ଭାରତରେ, IAS ପଦବୀକୁ ଦେଶର ସବୁଠାରୁ ମର୍ଯ୍ୟାଦାଜନକ ଏବଂ ଦାୟିତ୍ୱପୂର୍ଣ୍ଣ ଚାକିରି ମଧ୍ୟରୁ ଗୋଟିଏ ଭାବରେ ବିବେଚନା କରାଯାଏ। IAS ଅଧିକାରୀମାନେ ଶାସନ ବ୍ୟବସ୍ଥାକୁ ପ୍ରଭାବଶାଳୀ ଭାବରେ ପରିଚାଳନା କରିବା, ବିକାଶ ପ୍ରକ୍ରିୟାକୁ ଦିଗ ଦେଖାଇବା ଏବଂ ପ୍ରଶାସନିକ ସ୍ୱଚ୍ଛତା ବଜାୟ ରଖିବା ପାଇଁ ଦାୟିତ୍ୱ ବହନ କରିଥାନ୍ତି । ତଥାପି ବିଭିନ୍ନ ସମୟରେ, କିଛି IAS ଅଧିକାରୀଙ୍କ ଦ୍ୱାରା ଦୁର୍ନୀତି, ଅସଦାଚରଣ କିମ୍ବା ଅପରାଧିକ ସମ୍ପୃକ୍ତିର ମାମଲା ସାମ୍ନାକୁ ଆସୁଛି। ଅରୁଣାଚଳ ପ୍ରଦେଶରୁ ଠିକ୍‌ ଏମିତି ଏକ କଳଙ୍କିତ ମାମଲା ସାମ୍ନାକୁ ଆସିଛି । ଯେଉଁଥିରେ AGMUT କ୍ୟାଡରର IAS ଅଧିକାରୀ ତାଲୋ ପୋଟମଙ୍କ ନାଁ ଚର୍ଚ୍ଚାକୁ ଆସିଛି ।

ରିପୋର୍ଟ ଅନୁସାରେ, IAS ଅଧିକାରୀ ତାଲୋ ପୋଟମଙ୍କ ବିରୋଧରେ ଏକ ଲୁକଆଉଟ୍ ନୋଟିସ୍ ଜାରି କରାଯାଇଥିଲା। ତାଙ୍କ ବିରୋଧରେ ଯୌନ ନିର୍ଯାତନା ଏବଂ ଆତ୍ମହତ୍ୟା ପାଇଁ ଉସକାଇବା ଭଳି ଗମ୍ଭୀର ଅଭିଯୋଗ ରହିଛି। ଗ୍ରାମୀଣ ନିର୍ମାଣ ବିଭାଗ (RWD)ର ଜଣେ ଇଞ୍ଜିନିୟର ଲିକୱାଙ୍ଗ ଲୋୱାଙ୍ଗ ମଧ୍ୟ ଏହି ମାମଲାରେ ଜଡ଼ିତ। ଲୁକ୍‌ ଆଉଟ ନୋଟିସ୍ ବାହାରିବା ପରେ, IAS ଅଧିକାରୀ ତାଲୋ ପୋଟମ ଆତ୍ମସମର୍ପଣ କରିଛନ୍ତି। ଏହି ମାମଲା କେବଳ ପ୍ରଶାସନିକ ସେବାର ମର୍ଯ୍ୟାଦା ଉପରେ ପ୍ରଶ୍ନ ଉଠାଇ ନାହିଁ ବରଂ ସରକାରୀ ବ୍ୟବସ୍ଥା ମଧ୍ୟରେ ଦାୟିତ୍ୱ ଏବଂ ନୀତିଶାସ୍ତ୍ରର ପ୍ରସଙ୍ଗଗୁଡ଼ିକ ମଧ୍ୟ ପୁଣି ଥରେ ଚର୍ଚ୍ଚାକୁ ଆସିଛି ।

IAS ତାଲୋ ପୋଟମ୍ କିଏ ?

IAS ତାଲୋ ପୋଟମ୍ AGMUT କ୍ୟାଡରର ୨୦୧୬ ବ୍ୟାଚ୍ ଅଧିକାରୀ। ସେ ଅରୁଣାଚଳ ପ୍ରଦେଶରୁ ତାଙ୍କର କ୍ୟାରିଅର ଆରମ୍ଭ କରିଥିଲେ ଏବଂ ମୁଖ୍ୟତଃ ରାଜ୍ୟ ରାଜଧାନୀ ଇଟାନଗରରେ ବିଭିନ୍ନ ପଦବୀରେ କାର୍ଯ୍ୟ କରିଥିଲେ । ତାଙ୍କ ପ୍ରଶାସନିକ କ୍ୟାରିଅରରେ ସେ ଜଣେ ଦକ୍ଷ, କଠୋର ଏବଂ ନିର୍ଣ୍ଣାୟକ ଅଧିକାରୀ ଭାବରେ ବେଶ ଜଣାଶୁଣା । ପରେ ତାଙ୍କୁ ଦିଲ୍ଲୀ ସରକାରରେ ନିଯୁକ୍ତି ଦିଆଯାଇଥିଲା, ଯେଉଁଠାରେ ସେ ପବ୍ଲିକ୍ ୱାର୍କସ୍ ବିଭାଗ (PWD)ରେ ସ୍ୱତନ୍ତ୍ର ସଚିବ ଭାବରେ କାର୍ଯ୍ୟ କରିଥିଲେ।

ତାଲୋ ପୋଟମ୍ ୯ ଜାନୁଆରୀ ୧୯୭୨ ରେ ଅରୁଣାଚଳ ପ୍ରଦେଶରେ ଜନ୍ମଗ୍ରହଣ କରିଥିଲେ। ସିଭିଲ୍ ଇଞ୍ଜିନିୟରିଂରେ ବି.ଟେକ୍ ଡିଗ୍ରୀ ହାସଲ କରିବା ପରେ, ସେ ଆଇନ (LLB) ଅଧ୍ୟୟନ କରିଥିଲେ। ବୈଷୟିକ ଏବଂ ଆଇନଗତ ଜ୍ଞାନର ଏହି ମିଶ୍ରଣ ତାଙ୍କୁ ପ୍ରଶାସନିକ କାର୍ଯ୍ୟରେ ସନ୍ତୁଳନ ରଖିବାରେ ଖୁବ୍‌ ସହାୟ ହୋଇଥିଲା ।

ଅନ୍ୟପଟେ ଏହି ଘଟଣା ଯିଏ ବି ଶୁଣୁଛି ସିଏ ଆଶ୍ଚର୍ଯ୍ୟ ହେଉଛି । କାରଣ ସମାଜକୁ ସୁଧାରିବା ଓ ସଠିକ୍ ଦିଗରେ ନେବାକୁ ଥିବା ଲୋକ ଯଦି ଏମିତି କରିବ, ତେବେ ସାଧାରଣ ଲୋକଟିଏ କାହାକୁ ବିଶ୍ୱାସ କରିବ ? ଯଦି IAS ଅଫିସର ନ୍ୟାୟ ଦେଇପାରିବେନି ତେବେ ସାଧାରଣ ଲୋକ କାହାକୁ ଗୁହାରି କରିବେ ?