ଅହମ୍ମଦାବାଦରେ ଭୟଙ୍କର ବିମାନ ଦୁର୍ଘଟଣା ପୁରା ଦେଶକୁ ସ୍ତବ୍ଧ କରିଦେଇଛି । ବିମାନରେ 242 ଜଣ ଯାତ୍ରୀ ଏବଂ କ୍ରୁ ସଦସ୍ୟ ଥିଲେ। ଏଥିରେ 169 ଭାରତୀୟ, 53 ଜଣ ବ୍ରିଟିଶ, ଜଣେ କାନାଡିଆନ ଏବଂ 7 ଜଣ ପର୍ତ୍ତୁଗୀଜ ନାଗରିକ ଅନ୍ତର୍ଭୁକ୍ତ ଥିବା ଜଣାପଡିଛି । ବିମାନରେ ଥିବା ସମସ୍ତ ଯାତ୍ରୀଙ୍କ ମୃତ୍ୟୁ ଆଶଙ୍କା କରାଯାଉଛି ।

ସେହିପରି ବିମାନ ଦୁର୍ଘଟଣାରେ ୫ ଡାକ୍ତରୀ ଛାତ୍ରଙ୍କ ମୃତ୍ୟୁ ହୋଇଛି । ଯେଉଁଥିରେ ୪ UG ଓ ଜଣେ PG ଛାତ୍ରଙ୍କ ମୃତ୍ୟୁ ହୋଇଛି । ହଷ୍ଟେଲରେ ବିମାନ ଧକ୍କା ହୋଇଥିବାରୁ ମୃତ୍ୟୁ ହୋଇଥିବା କୁହାଯାଉଛି ।

ଦୁର୍ଘଟଣା ପରେ, ଅହମ୍ମଦାବାଦର ସର୍ଦ୍ଦାର ବଲ୍ଲଭଭାଇ ପଟେଲ ଅନ୍ତର୍ଜାତୀୟ ବିମାନବନ୍ଦରରେ ବିମାନ ଚଳାଚଳ ବନ୍ଦ କରାଯାଇଛି । ଆହତମାନଙ୍କୁ ନିକଟସ୍ଥ ହସ୍ପିଟାଲକୁ ନିଆଯାଉଛି । ଏୟାର ଇଣ୍ଡିଆ ଯାତ୍ରୀମାନଙ୍କ ପାଇଁ ଏକ ହେଲ୍ପଲାଇନ୍ ନମ୍ବର 1800 5691 444 ଜାରି କରିଛି । ଏହି ଘଟଣାର ତଦନ୍ତରେ ଏୟାର ଇଣ୍ଡିଆ କର୍ତ୍ତୃପକ୍ଷଙ୍କୁ ପୂର୍ଣ୍ଣ ସହଯୋଗ କରୁଛି।

ଏହି ବିମାନଟି ଅପରାହ୍ନ 1:38 ରେ ଅହମ୍ମଦାବାଦରୁ ଉଡ଼ାଣ କରିଥିଲା। ବିମାନଟି ଏକ ବୋଇଂ 787-8 ଥିଲା।

DGCA ତରଫରୁ କୁହାଯାଇଛି ଯେ, ଦୁର୍ଘଟଣାର କିଛି ସମୟ ପୂର୍ବରୁ ଆସନ୍ନ ବିପଦ ଜାଣିପାରି ମେ ଡେ କଲ୍ କରିଥିଲେ ପାଇଲଟ୍ । ବିମାନଟି MAYDAY ରେ ATC କୁ ଫୋନ୍ କରିଥିଲା। କିନ୍ତୁ ତା'ପରେ ATC ଦ୍ୱାରା କରାଯାଇଥିବା ଫୋନ୍ ର କୌଣସି ଉତ୍ତର ମିଳିଲା ନାହିଁ। ରନୱେ 23 ରୁ ଉଡ଼ାଣ ଆରମ୍ଭ କରିବା ପରେ ତୁରନ୍ତ ବିମାନଟି ବିମାନବନ୍ଦର ସୀମା ବାହାରେ ହିଁ ଗଳିପଡିଲା । ଆଉ ତା ପରେ ପୁରା ଆକାଶ ଧୂଆଁମୟ ।

ପାଇଲଟଙ୍କ ପାଖରେ ମାତ୍ର ୧ ମିନିଟ୍ ସମୟ ଥିଲା, କିନ୍ତୁ ବିମାନଟି ଏତେ କମ୍ ଉଚ୍ଚତାରେ ଥିଲା ଯେ ଏହା ଗଛ ସହିତ ଧକ୍କା ହୋଇଥିଲା। ଅର୍ଥାତ୍ ଦୁର୍ଘଟଣା ନିଶ୍ଚିତ ଥିଲା। କୁହାଯାଉଛି ଯେ ଏହାର ପଛ ଅଂଶ ଧକ୍କା ଦେଇଥିଲା, ଯାହା ଯୋଗୁଁ ବିମାନରେ ନିଆଁ ଲାଗିଯାଇଥିଲା। ତଥାପି, ଏହାର ତଦନ୍ତ ଏବେ ବି ଚାଲିଛି ।

ହେଲେ ଏହି 'Mayday କଲ୍' କ'ଣ ?

Mayday କଲ୍ ଏକ ଜରୁରୀକାଳୀନ ସଙ୍କେତ । ଏହା ଜୀବନ ବଞ୍ଚାଇବା ପାଇଁ ବ୍ୟବହୃତ ହୁଏ । ଏହା ବିଶେଷକରି ବିମାନ ଏବଂ ସମୁଦ୍ର ଜାହାଜରେ ବ୍ୟବହୃତ ହୁଏ । ଏହା ଅଗ୍ନି କିମ୍ବା ପୋଲିସ କାର୍ଯ୍ୟାନୁଷ୍ଠାନ ସମୟରେ ମଧ୍ୟ ବ୍ୟବହୃତ ହୁଏ । ଜରୁରୀକାଳୀନ ପରିସ୍ଥିତିରେ, 'Mayday Mayday' ଲଗାତାର ତିନିଥର କୁହାଯାଏ । ଏହି କଲ୍ ଅନ୍ୟ ବାର୍ତ୍ତାଠାରୁ ଭିନ୍ନ । ଆମେରିକା ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ (FAA) ଅନୁଯାୟୀ, ଏହାର ଏକ ସ୍ଥିର ଫର୍ମାଟ୍ ଅଛି । ଏହି ଫର୍ମାଟରେ ମେଡେ କଲ୍, ଷ୍ଟେସନ୍ ନାମ, ବିମାନ କଲ୍ ସାଇନ୍, ଜରୁରୀକାଳୀନ ପ୍ରକାର, ପାଣିପାଗ, ପାଇଲଟ୍‌ଙ୍କ ଅନୁରୋଧ, ସ୍ଥିତି, ଉଚ୍ଚତା, ଇନ୍ଧନ ଏବଂ ଯାତ୍ରୀଙ୍କ ସଂଖ୍ୟା ଭଳି ସୂଚନା ଅନ୍ତର୍ଭୁକ୍ତ ।

Argus News | argus news | -Argusnews Home: Odisha Latest News, Breaking News, Trending News, Live TV and more