୨୦୨୬ ମାର୍ଚ୍ଚ ୩୧ ସୁଦ୍ଧା ନକ୍ସଲବାଦରୁ ମୁକ୍ତ ହେବ ଦେଶ । ଏଥିରେ ସିଆରପିଏଫ ଯବାନମାନେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ବୋଲି କହିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ସିଆରପିଏଫର ୮୬ତମ ପ୍ରତିଷ୍ଠା ଦିବସ ଅବସରରେ ମଧ୍ୟପ୍ରଦେଶର ନିମୁଚରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇ ସିଆରପିଏଫକୁ ଭୂରୀଭୁରୀ ପ୍ରଶଂସା କରିଛନ୍ତି ଶାହ । ଦେଶକୁ ନକ୍ସଲ ମୁକ୍ତ କରିବା ଦିଗରେ କୋବ୍ରା ବାଟାଲିୟନର ଯବାନଙ୍କ ଭୁମିକାକୁ ଅଭୂତପୂର୍ବ ବୋଲି କହିଛନ୍ତି ଶାହ । କାଶ୍ମୀରଠାରୁ କନ୍ୟାକୁମାରୀ ଯାଏ ଦେଶର ସୁରକ୍ଷାରେ ସିଆରପିଏଫର ଗୁରୁତ୍ବପୂର୍ଣ୍ଣ ଭୂମିକା ରହିଛି ।

ଦେଶର ସୁରକ୍ଷାରେ ମୁତୟନ ହୋଇଥିବା ୨ ହଜାର ୨୬୪ ଯବାନ ସହିଦ ହୋଇଛନ୍ତି। ସହିଦ ସ୍ମାରକରେ ସହିଦଙ୍କୁ ଶ୍ରଦ୍ଧାଞ୍ଜଳି ଦେବା ସହ ଯବାନମାନଙ୍କୁ ବୀରତା ପୁରସ୍କାର ପ୍ରଦାନ କରିଛନ୍ତି କେନ୍ଦ୍ର ଗୃହମନ୍ତ୍ରୀ । କାର୍ଯ୍ୟକ୍ରମରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବ, ସିଆରପିଏଫ୍ ମହାନିର୍ଦ୍ଦେଶକ ଜ୍ଞାନେନ୍ଦ୍ର ପ୍ରତାପ ସିଂହ ସାମିଲ ହୋଇଥିଲେ ।