୨୦୨୫ ବିହାର ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚି ସାରିଛି । ଏହାର ସମୀକ୍ଷା କରିବା ପାଇଁ ଭାରତୀୟ ନିର୍ବାଚନ କମିଶନ ଦୁଇ ଦିନିଆ ବିହାର ଗସ୍ତରେ ଯାଇଛନ୍ତି। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର ଏବଂ ଦଇ ନିର୍ବାଚନ କମିଶନର ଡକ୍ଟର ସୁଖବୀର ସିଂହ ସାନ୍ଧୁ ଓ ଡକ୍ଟର ବିବେକ ଯୋଶୀ ଶୁକ୍ରବାର ରାତି ୧୦ଟାରେ ପାଟନାରେ ପହଞ୍ଚିଛନ୍ତି। ଶନିବାର, ସିଇସି ଜ୍ଞାନେଶ କୁମାର ପ୍ରଥମେ ରାଜନୈତିକ ଦଳର ପ୍ରତିନିଧିମାନଙ୍କ ସହିତ ଏକ ବୈଠକ କରିବେ। ଏହି ବୈଠକରେ ସ୍ୱୀକୃତିପ୍ରାପ୍ତ ଜାତୀୟ ଏବଂ ରାଜ୍ୟ ଦଳର ପ୍ରତିନିଧିମାନଙ୍କ ସହିତ ଆଲୋଚନା କରାଯିବ। ଏହା ପରେ ପୋଲିସ ଏବଂ ପ୍ରଶାସନିକ ଅଧିକାରୀଙ୍କ ସହିତ ମଧ୍ୟ ଗୁରୁତ୍ୱପୂର୍ଣ୍ଣ ବୈଠକ କରିବେ କେନ୍ଦ୍ରୀୟ ଦଳ ।

ରାଜନୈତିକ ଦଳଗୁଡ଼ିକ ସହିତ ନିର୍ବାଚନ କମିଶନଙ୍କ ବୈଠକ ପାଟନାର ହୋଟେଲ ତାଜରେ ଅନୁଷ୍ଠିତ ହେବ। ବିଜେପି, କଂଗ୍ରେସ, ଜେଡିୟୁ, ଆରଜେଡି, ଏଲଜେପି-ଆର, ଆରଏଲଏସପି, ସିପିଏମ, ସିପିଆଇ(ଏମଏଲ), ଆପ, ବିଏସପି ଏବଂ ଅନ୍ୟାନ୍ୟ ଦଳର ପ୍ରତିନିଧିମାନଙ୍କୁ ନିମନ୍ତ୍ରଣ କରାଯାଇଛି। ପ୍ରତ୍ୟେକ ଦଳର ସର୍ବାଧିକ ତିନି ଜଣ ସଦସ୍ୟ ଉପସ୍ଥିତ ରହିବେ। ନିର୍ବାଚନ କମିଶନ, ରାଜନୈତିକ ଦଳଗୁଡ଼ିକଠାରୁ ପରାମର୍ଶ ନେବେ ବୋଲି ସୂଚନା ରହିଛି ।

ଶନିବାର କେନ୍ଦ୍ରୀୟ ଟିମ୍, ବିଭାଗୀୟ କମିଶନର ଏବଂ ସମସ୍ତ ଜିଲ୍ଲା ନିର୍ବାଚନ ଅଧିକାରୀ ଏବଂ ପୋଲିସ ଅଧୀକ୍ଷକଙ୍କ ସହିତ ମଧ୍ୟ ବୈଠକ କରିବେ। ଏହି ବୈଠକରେ ନିର୍ବାଚନ ପ୍ରସ୍ତୁତିର ସମୀକ୍ଷା କରାଯିବ।

ରବିବାର, ପ୍ରବର୍ତ୍ତନ ସଂସ୍ଥାଗୁଡ଼ିକର ନୋଡାଲ ଅଧିକାରୀମାନଙ୍କ ସହିତ ନିର୍ବାଚନ କମିଶନ ସାକ୍ଷାତ କରିବେ। ଏହାପରେ ବିହାରର ମୁଖ୍ୟ ନିର୍ବାଚନ ଅଧିକାରୀ, ରାଜ୍ୟ ପୋଲିସ ନୋଡାଲ ଅଧିକାରୀ ଏବଂ କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀର ନୋଡାଲ ଅଧିକାରୀଙ୍କ ସହିତ ବୈଠକ କରାଯିବ। ବିହାରର ମୁଖ୍ୟ ସଚିବ, ପୋଲିସ ମହାନିର୍ଦ୍ଦେଶକ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀଙ୍କ ସହିତ ତୃତୀୟ ବୈଠକ ଅନୁଷ୍ଠିତ ହେବ। ଏଥିରେ ନିର୍ବାଚନ-ସମ୍ବନ୍ଧୀୟ ସମନ୍ୱୟ ଏବଂ ବ୍ୟବସ୍ଥାର ସମୀକ୍ଷା କରାଯିବ।

