ଅର୍ଗସ ବ୍ୟୁରୋ: ସଂଯୋଗକୁ ନବବର୍ଷର ଶୁଭାରମ୍ଭ ବିଶ୍ବର ସବୁଠୁ ବଡ଼ ଧାର୍ମିକ ସମାଗମ ମହାକୁମ୍ଭରୁ ହିଁ ହେବାକୁ ଯାଉଛି । ପ୍ରୟାଗରାଜରେ ସନାତନୀଙ୍କର ଏଭଳି ଏକତ୍ରୀକରଣ କାର୍ଯ୍ୟକ୍ରମର ଆୟୋଜନ ହୋଇଛି, ପୂରା ଦୁନିଆର ଆଖି ଖୋସି ହୋଇଯିବ । ମାନେ ସିଧାସିଧା କହିଲେ ମହାକୁମ୍ଭର ମହାଆୟୋଜନ ନା ଭୂତୋ ନା ଭବିଷ୍ୟତି ବିଶିଷ୍ଟ ହେବାକୁ ଯାଉଛି ।୧୨ ବର୍ଷ ପରେ ଏଭଳି ଏକ ମହାର୍ଘ ମୁହୂର୍ତ୍ତ ଆସିଛି । ଏମିତିରେ ତ ସଙ୍ଗମ ନଗରୀରେ ମହାକୁମ୍ଭ ସ୍ନାନର ଶୁଭାରମ୍ଭ ପୌଷ ପୂର୍ଣ୍ଣିମା ଅର୍ଥାତ୍ ଜାନୁଆରୀ ୧୩ରୁ ଆରମ୍ଭ ହେବ । କିନ୍ତୁ ପୂରା ପ୍ରୟାଗରାଜ ଏବେ ଠାରୁ ହିଁ ଗେରୁଆମୟ ହୋଇସାରିଛି । ସାଧୁସନ୍ଥ ପହଞ୍ଚିବାରେ ଲାଗିଛନ୍ତି । ଭବ୍ୟ ଟେଣ୍ଟ ସିଟି ଆକାର ନେଇ ସାରିଛି । ପ୍ରସାଦ ଠାରୁ ଆରମ୍ଭ କରି ପୂଜା ସାମଗ୍ରୀର ଦୋକାନ୍ତ ଯାଏଁ ସଜ ହୋଇସାରିଛି । ଏସବୁ ଭିତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରୟାଗରାଜରେ ପହଞ୍ଚିଛନ୍ତି । ମୋଦି-ଯୋଗୀରାଜରେ ପ୍ରଥମ ଥର ହେଉଥିବା ଏହି ମହାକୁମ୍ଭକୁ ଦିବ୍ୟ ଆଉ ଭବ୍ୟ ବନେଇବାର ସମସ୍ତ ପ୍ରୟାସ କରାଯାଉଛି ।

ମୋଦି ସଙ୍ଗମ ନଗରୀରେ ପହଞ୍ଚିଥିଲେ । ଆଉ ସାଥିରେ ଉପହାରର ଭଣ୍ଡାର ବି ନେଇ ଯାଇଥିଲେ । ପ୍ରଥମେ ଘାଟରେ ପହଞ୍ଚିବା ପାଇଁ ବାରଣାସୀରୁ ବିଶେଷ କ୍ରୁଜ୍ ମଗାଯାଇଥିଲା । ଏହି କ୍ରୁଜକୁ ନିଷାଦରାଜ କ୍ରୁଜ ଭାବେ ନାମକରଣ କରାଯାଇଛି । ଏଥିରୁ ଥାଇ ପିଏମ୍ ମୋଦି ପ୍ରଥମେ ଘାଟରେ ଚାଲୁଥିବା ପ୍ରସ୍ତୁତିର ନିରୀକ୍ଷଣ କରିଥିଲେ । ୧୩ ଜାନୁଆରୀରେ ମହାକୁମ୍ଭକୁ ଆସୁଥିବା ଶ୍ରଦ୍ଧାଳୁଙ୍କୁ ଏହି କ୍ରୁଜ୍ ଜରିଆରେ ସଙ୍ଗମ ନଦୀରେ ପରିଭ୍ରମଣ କରାଯିବ । ଏହି କ୍ରୁଜରେ ଏକାସାଥିରେ ୫୦ ଜଣ ବସିପାରିବେ । ଏହା ପରେ ଗଙ୍ଗାଆରତୀ କରିଛନ୍ତି । ପିଏମ ମୋଦି ଗଙ୍ଗା ପୂଜନ ପରେ ଔପଚାରିକ ଭାବେ ମହାକୁମ୍ଭ ୨୦୨୫ର ଶୁଭାରମ୍ଭ କରିଛନ୍ତି ।

