ମୁମ୍ବାଇ,୦୩/୦୭: ତୃତୀୟ ଥର ପାଇଁ ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି ବଲିଉଡ ମିଷ୍ଟର ପରଫେକ୍ସନିଷ୍ଟ ଆମୀର ଖାନ । ୬୧ ବର୍ଷ ବୟସରେ, ଆମୀର ଖାନ ଦିନକ ପରେ ତାଙ୍କ ଗାର୍ଲଫ୍ରେଣ୍ଡ ଗୌରୀ ସ୍ପ୍ରାଟଙ୍କୁ ବିବାହ କରିବାକୁ ଯାଉଛନ୍ତି । ଗୁରୁବାର ଦିନ ମୁମ୍ବାଇରେ ପ୍ରୀତମ ଏବଂ ପେଡ୍ରୋ ସ୍କ୍ରିନିଂରେ ଗଣମାଧ୍ୟମ ସହ କଥାବାର୍ତ୍ତା ବେଳେ ଆମୀର ଖାନ ବିବାହ ନେଇ ନିଶ୍ଚିତ କରିଛନ୍ତି । ଏଥିସହ ବିବାହ କନଫର୍ମ ସହ କାର୍ଯ୍ୟକ୍ରମ କେଉଁଠି, କିପରି ହେବ ଏବଂ କେଉଁମାନେ ସାମିଲ ହେବେ ? ସେନେଇ କରିଛନ୍ତି ଖୁଲାସା । ଏହି ବିବାହ ତାଙ୍କ ବାସଭବନରେ ଘନିଷ୍ଠ ପରିବାର ସଦସ୍ୟ ଏବଂ ବନ୍ଧୁମାନଙ୍କ ଉପସ୍ଥିତିରେ ଅନୁଷ୍ଠିତ ହେବ ।

ବାନ୍ଦ୍ରା ବାସଭବନରେ ହେବ ବିବାହ

ସୂତ୍ର ଅନୁସାରେ, ଆମିର ଖାନଙ୍କ ମୁମ୍ବାଇର ବାନ୍ଦ୍ରାସ୍ଥିତ ବାସଭବନରେ ବିବାହ ଅନୁଷ୍ଠିତ ହେବ। ଦିନର ପ୍ରଥମାର୍ଦ୍ଧରେ ବିବାହ ପଞ୍ଜୀକରଣ ସମ୍ପନ୍ନ ହେବା ପରେ ଏକ ଛୋଟ ପାରିବାରିକ ଉତ୍ସବର ଆୟୋଜନ କରାଯିବ।

ମାତ୍ର ୧୫୦ ଅତିଥିଙ୍କୁ ନିମନ୍ତ୍ରଣ

ବିବାହକୁ ସମ୍ପୂର୍ଣ୍ଣ ବ୍ୟକ୍ତିଗତ ରଖିବା ପାଇଁ ଅତିଥି ତାଲିକାକୁ ସୀମିତ ରଖାଯାଇଛି। ପ୍ରାୟ ୧୫୦ ଜଣ ଅତିଥି ଏହି ସମାରୋହରେ ଯୋଗଦେବାର ସମ୍ଭାବନା ରହିଛି। ବିଦେଶରେ ଥିବା କିଛି ପରିବାର ସଦସ୍ୟ ମଧ୍ୟ ଏହି ଖାସ ଅବସରରେ ଉପସ୍ଥିତ ରହିବେ।

ପଢନ୍ତୁ ଏହି ଖବର: ଗୌରବ ଖନ୍ନା-ଆକାଂକ୍ଷାଙ୍କ ଛାଡପତ୍ର ଖବରରେ ନୂଆ ଟ୍ୱିଷ୍ଟ… ବାପା ବୋଲି ଦାବି କରୁଥିବା ବ୍ୟକ୍ତିଙ୍କ ବିସ୍ଫୋରକ ଅଭିଯୋଗ

ପିଲାମାନେ ନେବେ ଗୁରୁତ୍ୱପୂର୍ଣ୍ଣ ଭୂମିକା

ଏହି ବିବାହର ସବୁଠୁ ଆକର୍ଷଣୀୟ ଦିଗ ହେଉଛି ଆମିର ଓ ଗୌରୀଙ୍କ ପୂର୍ବ ବିବାହର ପିଲାମାନଙ୍କ ସକ୍ରିୟ ଅଂଶଗ୍ରହଣ। ସୂଚନା ଅନୁସାରେ, ଚାରିଜଣ ପିଲା ଏହି ବିବାହ ଉତ୍ସବରେ ବିଶେଷ ଭୂମିକା ନିଭାଇବେ।

ଗୌରୀ ସ୍ପ୍ରେଟ୍ କିଏ?

