ଅର୍ଗସ ବ୍ୟୁରୋ: ଜାମ୍ମୁ କାଶ୍ମୀରରେ ନୂଆ ସରକାର ଗଠନ ହେବା ପରେ ପୁଣି ଥରେ ଧାରା ୩୭୦କୁ ନେଇ ବଢିଛି ବିବାଦ । କେନ୍ଦ୍ର ସରକାର ଧାରା ୩୭୦କୁ ଉଠାଇଥିଲେ ୨୦୧୯ରେ । କିନ୍ତୁ ଏହାକୁ ଉଚ୍ଛେଦ କରିବାକୁ ଦାବି ହୋଇଛି । ବିଧାନସଭାର ତୃତୀୟ ଦିନର ଅଧିବେଶନରେ ଐତିହାସିକ ପ୍ରସ୍ତାବ ପାରିତ କରିଥିବା କହିଛି ନ୍ୟାସନାଲ କନଫେରେନ୍ସ । ନୂଆ ସରକାର କହିଛନ୍ତି, ଜମ୍ମୁକାଶ୍ମୀରର ହିତ ପାଇଁ ଧାରା ୩୭୦ ଉଚ୍ଛେଦ ଆବଶ୍ୟକ ରହିଛି । ଯାହାକୁ ନେଇ ଉଭୟ ଶାସକ ଓ ବିରୋଧୀ ମୁହାଁମୁହିଁ ହୋଇଥିଲେ । ଗୃହରେ ବିଜେପି କହିଛି, ଏହା ଦେଶ ବିରୋଧୀ ଏଜେଣ୍ଡା ।

ଧାରା ୩୭୦କୁ ପୁଣି ଥରେ ଜମ୍ମୁ ଓ କାଶ୍ମୀରରେ ଲାଗୁ କରିବା ପାଇଁ  ଆଓ୍ବାମୀ ଇତେହାଦ ପାର୍ଟି ବିଧାୟକ ଗୃହରେ ଦାବି କରିବା ସହ ପ୍ଲା-କାର୍ଡ ଦେଖାଇଥିଲେ । ଏହାକୁ ବିଜେପି ବିଧାୟକ ମାନେ ପ୍ରବଳ ବିରୋଧ କରିଥିଲେ । ବିଜେପି ସଦସ୍ୟମାନେ ଗୃହର ମଧ୍ୟଭାଗକୁ ଆସି ପ୍ରତିବାଦ କରିଥିଲେ । ବିଜେପି ବିଧାୟକ ତଥା ବିରୋଧୀ ଦଳ ନେତା ସୁନୀଲ ଶର୍ମା ଏଭଳି ଅସାମ୍ବିଧାନିକ ପଦକ୍ଷେପକୁ ଦୃଢ ନିନ୍ଦା କରିଥିଲେ । ଏହା ଦ୍ବାରା ଗୃହର ଗରିମା ନଷ୍ଟ ହେଉଥିବା କହିଥିଲେ ।  ବିଜେପିର ପ୍ରତିବାଦ ସତ୍ତ୍ବେ ପ୍ଲାକାର୍ଡ ନ ହଟାଇବାରୁ ଗୃହରେ ଶାସକ ଓ ବିରୋଧୀ ସଦସ୍ୟ ମୁହାଁମୁହିଁ ହୋଇଥିଲେ ।

୨୦୧୯ ମସିହାରେ କେନ୍ଦ୍ର ସରକାର ଧାରା ୩୭୦ ଉଠାଇ ଦେଇଥିଲେ । ଯାହାକୁ ନେଇ ସେହି ସମୟରେ ଶାସକ ଓ ବିରୋଧୀ ମୁହାଁମୁହିଁ ହୋଇଥିଲେ । ଏହି ନିଷ୍ପତ୍ତିକୁ କଂଗ୍ରେସ ଜୋରଦାର ବିରୋଧ କରିଥିଲା । ସଂସଦରେ ଜୋରଦାର ଆଲୋଚନା ହୋଇଥିଲା । କିନ୍ତୁ ପରେ ସଂସଦରେ ବିଲ୍‌ ପାସ୍‌ ହେବା ପରେ କାଶ୍ମୀରରୁ ଉଠିଥିଲା ଧାରା ୩୭୦ । ତେବେ ଧାରାକୁ ନେଇ ସୁପ୍ରିମକୋର୍ଟର ଦ୍ଵାରସ୍ଥ ହୋଇଥିଲେ ବିରୋଧୀ । କିନ୍ତୁ ସର୍ବୋଚ୍ଚ ନ୍ୟାୟାଳୟ ସ୍ପଷ୍ଟ କରିଥିଲେ, ସଂସଦର ନିଷ୍ପତ୍ତିରେ ସୁପ୍ରିମକୋର୍ଟ ହସ୍ତକ୍ଷେପ କରିପାରିବ ନାହିଁ । ଧାରା ୩୭୦ ଜାମ୍ମୁ-କାଶ୍ମୀରକୁ ଭାରତରେ ମିଶ୍ରଣ ପାଇଁ, ଏହାଏକ ବାଧା ନୁହେଁ ବୋଲି ରାୟରେ ସ୍ପଷ୍ଟ କରିଥିଲେ ସୁପ୍ରିମକୋର୍ଟଙ୍କ ଖଣ୍ଡପୀଠ ।

