ଲୋକସଭାରେ ଆଗତ ହେଲା ସଂଶୋଧିତ ୱାକଫ୍ ବିଲ୍ । ଗୃହରେ ବିଲ୍ ଆଗତ କଲେ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ । ଗୃହରେ ବିଲ୍ ଉପସ୍ଥାପନ ପରେ ବିଲ୍ ଉପରେ ଆଲୋଚନା ଜାରି ରହିଛି । ତେବେ ବିଲକୁ ନେଇ ଲୋକସଭାରେ ଜୋରଦାର ହଙ୍ଗାମା ଦେଖିବାକୁ ମିଳିଛି । ଏହି ବିଲକୁ ନେଇ ପ୍ରଥମେ ଆପତ୍ତି ଉଠାଇଥିଲା କଂଗ୍ରେସ । ୮ଘଣ୍ଟା ଧରି ବିଲ୍ ଉପରେ ହେବ ଚର୍ଚ୍ଚା । NDA ସହଯୋଗୀ ଜନସେନା, ରାଷ୍ଟ୍ରୀୟ ଲୋକ ଦଳ ସମର୍ଥନ ଘୋଷଣା କରିଛନ୍ତି । ବିଲ୍‌ ଉପରେ ଆଲୋଚନା ପାଇଁ ୮ ଘଣ୍ଟା ସମୟ ଧାର୍ଯ୍ୟ କରାଯାଇଥିବା ବେଳେ ବିଜନେସ ଆଡଭାଇଜରୀ କମିଟି ବୈଠକରେ ବିରୋଧୀଙ୍କ ପକ୍ଷରୁ ୧୨ ଘଣ୍ଟା ଚର୍ଚ୍ଚା ପାଇଁ ଦାବି କରାଯାଇଥିଲା । ଯଦି ଆବଶ୍ୟକ ପଡ଼େ ଆଲୋଚନା ସମୟ ବଢିପାରେ ବୋଲି କହିଛନ୍ତି ସଂସଦୀୟ ବ୍ୟାପାର ମନ୍ତ୍ରୀ ।

ଆଜି ହିଁ ଲୋକସଭାରେ ବିଲ୍ ପାସ କରାଇବାକୁ ଲକ୍ଷ୍ୟ ରଖିଛନ୍ତି ମୋଦି ସରକାର। ଏହାପରେ ବିଲକୁ ରାଜ୍ୟସଭାରେ ବି ଉପସ୍ଥାପନ କରାଯିବ । ବିଜେପି ନିଜ ସାଂସଦ ମାନଙ୍କୁ ଆଜି ପୁରା ସମୟ ଗୃହରେ ଉପସ୍ଥିତ ରହିବାକୁ ହ୍ବିପ୍ ଜାରି କରିଛି । ଏପ୍ରିଲ ୪ରେ ସଂସଦର କାର୍ଯ୍ୟକାଳ ଶେଷ ହେଉଥିବାରୁ, ଏହା ପୂର୍ବରୁ ବିଲକୁ ଉଭୟ ସଦନରେ ପାସ କରାଇବାକୁ ଚାହୁଁଛନ୍ତି କେନ୍ଦ୍ର ସରକାର ।

୧୯୫୪ ମସିହାରେ ତତକାଳୀନ ଜବାହାରଲାଲ ନେହରୁ ସରକାର ଓ୍ବାକଫ୍ ଆଇନ୍ ଆଣିଥିଲେ । ୧୯୯୫ ମସିହାରେ ଏଥିରେ ସଂଶୋଧନ ଅଣାଯାଇ ସବୁ ରାଜ୍ୟରେ ଓ୍ବାକଫ୍ ବୋର୍ଡ ଗଠନ କରାଯାଇଥିଲା । ଅନେକ ସମ୍ପତ୍ତିକୁ ବିନା ଅନୁମତିରେ ଜବରଦଖଲ କରିବା ନେଇ ଅଭିଯୋଗ ପରେ ଏହାର କାର୍ଯ୍ୟପ୍ରଣାଳୀକୁ ନେଇ ସୃଷ୍ଟି ହୋଇଥିଲା ବଡ଼ ପ୍ରଶ୍ନ । ତେଣୁ ୮ ଅଗଷ୍ଟ ୨୦୨୪ରେ ଲୋକସଭାରେ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ ୱାକଫ୍ ବୋର୍ଡ଼ ସଂଶୋଧନ ବିଧେୟକ ଉପସ୍ଥାପନ କରି ଏହାକୁ ଜେପିସିକୁ ପଠାଇବାକୁ ପ୍ରସ୍ତାବ ଦେଇଥିଲେ ।

ୱାକଫ୍‌ ବିଲ୍ ପାସ୍ ହେବା ପରେ ୧୦ଟି ବଡ଼ ପରିବର୍ତ୍ତନ କଣ ହେବ
ଇସଲାମ ଧର୍ମ ଗ୍ରହଣର ୫ ବର୍ଷ ହୋଇନଥିଲେ ୱାକଫ୍‌ ବୋର୍ଡକୁ ଆପଣ ସମ୍ପତ୍ତି ଦାନ କରିପାରିବେ ନାହିଁ । କେବଳ ନିଜ ନାମରେ ପଞ୍ଜୀକରଣ ହୋଇଥିବା ଜମିକୁ ଦାନ କରିପାରିବେ । ୱାକଫ୍ ବୋର୍ଡ ଦ୍ବାରା ଅଧିକୃତ ଜମିରେ ମହିଳା ଉତ୍ତରାଧିକାରୀ ରହିପାରିବେ । ୱାକଫ୍ ବୋର୍ଡକୁ ଦିଆଯାଇଥିବା ସଂପତ୍ତିର ସମସ୍ତ ତଥ୍ୟ ୬ ମାସ ମଧ୍ୟରେ ଅନ୍‌ଲାଇନ୍‌ରେ ଉପଲବ୍ଧ ହେବ । ସରକାରୀ ସଂପତ୍ତି ଉପରେ ୱାକଫ୍‌ ବୋର୍ଡର ଅଧିକାର ରହିବ ନାହିଁ । କେନ୍ଦ୍ରୀୟ ୱାକଫ୍‌ ବୋର୍ଡରେ ୨ ଜଣ ଅଣ ମୁସଲିମ, ୨ ମୁସଲମାନ ମହିଳା ରହିବେ । ସାଂସଦ ଓ ପୂର୍ବତନ ବିଚାରପତିମାନଙ୍କ ପ୍ରତିନିଧି ମୁସଲମାନ ହେବା ଜରୁରୀ ନୁହଁ । ମୁସଲମାନଙ୍କ ୨ଟି ସଂପ୍ରଦାୟ ପାଇଁ ୨ଟି ବୋର୍ଡ ଗଠନ ହେବ । ୱାକଫ୍ ବୋର୍ଡର ନିଷ୍ପତ୍ତିକୁ ୯୦ ଦିନ ଭିତରେ ଚ୍ୟାଲେଞ୍ଚ କରିହେବ । କେନ୍ଦ୍ର ଓ ରାଜ୍ୟ ସରକାରଙ୍କ ପାଖରେ ବୋର୍ଡ ଖାତା ଅଡିଟ୍‌ର ଅଧିକାର ରହିବ । ୱାକଫ୍‌ ବୋର୍ଡ ସରକାରଙ୍କୁ ସମସ୍ତ ସୂଚନା ଦେବାକୁ ବାଧ୍ୟ ହେବେ ।

Argus News | argus news | -Argusnews Home: Odisha Latest News, Breaking News, Trending News, Live TV and more