ଗୌରୀ ସ୍ପ୍ରେଟ୍ ମୂଳତଃ ବେଙ୍ଗାଲୁରୁର ବାସିନ୍ଦା। ସେ ରୀତା ସ୍ପ୍ରେଟଙ୍କ ଝିଅ, ଯିଏ ବେଙ୍ଗାଲୁରୁରେ ଏକ ପ୍ରସିଦ୍ଧ ସେଲୁନ୍ ଚଳାଉଥିଲେ।

ଲିଙ୍କଡଇନ୍ ପ୍ରୋଫାଇଲ୍ ଅନୁସାରେ, ଗୌରୀ ବ୍ଲୁ ମାଉଣ୍ଟେନ୍ ସ୍କୁଲରେ ପାଠପଢ଼ା କରିବା ପରେ ୨୦୦୪ ମସିହାରେ ଲଣ୍ଡନ ୟୁନିଭର୍ସିଟି ଅଫ୍ ଦ ଆର୍ଟସରୁ ଫ୍ୟାଶନ୍ ଷ୍ଟାଇଲିଂ ଓ ଫଟୋଗ୍ରାଫିରେ ଡିପ୍ଲୋମା ସମ୍ପନ୍ନ କରିଥିଲେ। ବର୍ତ୍ତମାନ ସେ ମୁମ୍ବାଇରେ BBlunt ସେଲୁନ୍ ପରିଚାଳନା କରୁଛନ୍ତି। ରିପୋର୍ଟ ଅନୁସାରେ, ଗୌରୀଙ୍କର ଏକ ସାତ ବର୍ଷର ସନ୍ତାନ ମଧ୍ୟ ଅଛନ୍ତି।

ଆମିରଙ୍କ ଦୁଇଟି ପୂର୍ବ ବିବାହ

ଆମିର ଖାନ ୧୯୮୬ ମସିହାରେ ପିଲାଦିନର ସାଙ୍ଗ ରୀନା ଦତ୍ତଙ୍କୁ ବିବାହ କରିଥିଲେ। ଏହି ଦମ୍ପତିଙ୍କର ପୁଅ ଜୁନୈଦ ଓ ଝିଅ ଇରା ଅଛନ୍ତି। ୨୦୦୨ ମସିହାରେ ଉଭୟଙ୍କର ଛାଡ଼ପତ୍ର ହୋଇଥିଲା।

ଏହାପରେ ୨୦୦୫ ମସିହାରେ ଆମିର ଚଳଚ୍ଚିତ୍ର ନିର୍ମାତ୍ରୀ କିରଣ ରାଓଙ୍କୁ ବିବାହ କରିଥିଲେ। ଫିଲ୍ମ **'ଲଗାନ'**ର ସେଟ୍‌ରେ ଉଭୟଙ୍କ ପରିଚୟ ହୋଇଥିଲା। ୨୦୨୧ ମସିହାରେ ଛାଡ଼ପତ୍ର ପରେ ମଧ୍ୟ ଉଭୟ ପୁଅ ଆଜାଦଙ୍କୁ ମିଳିତ ଭାବେ ଲାଳନ-ପାଳନ କରୁଛନ୍ତି।

ବିବାହକୁ ନେଇ ଉତ୍ସାହ

ଆସନ୍ତା ଜୁଲାଇ ୫ରେ ହେବାକୁ ଥିବା ଏହି ଇଣ୍ଟିମେଟ୍ ୱେଡିଂକୁ ନେଇ ବଲିଉଡ୍ ମହଲରେ ଚର୍ଚ୍ଚା ଜୋର ଧରିଛି। ବିବାହ ସମ୍ପର୍କିତ ଆନୁଷ୍ଠାନିକ ସୂଚନାକୁ ନେଇ ସମସ୍ତଙ୍କ ନଜର ଆମିର ଖାନଙ୍କ ଉପରେ ରହିଛି।