ଜାମ୍ମୁ-କାଶ୍ମୀରକୁ ନେଇ କେନ୍ଦ୍ର ସରକାର ଯେଉଁ ନିଷ୍ପତ୍ତି ନେଇଥିଲେ ତାହାକୁ କାଏମ ରଖିଥିଲେ ସୁପ୍ରିମକୋର୍ଟ । ସର୍ବୋଚ୍ଚ ନ୍ୟାୟାଳୟଙ୍କ ୫ ଜଣିଆ ଖଣ୍ଡପୀଠ କହିଥିଲେ, ଭାରତ ସହ ଜାମ୍ମୁ ଓ କାଶ୍ମୀରର ବିଲୟ ପ୍ରକ୍ରିୟାକୁ ସହଜ କରିବା ଲାଗି ଧାରା ୩୭୦ ଉଦ୍ଦିଷ୍ଟ ଥିଲା । ଏହା ସଂପୂର୍ଣ୍ଣ ଭାବେ ଅସ୍ଥାୟୀ ବ୍ୟବସ୍ଥା ଥିଲା ଏବଂ ଏହାକୁ ରାଷ୍ଟ୍ରପତି ଉଚ୍ଛେଦ କରିବାରେ କୌଣସି ଅସୁବିଧା ନାହିଁ । ଜାମ୍ମୁ ଓ କଶ୍ମୀର ଭାରତର ଅଙ୍ଗ ହୋଇଥିବାରୁ ଏଠାରେ ଭାରତୀୟ ସମ୍ବିଧାନର ସମସ୍ତ ବ୍ୟବସ୍ଥା ଲାଗୁ କରାଯାଇପାରିବ ବୋଲି କୋର୍ଟ ସ୍ପଷ୍ଟ କରିଥିଲେ । ଜାମ୍ମୁ କାଶ୍ମୀର ପୁନର୍ଗଠନକୁ ମଧ୍ୟ କୋର୍ଟ ବୈଧ ଦର୍ଶାଇଥିଲେ । ସେହିପରି ଲଦାଖକୁ କେନ୍ଦ୍ର ଶାସିତ ଅଞ୍ଚଳର ମାନ୍ୟତା ଦିଆଯିବାରେ କୌଣସି ଆଇନଗତ ବାଧା ନାହିଁ ବୋଲି ସ୍ପଷ୍ଟ କରିଥିଲେ ସୁପ୍ରିମକୋର୍ଟ । 