ପିଏମ ମୋଦି ସାଢ଼େ ପାଞ୍ଚ ହଜାର କୋଟିର ୨୧ଟି ପ୍ରୋଜେକ୍ଟକୁ ଲୋକାର୍ପଣ କରିଛନ୍ତି । ଏଥିରେ ୨୪୦ କୋଟିର ଖର୍ଚ୍ଚରେ ସାତଟି ସ୍ନାନ ଘାଟ, ୧୪୮ କୋଟି ମୂଲ୍ୟରେ ଆଇଆରଟି ପାଖରେ ଆରଓବି, ୧୪୬ କୋଟିର ଫାଫାମଉ-ସୋରାଁ ଆରଓବି, ୧୩୫ କୋଟି ମୂଲ୍ୟର ଶୃଙ୍ଗବେରପୁର ଧାମ କରିଡର ପରି ବଡ଼ ପ୍ରକଳ୍ପ ସାମିଲ ଅଛି । ଆମେ ସମସ୍ତେ ଜାଣିଛୁ ଗଙ୍ଗା, ଯମୁନା, ସରସ୍ବତୀ ନଦୀର ସଙ୍ଗମସ୍ଥଳ ହେଉଛି ପ୍ରୟାଗରାଜ । ହେଲେ ସରସ୍ବତୀ ନଦୀ ସେଠାରେ ବିଲୁପ୍ତ । କିନ୍ତୁ ୟୁପିରେ ଡବଲ୍ ଇଞ୍ଜିନ ସରକାର ଆସିବା ପରେ ଯେଉଁଭଳି ସରସ୍ବତୀ କୂପର ବିକାଶ କରାଯାଇଛି ତାହା ଦେଖିବାଯୋଗ୍ୟ ନିଶ୍ଚିତ । ପିଏମ୍ ମୋଦି ଆଜି ସରସ୍ବତୀ କୂପରେ ପୂଜାର୍ଚ୍ଚନା କରିଛନ୍ତି । ସେହିପରି ଲେଟେ ହନୁମାନ ମନ୍ଦିରରେ ବି ପିଏମ୍ ମୋଦି ଆରାଧନା କରିଛନ୍ତି । ଲେଟେ ହନୁମାନ ମନ୍ଦିରରେ ହନୁମାନଙ୍କୁ ଶୋଇଥିବା ଅବସ୍ଥାରେ ପୂଜା କରାଯାଏ ।

ପ୍ରୟାଗରାଜରେ ମହାକୁମ୍ଭ ପୂର୍ବରୁ ମୋଟ୍ ୮୬୦୦ କୋଟି ଟଙ୍କାରେ ୫୫୦ରୁ ଅଧିକ ପ୍ରକଳ୍ପର ନିର୍ମାଣ କରାଇଛନ୍ତି ମୋଦି ସରକାର । ସେଥିପାଇଁ ପ୍ରଧାନମନ୍ତ୍ରୀ ନିଜେ ନୂଆବର୍ଷରେ ଆରମ୍ଭ ହେବାକୁ ଯାଉଥିବା ଏହି ବିଶାଳ ଆୟୋଜନର ପ୍ରସ୍ତୁତିର ସମୀକ୍ଷା କରିଛନ୍ତି । ମହାକୁମ୍ଭ ସଂକ୍ରାନ୍ତୀୟ ଏକ ପ୍ରଦର୍ଶନୀ ବି ବୁଲିଛନ୍ତି ପିଏମ୍ । ପୂର୍ବରୁ ୨୦୧୯ରେ ଯେବେ ପ୍ରୟାଗରାଜରେ କୁମ୍ଭର ଭବ୍ୟ ଆୟୋଜନ ହୋଇଥିଲା, ସେତେବେଳେ ବି ପିଏମ ମୋଦି ସଙ୍ଗମ ନଗରୀ ଯାଇଥିଲେ । ସେତେବେଳେ ମୋଦି ନା କେବଳ ଗଙ୍ଗାପୂଜନ କରିଥିଲେ, ବରଂ ସଫେଇ କର୍ମଚାରୀଙ୍କୁ ସମ୍ମାନିତ କରି ସେମାନଙ୍କ ଚରଣ ଧୋଇଥିଲେ । ଆଉ ଏଥର ସାଧୁସନ୍ଥଙ୍କ ଅଭିବାଦନ ଗ୍ରହଣ କରିଛନ୍ତି ପିଏମ୍ । ମୋଟାମୋଟି ଏବେ ଦିବ୍ୟ, ଭବ୍ୟ ମହାକୁମ୍ଭର ଦର୍ଶନ କରିବେ ଦେଶବାସୀ ।

ଅଧିକ ପଢ଼ନ୍ତୁ ଦେଶ ଖବର:

Argus News | argus news | Odisha Latest News, Breaking News, Trending News, Live TV