ପ୍ରାୟ ୨୦ ଦିନ ପରେ କାଶ୍ମୀର ଘାଟିରେ ସ୍ବାଭାବିକ ହୋଇଛି ଜୀବନଯାତ୍ରା । ଖୋଲିଛି ବଜାର, ଫେରିଛି ଲୋକଙ୍କ ଆତ୍ମବିଶ୍ବାସ । ଦୂର ହୋଇଛି ପାକିସ୍ତାନ ପଟୁ ଗୁଳିମାଡ଼ର ଆତଙ୍କ । LoC ନିକଟବର୍ତ୍ତୀ ଅଞ୍ଚଳକୁ ଛାଡ଼ି ମଙ୍ଗଳବାରଠୁ ଜମ୍ମୁ କାଶ୍ମୀରର ପ୍ରାୟ ସବୁ ଶିକ୍ଷାନୁଷ୍ଠାନ ଖୋଲିଛି । ସୋମବାରଠୁ ଆଭ୍ୟନ୍ତରୀଣ ଅଞ୍ଚଳରେ ସ୍କୁଲ ଖୋଲିବାକୁ ପ୍ରଶାସନ ଅନୁମତି ଦେଇଥିଲା । ପହଲଗାମ ହମଲା ପରଠାରୁ ବନ୍ଦ ହୋଇଥିବା ପହଲଗାମ ବଜାର ସମେତ କୁପୱାରା, ପୁଲୱାମା, ଉରୀ, ପୁଞ୍ଛ, ଜମ୍ମୁ, ଗାନ୍ଧିଧାମରେ ଲୋକଙ୍କ ଭିଡ଼ ଦେଖିବାକୁ ମିଳିଛି । ଭାରତ-ପାକ୍ ଅସ୍ତ୍ରବିରତି ଘୋଷଣା ପରେ ସୀମାବର୍ତ୍ତୀ ଅଞ୍ଚଳରେ ଜୀବନ ବଞ୍ଚାଇବାକୁ ଘର ଛାଡ଼ିଥିବା ଲୋକଙ୍କୁ ଘରକୁ ଫେରିଆସିବାକୁ ଅପିଲ କରିଛନ୍ତି ଜମ୍ମୁ କାଶ୍ମୀର ମୁଖ୍ୟମନ୍ତ୍ରୀ । ପାକ୍ ମୋର୍ଟାର ଓ ଗୁଳିମାଡ଼ ପରେ ପ୍ରାୟ ୮୦ ପ୍ରତିଶତ ଲୋକ ଘର ଛାଡ଼ଥିଲେ ।

ସେହିପରି ପାକିସ୍ତାନ ସୀମାବର୍ତ୍ତୀ ପଞ୍ଚାବ, ରାଜସ୍ଥାନ ଓ ଗୁଜରାଟରେ ମଧ୍ୟ ସ୍ଥିତି ସ୍ବାଭାବିକ ହୋଇଛି । ପଠାନକୋଟ, ଜୈସଲମେର, ଜାମନଗର ସମେତ ସୀମାବର୍ତ୍ତୀ ଜିଲ୍ଲା ଗୁଡ଼ିକରୁ କଟକଣା ହଟାଇ ଦିଆଯାଇଛି । ସର୍ବାଧିକ ପ୍ରଭାବିତ ପୁଞ୍ଛ ଜିଲ୍ଲାରେ ଜୀବନଯାତ୍ରା ସ୍ବାଭାବିକ ହୋଇଥିବାରୁ ସରକାରଙ୍କୁ ଧନ୍ୟବାଦ ଦେଇଛନ୍ତି ସ୍ଥାନୀୟ ବାସିନ୍ଦା । ଆନ୍ତର୍ଜାତିକ ସୀମାବର୍ତ୍ତୀ କଠୁଆ ଜିଲ୍ଲା ପ୍ରଶାସନ ସହ ବୈଠକ କରିବା ସହିତ ସ୍ଥାନୀୟ ଲୋକଙ୍କୁ ଭେଟିଛନ୍ତି କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ । ସୀମାବର୍ତ୍ତୀ ଲୋକଙ୍କ ଜୀବନ ସୁରକ୍ଷିତ କରିବା ସହ ସେମାନଙ୍କ ଜୀବନ ଧାରଣ ମାନରେ ଉନ୍ନତିକୁ ପ୍ରଧାନମନ୍ତ୍ରୀ ମୋଦି ପ୍ରାଥମିକତା ଦେଉଥିବା କହିଛନ୍ତି କେନ୍ଦ୍ରମନ୍ତ୍ରୀ । LoCରେ ପାକ ଗୁଳିମାଡ଼ରେ ଆହତଙ୍କୁ ସୋମବାର ମୁଖ୍ୟମନ୍ତ୍ରୀ ଭେଟିଥିବାବେଳେ ମଙ୍ଗଳବାର କେନ୍ଦ୍ରମନ୍ତ୍ରୀ ଭେଟିଛନ୍ତି । ପହଲଗାମ ହାମଲା ପରେ ଭାରତୀୟ ସେନାର ପାଲଟା ଜବାବରେ ବିଚଳିତ ପାକିସ୍ତାନ ସେନା LoC ନିକଟ ସାଧାରଣ ନାଗରିକଙ୍କୁ କରିଥିଲା ଟାର୍ଗେଟ୍ ।

ଏଥିରେ ୧୯ ଜଣଙ୍କ ଜୀବନ ଯାଇଥିବାବେଳେ ଏବେବି ବିଭିନ୍ନ ହସପିଟାଲରେ 59 ଜଣଙ୍କ ଚିକିତ୍ସା ଜାରି ରହିଛି । ପାକ୍ ଗୁଳିମାଡ଼ରେ କ୍ଷତିଗ୍ରସ୍ତ ଘର ଗୁଡ଼ିକର ମରାମତି ଯୁଦ୍ଧକାଳୀନ ଭିତ୍ତିରେ ଜାରି ରହିଛି । ହୋଟେଲ, ରେସ୍ତୋରା, ପାର୍କ ଖୋଲିବା ସହ ବିମାନ ବନ୍ଦରରୁ ଉଡାଣ ସ୍ବାଭାବିକ ହୋଇଛି । ସୀମାରେ ସଜାଗ ଭାରତୀୟ ଯବାନ । ପାଖାପାଖି ଗୋଟିଏ ସପ୍ତାହ ଧରି ଜମ୍ମୁ କାଶ୍ମୀରରେ ଲାଗି ରହିଥିବା ଯୁଦ୍ଧ ସ୍ଥିତିରେ ବିରାମ ହୋଇଛି । ସୀମାପାର ଗୁଳିମାଡ଼ ପ୍ରାୟ ବନ୍ଦ ହୋଇଛି । ଜମ୍ମୁ କାଶ୍ମୀର ସମେତ ସୀମାବର୍ତ୍ତୀ ରାଜ୍ୟରେ ସେନା ମୁତୟନ ହୋଇଛନ୍ତି । ଅପରେସନ ସିନ୍ଦୁରର ସଫଳତା ଦେଶବାସୀଙ୍କ ମନରେ ନୂଆ ଆତ୍ମବିଶ୍ବାସ ଭରିଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more