ସମ୍ବିଧାନର ଧାରା ୩୫୬ । ଅର୍ଥାତ୍‌ ରାଷ୍ଟ୍ରପତି ଶାସନ । ଏହି ସମୟରେ କେନ୍ଦ୍ର ସରକାର ଅନେକ ନିଷ୍ପତ୍ତି ନେଇପାରନ୍ତି । କିନ୍ତୁ ସବୁ ନିଷ୍ପତ୍ତିକୁ ଚ୍ୟାଲେଞ୍ଜ କରାଯାଇପାରିବ ନାହିଁ ବୋଲି ସୁପ୍ରିମକୋର୍ଟ ଶୁଣାଣିରେ କହିଥିଲେ । ମୋଟ୍‌ ଉପରେ ଏବେ ଇତିହାସ ପାଲଟିଛି ଧାରା-୩୭୦ । ୪ ବର୍ଷ ୪ ମାସ ୬ ଦିନ ପରେ କେନ୍ଦ୍ର ସରକାରଙ୍କ ନିଷ୍ପତି ଉପରେ ମୋହର ମାରିଥିଲେ ସୁପ୍ରିମକୋର୍ଟ । ଜମ୍ମୁ-କାଶ୍ମୀରରୁ ହଟାଯାଇଥିବା ଧାରା ୩୭୦କୁ କାଏମ ରଖିଥିଲେ ସୁପ୍ରିମକୋର୍ଟ । ଧାରା-୩୭୦ ଉଚ୍ଛେଦ ବୈଧ ବୋଲି କହିଥିଲେ ସର୍ବୋଚ୍ଚ ନାୟାଳୟ । ରାଷ୍ଟ୍ରପତିଙ୍କ ନିର୍ଦ୍ଦେଶକ୍ରମେ ୨୦୧୯ ଅଗଷ୍ଟ ୫ରେ ଜମ୍ମୁ କଶ୍ମୀରରୁ ଏହି ଧାରା ଉଚ୍ଛେଦ କରାଯାଇଛି । 
ଘାଟିରେ ଧାରା ୩୭୦ ଇତିହାସ କ’ଣ ରହିଛି ?
୧୯୪୭, ଅକ୍ଟୋବର ୨୬ରେ ଭାରତ ସହ ଯୋଡ଼ି ହୋଇଥିଲା ଜାମ୍ମୁ-କାଶ୍ମୀର
୧୯୪୯ରେ ଜମ୍ମୁ-କାଶ୍ମୀର ପାଇଁ ସମ୍ବିଧାନରେ ଯୋଡ଼ା ହୋଇଥିଲା ଧାରା ୩୭୦
ପ୍ରଥମରୁ ଏହାକୁ ବିରୋଧ କରିଥିଲେ ସମ୍ବିଧାନ ପ୍ରଣେତା ଡକ୍ଟର ଭୀମରାଓ ଆମ୍ବେଦକର
ଏହାକୁ ଦେଶଦ୍ରୋହ ସହ ସମାନ ବୋଲି କହିଥିଲେ ଆମ୍ବେଦକର
ଧାରା ୩୭୦ ବଳରେ ଜାମ୍ମୁ-କାଶ୍ମୀର ରାଜ୍ୟକୁ ମିଳିଥିଲା ସ୍ୱତନ୍ତ୍ର ମାନ୍ୟତା
ଏହି ଧାରା ଅନୁଯାୟୀ ଭାରତର ସବୁ ଆଇନ ଜାମ୍ମୁ-କାଶ୍ମୀରରେ ଲାଗୁ ହେଉନଥିଲା

ଧାରା ୩୭୦ କେବଳ ପ୍ରତିରକ୍ଷା, ବୈଦେଶିକ ବ୍ୟାପାର, ଅର୍ଥ ଓ ଯୋଗାଯୋଗ କ୍ଷେତ୍ରରେ ଆଇନ ପ୍ରଣୟନ କରିପାରିବ ଭାରତ । ଅନ୍ୟ କ୍ଷେତ୍ରରେ କିଛି ଆଇନ ଲାଗୁ କରିବାକୁ ହେଲେ ଜାମ୍ମୁ କାଶ୍ମୀର ବିଧାନସଭାର ଅନୁମତି ନେବାକୁ ପଡିବ । ଜାମ୍ମୁ-କାଶ୍ମୀରର ବାସିନ୍ଦା ସ୍ୱତନ୍ତ୍ର ଅଧିକାର ପାଇବେ । ଜାମ୍ମୁ-କାଶ୍ମୀରର ସମ୍ପତ୍ତି ଓ ଜମିକୁ ଅନ୍ୟ ରାଜ୍ୟର ଲୋକେ କିଣି ପାରିବେ ନାହିଁ । କିନ୍ତୁ ଜାମ୍ମୁ-କାଶ୍ମୀରବାସୀ ଅନ୍ୟ ରାଜ୍ୟରେ ଜମି ଓ ସମ୍ପତ୍ତି କିଣିପାରିବେ । ଆର୍ଥିକ ବିପତ୍ତି ବେଳେ ଜାମ୍ମୁ ଓ କାଶ୍ମୀରରେ ଆର୍ଥିକ ଜରୁରୀକାଳୀନ ପରିସ୍ଥିତି ଜାରି କରିହେବ ନାହିଁ କେବଳ ବାହ୍ୟ ଆକ୍ରମଣ କିମ୍ବା ଯୁଦ୍ଧ ସମୟରେ ଜରୁରୀକାଳୀନ ପରିସ୍ଥିତି ଜାରି କରିହେବ । ତେବେ ଧାରା-୩୭୦ ଏକ ଅସ୍ଥାୟୀ ଅଧିକାର ବୋଲି ସମ୍ବିଧାନରେ ଉଲ୍ଲେଖ ରହିଥିଲା । ଯାହାକୁ ଉଚ୍ଛେଦ କରିଥିଲେ ମୋଦି ସରକାର । ଆଉ ଏବେ ପୁଣି ଥରେ ବିଧାନସଭାରେ ସରଗରମ ହୋଇଛି ଧାରା ୩୭୦ ଆଲୋଚନା ।