କୋଲକାତାରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ରଣହୁଙ୍କାର । ମମତା ସରକାରଙ୍କ ଦୁର୍ନୀତି ପୋଲ୍ ଖୋଲିବା ସହ ଆସନ୍ତାବର୍ଷ ନିର୍ବାଚନରେ ବିଜେପିର ବିଜୟ ନିଶ୍ଚିତ ବୋଲି ଦୃଢୋକ୍ତି ପ୍ରକାଶ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । କୋଲକାତାରେ ବିଶାଳ ରୋଡ ଶୋ କରି ଶକ୍ତି ପ୍ରଦର୍ଶନ କରିଛନ୍ତି ଶାହ । ଦୁର୍ନୀତି, ମହିଳା ସୁରକ୍ଷା, ଅନୁପ୍ରବେଶ, ଶିଳ୍ପ ସ୍ଥାନାନ୍ତର ଆଦି ପ୍ରସଙ୍ଗରେ TMC ସରକାରଙ୍କୁ କରିଛନ୍ତି ଟାର୍ଗେଟ୍ । ୨୦୨୧ ନିର୍ବାଚନରେ ୭୭ଟି ଆସନ ଜିତି ମୁଖ୍ୟ ବିରୋଧୀଦଳର ମାନ୍ୟତା ପାଇବା ସହ ବିଜେପି ମମତା ସରକାରଙ୍କୁ ଦେଇଥିଲା କଡ଼ା ଚାଲେଞ୍ଜ । ଆଗାମୀ ନିର୍ବାଚନରେ ଦୁର୍ନୀତିଗ୍ରସ୍ତ ଟିଏମସି ସରକାରକୁ ଜବାବ ଦେବାକୁ ଜନତାଙ୍କୁ ଆହ୍ବାନ ଦେଇଛନ୍ତି ଶାହ ।

ପଶ୍ଚିମବଙ୍ଗରେ ପରିବର୍ତ୍ତନର ସ୍ପଷ୍ଟ ସଂକେତ । ଆଗାମୀ ନିର୍ବାଚନରେ ଦୁଇ-ତୃତୀୟାଂଶ ଜନମତ ସହ ରାଜ୍ୟରେ ବିଜେପି ସରକାର ଗଠନ କରିବ ବୋଲି ଦୃଢୋକ୍ତି ପ୍ରକାଶ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ମମତାଙ୍କ ଭୋଟ ବ୍ୟାଙ୍କ ରାଜନୀତି ଯୋଗୁ ରାଜ୍ୟ ବିକାଶ ବାଟବଣା ହୋଇଥିବା କହିଛନ୍ତି ଶାହ । ୧୪ ବର୍ଷ ହେଲା ଭୟ ଓ ଦୁର୍ନୀତି ପାଲଟିଛି ପଶ୍ଚିମବଙ୍ଗର ପରିଚୟ ।

ମମତା ସରକାର ଜାଣିଶୁଣି ଆୟୁଷ୍ମାନ ଭାରତ ପରି କେନ୍ଦ୍ରୀୟ ଯୋଜନା ଲାଗୁ ନକରି ରାଜ୍ୟର ଗରିବଙ୍କୁ ସରକାରୀ ସୁବିଧାରୁ ବଞ୍ଚିତ କରୁଛନ୍ତି । ବେଙ୍ଗଲରେ ମନ୍ତ୍ରୀଙ୍କ ଘରୁ ୨୭ କୋଟି ଟଙ୍କା ମିଳିବା ଘଟଣା ଟିଏମସି ଦୁର୍ନୀତିର ବଡ଼ ପ୍ରମାଣ ବୋଲି କହିଛନ୍ତି ଶାହ । ଏକ ନିର୍ଦ୍ଦିଷ୍ଟ ଗୋଷ୍ଠୀର ସମର୍ଥନ ଲୋଭରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟର ପରମ୍ପରାକୁ ହେୟଜ୍ଞାନ କରିବା ସହ ସାମ୍ବିଧାନିକ ବ୍ୟବସ୍ଥାକୁ ମାଟିରେ ମିଶାଇଥିବା ପରି ସଙ୍ଗିନ ଅଭିଯୋଗ କରିଛନ୍ତି କେନ୍ଦ୍ର ଗୃହମନ୍ତ୍ରୀ । ଦୁର୍ନୀତି, ମହିଳା ସୁରକ୍ଷା, ଅନୁପ୍ରବେଶ, ଶିଳ୍ପ ସ୍ଥାନାନ୍ତର ଆଦି ପ୍ରସଙ୍ଗରେ TMC ପୋଲ୍ ଖୋଲିବା ସହ ମମତା ସରକାରଙ୍କ ଯିବା ସମୟ ପାଖେଇ ଆସିଲାଣି ବୋଲି କହିଛନ୍ତି ଶାହ ।