ଶେଷରେ, ଏପର୍ଯ୍ୟନ୍ତ ପ୍ରସ୍ତୁତି ସମ୍ପର୍କରେ ସୂଚନା ଗଣମାଧ୍ୟମ ସହିତ ସେୟାର କରାଯିବ। ସିଇସି ଜ୍ଞାନେଶ କୁମାର ଏବଂ ତାଙ୍କ ଦଳ ତା’ପରେ ଦିଲ୍ଲୀ ଫେରିଯିବେ। କମିଶନ ପାଟନାରୁ ଫେରିବା ପରେ ଯେକୌଣସି ସମୟରେ ବିହାର ନିର୍ବାଚନ ତାରିଖ ଘୋଷଣା କରାଯାଇପାରେ ବିଶେଷ ସୂତ୍ରରୁ ଜଣାପଡ଼ିଛି ।

ଅନ୍ୟପଟେ ବିହାର ଭୋଟ୍ ପାଇଁ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ରଙ୍କୁ ବଡ଼ ଦାୟିତ୍ଵ ଦେଇଛି କେନ୍ଦ୍ରୀୟ ବିଜେପି । କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ବିହାର ବିଧାନସଭା ନିର୍ବାଚନ ଲାଗି ବିଜେପି ପ୍ରଭାରୀ ନିଯୁକ୍ତ କରିଛି । ଧର୍ମେନ୍ଦ୍ରଙ୍କ ସହ ଆଉ ୨ ନେତାଙ୍କୁ ଦଳ ସହ ପ୍ରଭାରୀ ଦାୟିତ୍ଵ ଦେଇଛି । ସିଆର୍ ପାଟିଲ୍ ଓ କେଶବ ପ୍ରସାଦ ମୌର୍ଯ୍ୟଙ୍କୁ ବିଜେପି ବିହାର ସହ-ପ୍ରଭାରୀ ନିଯୁକ୍ତ କରିଛି ।

ପୂର୍ବରୁ କେନ୍ଦ୍ରମନ୍ତ୍ରୀ ତଥା ବରିଷ୍ଠ ବିଜେପି ନେତା ଧର୍ମେନ୍ଦ୍ର ପ୍ରଧାନଙ୍କୁ ଦଳ ଏକାଧିକ ରାଜ୍ୟରେ ନିର୍ବାଚନ ପ୍ରଭାରୀ ନିଯୁକ୍ତ କରିଥିବା ବେଳେ ସଫଳତା ମିଳିଛି । ଉତ୍ତରପ୍ରଦେଶ, ହରିୟାଣାରେ ଧର୍ମେନ୍ଦ୍ର ପ୍ରଧାନ ନିର୍ବାଚନ ପ୍ରଭାରୀ ରହିଥିବା ବେଳେ ବିଜେପି ସେଠାରେ ଜିତି ସରକାର ଗଢ଼ିଥିଲା । ୨୦୧୪ ଲୋକସଭା ନିର୍ବାଚନରେ ବିହାର ପ୍ରଭାରୀ ଥିଲେ ଧର୍ମେନ୍ଦ୍ର, ଆଉ ବିଜେପି ବଡ଼ ସଫଳତା ପାଇଥିଲା । ୨୦୧୦ ଓ ୨୦୧୫ରେ ବିହାର ଦାୟିତ୍ଵରେ ଥିଲେ ଧର୍ମେନ୍ଦ୍ର ପ୍ରଧାନ । ମଧ୍ୟପ୍ରଦେଶ ଓ କର୍ଣ୍ଣାଟକ ବିଧାନସଭା ନିର୍ବାଚନରେ ବି ଧର୍ମେନ୍ଦ୍ର ପ୍ରଧାନଙ୍କ ଭୂମିକା ଗୁରୁତ୍ଵପୂର୍ଣ୍ଣ ରହିଥିଲା ।