଅବଦାନ ରହିଛି । ଲୋକଙ୍କ ଜୀବନରେ ଏକ ଗୁରୁତ୍ୱପୂର୍ଣ୍ଣ ଅଂଶ ହୋଇଛି ।

ସମୟ ବଦଳିବା ସହିତ କମ୍ପ୍ୟୁଟର ବି ବିଭିନ୍ନ ସ୍ତର ଦେଇ ବିକଶିତ ହୋଇଛି । ଆନାଲିଟିକାଲରୁ ଡିଜିଟାଲ ରୂପରେ ପରିବର୍ତ୍ତନ ହେବା କମ୍ପ୍ୟୁଟରର ସବୁଠାରୁ ମୂଲ୍ୟବାନ ପରିବର୍ତ୍ତନ । ଆଜି କମ୍ପ୍ୟୁଟର ଦ୍ରୁତ ଏବଂ ସହଜରେ ଉପଲବ୍ଧ ହୋଇପାରିଛି । ବିଭିନ୍ନ କ୍ଷେତ୍ରରେ, ବିଭିନ୍ନ ଭାଷାରେ ସୁବିଧା ସୁଯୋଗ ଯୋଗାଇ ଦେଉଛି । ଆଖି ପିଛୁଳାକେ ସମସ୍ତ ସୂଚନାକୁ ଲୋକମାନଙ୍କ ନିକଟରେ ପହଞ୍ଚାଇପାରୁଛି । ଏହି କମ୍ପ୍ୟୁଟର ବଳରେ ମଣିଷ ବିଶ୍ୱ ବ୍ରହ୍ମାଣ୍ଡର ପରଧି ବାହାରକୁ ଯିବାକୁ ପ୍ରୟାସ କରୁଛି । ଫଳରେ କମ୍ପ୍ୟୁଟରର ଶିକ୍ଷା ପରିଚାଳନା ମଧ୍ୟ ସେତିକି ପରିବ୍ୟାପ୍ତ ହେବାର ଆବଶ୍ୟକତା ରହିଛି ।

ଅଧିକ ପଢ଼ନ୍ତୁ ଦେଶ ଖବର...