ଆସନ୍ତାବର୍ଷ ନିର୍ବାଚନରେ ପଶ୍ଚିମବଙ୍ଗରେ ବିଜେପି ସରକାର ଗଢ଼ିବ ବୋଲି ଦୃଢୋକ୍ତି ପ୍ରକାଶ କରିଛନ୍ତି ଶାହ । ୨୦୧୬ରେ ମାତ୍ର ୩ଟି ଆସନ ପାଇଥିବା ଦଳ ୨୦୨୧ ବିଧାନସଭା ନିର୍ବାଚନରେ ୭୭ଟି ଆସନ ଜିତି ମୁଖ୍ୟ ବିରୋଧୀଦଳର ମାନ୍ୟତା ପାଇବା ସହ ମମତା ସରକାରଙ୍କୁ କଡ଼ା ଚାଲେଞ୍ଜ ଦେଇଥିଲା । ରାଜ୍ୟରେ ବିଜେପିର ଉତ୍ଥାନ ସହ କଂଗ୍ରେସ ଓ ବାମଦଳ ମାଟିରେ ମିଶିଛି ବୋଲି ଶାହ କହିଛନ୍ତି । ୨୦୧୬ ବିଧାନସଭା ନିର୍ବାଚନରେ ବିଜେପିକୁ ମାତ୍ର ​​୧୦% ଭୋଟ ମିଳିଥିବାବେଳେ ୨୦୨୧ ବିଧାନସଭା ନିର୍ବାଚନରେ ​୨୧%କୁ ବୃଦ୍ଧି ପାଇଥିଲା । ବିଧାନସଭା ସହ ଲୋକସଭା ନିର୍ବାଚନରେ ବି ଟିଏମସିକୁ ବଡ଼ ଝଟକା ଦେଇଥିଲା ବିଜେପି । ୨୦୧୪ ଲୋକସଭା ନିର୍ବାଚନରେ ୨ଟି ଓ ୨୦୧୯ରେ ୩ଟି ଆସନ ଜିତିଥିବା ଦଳ ୨୦୨୪ ଲୋକସଭା ନିର୍ବାଚନରେ ୧୨ ଆସନ ଜିତିବାରେ ସମର୍ଥ ହୋଇଥିଲା ।

ଗତ ୧୫ ବର୍ଷ ଭିତରେ ରାଜ୍ୟରେ ସୃଷ୍ଟି ହୋଇଛି ଭୟର ବାତାବରଣ । ଅନୁପ୍ରବେଶ ରାଜ୍ୟର ସବୁଠାରୁ ବଡ଼ ସମସ୍ୟା ହୋଇଥିଲେ ବି ମମତା ସରକାର ଭୋଟବ୍ୟାଙ୍କ ରାଜନୀତି ଯୋଗୁଁ ରାଜ୍ୟ ସୀମାକୁ ବିପଦପୂର୍ଣ୍ଣ ଭାବେ ଖୋଲା ଛାଡ଼ି ଦେଇଥିବା ଅଭିଯୋଗ କରିଛନ୍ତି କେନ୍ଦ୍ର ଗୃହମନ୍ତ୍ରୀ । ଗତ ୬ ବର୍ଷ ମଧ୍ୟରେ, କେନ୍ଦ୍ର ଗୃହ ସଚିବ ତିନିଥର ପଶ୍ଚିମବଙ୍ଗ ଗସ୍ତ କରି ରାଜ୍ୟ ମୁଖ୍ୟ ସଚିବଙ୍କ ସହ ବୈଠକ କରିଛନ୍ତି । ଭାରତ-ବାଂଲାଦେଶ ସୀମାରେ ବାଡ଼ ଦେବା ପ୍ରସଙ୍ଗରେ ସିଏମଙ୍କୁ ୭ଟି ଚିଠି ଲେଖିଥିଲେ ବି ସରକାର ନେଇନଥିଲେ କୌଣସି ପଦକ୍ଷେପ । ରାଜ୍ୟକୁ ସୁରକ୍ଷିତ କରିବାକୁ, ଟିଏମସି ସରକାରକୁ ଜବାବ ଦେବାକୁ ଏକାଠି ହେବାକୁ ଆହ୍ବାନ ଦେଇଛନ୍ତି ଶାହ ।