ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଲେ ପ୍ରତିନିଧି ମଣ୍ଡଳୀ । ବିଶ୍ବର ୩୩ଟି ଦେଶକୁ ଯାଇ ଅପରେସନ୍ ସିନ୍ଦୂରର ବାର୍ତ୍ତା ରଖିଥିବା ୭ ପ୍ରତିନିଧି ଦଳ ସଦସ୍ୟଙ୍କ ସହ କଥା ହୋଇଛନ୍ତି ମୋଦି । ପ୍ରତିନିଧି ଦଳ ସଦସ୍ୟଙ୍କଠାରୁ ନେଇଛନ୍ତି ଫିଡବ୍ୟାକ୍ । ଅପରେସନ ସିନ୍ଦୁର ମାଧ୍ୟମରେ ବିଶ୍ବକୁ ବଡ଼ ବାର୍ତ୍ତା ଦେବାରେ ସଫଳ ହୋଇଛନ୍ତି ପ୍ରତିନିଧି ମଣ୍ଡଳୀ । ଆଜି କୋଭିଡ ଟେଷ୍ଟ ପରେ ପ୍ରତିନିଧି ମଣ୍ଡଳୀ ସଦସ୍ୟ ପ୍ରଧାନମନ୍ତ୍ରୀଙ୍କ ବାସଭବନରେ ହୋଇଥିବା ବୈଠକରେ ହୋଇଥିଲେ ସାମିଲ । ଅପରେସନ୍ ସିନ୍ଦୂରର ସଫଳତା ପରେ ବିଦେଶ ଯାଇ ପାକିସ୍ତାନର ମୁଖା ଖୋଲିଛନ୍ତି ସାଂସଦ, ପୂର୍ବତନ ସାଂସଦ, କୁଟନୀତିଜ୍ଞ ଓ ରାଜନୀତି ରଣନୀତିକାର । ପାକିସ୍ତାନ ଆତଙ୍କବାଦୀଙ୍କୁ ସିଧା ପ୍ରୋତ୍ସାହନ ଦେବାର ତଥ୍ୟ ଉପସ୍ଥାପନ ସହ ପାକିସ୍ତାନର ଅସଲ ଚେହେରା ଉପରୁ ହଟାଇଛନ୍ତି ପରଦା ।

ପ୍ରତିନିଧିମଣ୍ଡଳୀ ଆତଙ୍କବାଦର ସମସ୍ତ ରୂପ ସହ ଲଢ଼େଇ କରିବା ପାଇଁ ଭାରତର ରାଷ୍ଟ୍ରୀୟ ସହମତି ଏବଂ ଦୃଢ଼ ଦୃଷ୍ଟିକୋଣ ରଖିଛନ୍ତି । ଏହି ଟିମ୍ ବିଶ୍ବ ଆଗରେ ଆତଙ୍କବାଦ ବିରୋଧରେ ଭାରତର ଶୂନ୍ୟ ସହନଶୀଳତା ବାର୍ତ୍ତା ଉପସ୍ଥାପନ କରିବାରେ ସଫଳ ହୋଇଛି । ବିଶ୍ବର ୩୩ଟି ଦେଶକୁ ଯାଇ ଅପରେସନ୍ ସିନ୍ଦୂରର ବାର୍ତ୍ତା ରଖିଛନ୍ତି ୭ଟି ପ୍ରତିନିଧି ଦଳର ପ୍ରାୟ ୫୦ ସଦସ୍ୟ । ରବିଶଙ୍କର ପ୍ରସାଦ, ଶଶି ଥରୁର, ସଞ୍ଜୟ ଝା, କାନିମୋଈ, ସୁପ୍ରିୟା ସୁଲେ, ଶ୍ରୀକାନ୍ତ ସିନ୍ଦେ ଓ ବୈଜୟନ୍ତ ପଣ୍ଡାଙ୍କ ନେତୃତ୍ବରେ ୭ଟି ପ୍ରତିନିଧି ଦଳ ୩୩ଟି ଦେଶକୁ ଗସ୍ତ କରିଥିଲେ । ପ୍ରତ୍ୟେକ ପ୍ରତିନିଧି ମଣ୍ଡଳୀ 5ଟି ଲେଖାଏ ଦେଶ ଗସ୍ତ କରିଥିଲେ । ମେ 23ରୁ ଆରମ୍ଭ ହୋଇଥିଲା ଏହି ଗସ୍ତ କାର୍ଯ୍ୟକ୍ରମ ।

ବିଶ୍ବ ଆଗରେ ଖୋଲି ସାରିଛି ପାକିସ୍ତାନର ଅସଲ ମୁଖା। ଅପରେସନ ସିନ୍ଦୂର ପରେ ପାକିସ୍ତାନ ଉପରେ କୂଟନୈତିକ ପ୍ରହାରରେ ଭାଙ୍ଗିଛି ଆତଙ୍କୀଙ୍କ ଅଣ୍ଟା । ଏପରି ପ୍ରଥମ ଥର ହୋଇଛି, ଭାରତ ସରକାର ପାକିସ୍ତାନ ପ୍ରାୟୋଜିତ ଆତଙ୍କବାଦ ପ୍ରସଙ୍ଗରେ ଭାରତର ଆଭିମୁଖ୍ୟ ବିଶ୍ବ ସାମ୍ନାରେ ଉପସ୍ଥାପନ କରିବା ପାଇଁ ବିଭିନ୍ନ ଦଳର ସାଂସଦଙ୍କ ପ୍ରତିନିଧିମଣ୍ଡଳୀକୁ ସାରା ବିଶ୍ବକୁ ପଠାଇଥିଲେ ।