ବର୍ତ୍ତମାନ ଦେଶରେ ବୁଲା କୁକୁର ମାମଲା ବେଶ୍ ସରଗରମ ରହିଛି । ସୁପ୍ରିମକୋର୍ଟ ଏନେଇ ନିଜର ରାୟ ମଧ୍ୟ ପ୍ରକାଶ କରିଛନ୍ତି । ଆଉ ଏହାରି ଭିତରେ ପୁଣି ଚର୍ଚ୍ଚାକୁ ଆସିଛନ୍ତି ବୃନ୍ଦାବନର କଥାବାଚକ ଅନିରୁଦ୍ଧାଚାର୍ଯ୍ୟ । ପୂର୍ବରୁ ସେ ଝିଅମାନଙ୍କ ଉପରେ ମନ୍ତବ୍ୟ ଦେଇ ବିବାଦକୁ ଚାଲି ଆସିଥିଲେ। ଆଉ ବର୍ତ୍ତମାନ ସେ ଲିଭ୍ ଇନ୍ ରିଲେସନସିପ୍ ଏବଂ କୁକୁର-ବିଲେଇଙ୍କୁ ନେଇ ଏମିତି କିଛି କଥା କହିଛନ୍ତି ଯାହା ସୋସିଆଲ୍ ମିଡିଆରେ ଝଡ଼ ସୃଷ୍ଟି ହୋଇଛି ।

କିଛି ଲୋକ ଏହି ମନ୍ତବ୍ୟକୁ ଗ୍ରହଣ କରୁଥିବା ବେଳେ ଆଉ କିଛି ଲୋକ ଏହାକୁ ନିନ୍ଦା କରୁଛନ୍ତି । କଥାବାଚକ ନିଜ ଟିପ୍ପଣୀରେ କହିଥିଲେ ଯେ ଲିଭ୍ ଇନରେ କୁକୁର-ବିଲେଇ ରୁହନ୍ତି , ଆମ ଦେଶର କୁକୁର ହଜାର ହଜାର ବର୍ଷ ଧରି ଲିଭ୍ ଇନରେ ରହି ଆସୁଛନ୍ତି । ଯାହା କୁକୁର ସମାଜର ପରମ୍ପରା।

ଏହି ଟିପ୍ପଣୀକୁ ଅନେକ ଯୁବପିଢ଼ି ଗ୍ରହଣ କରିବାକୁ ପ୍ରସ୍ତୁତ ନଥିବା ବେଳେ ବୟସ୍କ ସମାଜ ଏହାକୁ ଠିକ କଥା ବୋଲି କହିଛନ୍ତି । ନୋଏଡାର ଜଣେ ବ୍ୟକ୍ତି ବାବାଙ୍କର ଏହି ବୟାନକୁ ନିନ୍ଦା କରି କହିଛନ୍ତି ଯେ ଧର୍ମଗୁରୁମାନେ ଏଭଳି ବୟାନ ଦେବା ଅନୁଚିତ । ଏଭଳି ବୟାନ ଦ୍ବାରା ହିଁ ଯୁବସମାଜ ଧର୍ମକୁ ନେଇ ପ୍ରଶ୍ନ ଉଠାଇବା ଆରମ୍ଭ କରନ୍ତି ।

ଅନ୍ୟ ଜଣେ ବ୍ୟକ୍ତି ମଧ୍ୟ ଅନିରୁଦ୍ଧାଚାର୍ଯ୍ୟଙ୍କ ଏଭଳି ବୟାନ ଉପରେ ଟିପ୍ପଣୀ ଦେଇ କହିଛନ୍ତି ବାବା ଏପଟସେପଟ କଥା କହି ନିଜର ହିଁ ଅପମାନ କରାଉଛନ୍ତି । କହିବା ପୂର୍ବରୁ ଥରେ ଭାବିବା ଉଚିତ୍ । ଲିଭ୍ ଇନ୍ ରିଲେସନସିପକୁ ସୁପ୍ରିମକୋର୍ଟ ଯେଉଁଠି ସପୋର୍ଟ କରନ୍ତି କଥାବାଚକ ଏଭଳି ଟିପ୍ପଣୀ ଦେବା କ’ଣ ଠିକ୍ ? କୁକୁର-ବିଲେଇଙ୍କ ନାଁ ନେଇ ଏଭଳି ଟିପ୍ପଣୀ ଦେବା ଆଦୌ ଠିକ୍ ନୁହେଁ । ଧର୍ମଗୁରୁ ମର୍ଯ୍ୟାଦାର ଧ୍ୟାନ ଦିଅନ୍ତୁ । ବିବାହ ପୂର୍ବରୁ ଝିଅ-ପୁଅ ଲିଭ୍ ଇନରେ ରହିଲେ ତାହା ଭୁଲ୍ । କିନ୍ତୁ ଏହା ସେମାନଙ୍କ ବ୍ୟକ୍ତିଗତ ମତ ,ଏଥିରେ କାହାକୁ ଟିପ୍ପଣୀ କରିବାର ଆବଶ୍ୟକତା ନାହିଁ । କଥାବାଚକଙ୍କ ଉଦ୍ଦେଶ୍ୟ ତ ଠିକ୍ ଥିଲା କିନ୍ତୁ କହିବାର ତରିକା ଠିକ୍ ନଥିଲା ।

ଅନ୍ୟ ଜଣେ ଯୁବକ ଅନିରୁଦ୍ଧାଚାର୍ଯ୍ୟଙ୍କ ବୟାନକୁ ସମର୍ଥନ କରି ଏହାକୁ ସମାଜ ପାଇଁ ମଙ୍ଗଳ ବୋଲି କହିଛନ୍ତି । ସେ କହିଛନ୍ତି କଥାବାଚକଙ୍କ ଭାବନାକୁ ବୁଝିବାକୁ ଚେଷ୍ଟା କରନ୍ତୁ , ସେ ସମାଜ ପାଇଁ ଭଲ କଥା କହିଛନ୍ତି । ଲିଭ୍ ଇନ୍ ରିଲେସନସିପରେ ରହିବା ଆଦୌ ଠିକ୍ ନୁହେଁ , ଯୁବପିଢ଼ି ଏହାକୁ ପ୍ରେମର ନାଁ ଦେଉଥିଲେ ହେଁ ଏହା ପ୍ରେମ ନୁହେଁ ।

ଯୁବପିଢ଼ି ପ୍ରେମ ନାଁରେ ୱେଷ୍ଟର୍ଣ୍ଣ କଲ୍ଚରକୁ ଭାରତକୁ ଭିଡ଼ି ଆଣିଲେଣି । ଅନେକ ସ୍ଥାନରେ ଲିଭ୍ ଇନ୍ ରିଲେସନସିପରେ ହତ୍ୟାର ଘଟଣା ମଧ୍ୟ ସାମ୍ନାକୁ ଆସୁଛି । ବିବାହ କରିବାକୁ ଅରାଜି ହେଲେ କିମ୍ବା ବିବାହ ପାଇଁ ଜିଦ୍ ଧରିଲେ ପାର୍ଟନର ଜଣକ ରାଗି ଯାଇ ନିଜ ଲିଭ୍ ଇନ୍ ପାର୍ଟନରଙ୍କୁ ହିଁ ଜୀବନରୁ ମାରିଦେଉଛନ୍ତି । ସୁରକ୍ଷା ଦୃଷ୍ଟିରୁ ଲିଭ୍ ଇନରେ ରହିବା ଆଦୌ ଠିକ୍ ନୁହେଁ ।

ତେବେ ଅନିରୁଦ୍ଧାଚାର୍ଯ୍ୟଙ୍କ ଗୋଟିଏ ଟିପ୍ପଣୀକୁ ନେଇ ଅନେକ ଲୋକ ଅନେକ କଥା କହିଛନ୍ତି । କେହି କେହି ତାଙ୍କ ସମର୍ଥନରେ ଆସିଥିବା ବେଳେ ଆଉ କେହି ଅସମର୍ଥ ଏବଂ ଦ୍ବିପାକ୍ଷିକ ଟିପ୍ପଣୀ ଦେଉଛନ୍ତି । ତେବେ ଆପଣଙ୍କୁ କ’ଣ ଲାଗୁଛି କଥାବାଚକ କହିଥିବା ଏହି ଟିପ୍ପଣୀ କେତେ ଦୂର ଠିକ୍ ? ଆପଣଙ୍କ ମତରେ ଲିଭ୍ ଇନରେ ରହିବା ଉଚିତ ନା’ ଅନୁଚିତ ?