ଭାରତରେ ଆପଲ କମ୍ପାନୀ ଆଇଫୋନ ନିର୍ମାଣ ବନ୍ଦ କରୁ ବୋଲି ଟ୍ରମ୍ପ କହିବା ପରେ ସାରା ଦେଶରେ ଏବେ ସେନେଇ ଚର୍ଚା ଜୋର ଧରିଛି | ଆଉ ସବୁଠୁ ବଡ଼ କଥା ହେଲା ଟ୍ରମ୍ପଙ୍କ ତାଗିଦ ସତ୍ଵେ ଆପଲ ସିଇଓ ଟିମ କୁକ ଭାରତରେ ଆଇଫୋନ ନିର୍ମାଣ କରିବା ଜିଦରେ ଅଛନ୍ତି | ଆଉ ଏହା ପଛରେ ସବୁଠୁ ବଡ଼ କାରଣ ହେଲା କମ୍ପାନୀ ଲାଭ |

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆପଲ୍ ଉପରେ ୨୫ ପ୍ରତିଶତ ଶୁଳ୍କ ଲଗାଇବାକୁ ଧମକ ଦେଇଛନ୍ତି। ଟ୍ରମ୍ପ କହିଛନ୍ତି ଯେ ଯଦି ଆମେରିକାରେ ବିକ୍ରି ହେଉଥିବା ଆଇଫୋନଗୁଡ଼ିକ ଆମେରିକାରେ ତିଆରି ନହୁଏ, ତେବେ କମ୍ପାନୀ ଉପରେ 25 ପ୍ରତିଶତ ଟିକସ ଲାଗୁ କରାଯିବ। ତେବେ ଟ୍ରମ୍ପଙ୍କ ଏହି ଘୋଷଣା ପରେ, ଆମେରିକାରେ ଆଇଫୋନର ମୂଲ୍ୟ ବୃଦ୍ଧି ପାଇପାରେ ବୋଲି ଅନୁମାନ କରାଯାଉଛି।

ରିପୋର୍ଟ ଅନୁଯାୟୀ, ଯଦିଓ ଟ୍ରମ୍ପ 25% ଶୁଳ୍କ ଲାଗୁ କରନ୍ତି, ତଥାପି ଭାରତରେ ନିର୍ମିତ ଆଇଫୋନଗୁଡ଼ିକ ଆମେରିକା ବଜାରରେ ଶସ୍ତା ରହିବ। ଗ୍ଲୋବାଲ ଟ୍ରେଡ୍ ରିସର୍ଚ୍ଚ ଇନିସିଏଟିଭ୍ ଅନୁଯାୟୀ, ଯଦିଓ ଭାରତରେ ନିର୍ମିତ ଆଇଫୋନ୍ ଉପରେ 25 ପ୍ରତିଶତ ଶୁଳ୍କ ଲାଗୁ କରାଯାଏ, ତଥାପି ଉତ୍ପାଦନ ଖର୍ଚ୍ଚ ଆମେରିକାରେ ନିର୍ମିତ ଆଇଫୋନ୍ ତୁଳନାରେ କମ୍ ରହିବ।

ଆପଲ୍ କିପରି ଟଙ୍କା ରୋଜଗାର କରେ?

GTRI ରିପୋର୍ଟକୁ ଯଦି ବିଶ୍ୱାସ କରାଯାଏ, ତେବେ ଏହି ଫୋନ୍‌ଗୁଡ଼ିକ ଉପରେ ଶୁଳ୍କ ଲାଗୁ ହେଲେ ମଧ୍ୟ ଭାରତରେ ଉତ୍ପାଦନ ଶସ୍ତା ରହିବ। ଏଥିପାଇଁ, ରିପୋର୍ଟରେ ଆଇଫୋନର ଭ୍ୟାଲୁ ଚେନକୁ ବ୍ରେକ ଡାଉନ କରାଯାଇଛି । 1,000 ଡଲାରର ଆଇଫୋନରେ ଆପଲର ମାର୍ଜିନ୍ ସର୍ବାଧିକ ରହୁଛି । ଏଥିରୁ କମ୍ପାନୀକୁ ୪୫୦ ଡଲାର ମିଳିଥାଏ ।

Qualcomm ଏବଂ Boardcom ଭଳି ଆମେରିକୀୟ କମ୍ପୋନେଣ୍ଟ ମେକର ପ୍ରତି ଫୋନ ପାଇଁ 80 ଡଲାର ଚାର୍ଜ କରନ୍ତି, ଯେତେବେଳେକି ତାଇୱାନିଜ୍ ଚିପ୍ ନିର୍ମାତାମାନେ 150 ଡଲାର ଚାର୍ଜ କରନ୍ତି। ଦକ୍ଷିଣ କୋରିଆ OLED ସ୍କ୍ରିନ୍ ଏବଂ ମେମୋରୀ ଚିପ୍ସ ପାଇଁ 90 ଡଲାର ଏବଂ ଜାପାନ, ସପଲାଏ କମ୍ପୋନେଣ୍ଟ ପାଇଁ 85 ଡଲାର ନେଉଛି। ଅନ୍ୟାନ୍ୟ ଛୋଟ ଛୋଟ ପାର୍ଟସ ପାଇଁ 45 ଡଲାର ଖର୍ଚ ହୋଇଥାଏ ।

GTRI କହିଛି ଯେ ଯଦିଓ ଚୀନ୍ ଏବଂ ଭାରତ ଆଇଫୋନ୍ ନିର୍ମାଣରେ ସବୁଠୁ ବଡ଼ ଖେଳାଳି, ତଥାପି ପ୍ରତ୍ୟେକ ୟୁନିଟ୍ ଉପରେ ସେମାନଙ୍କର ରୋଜଗାର ପ୍ରାୟ 30 ଡଲାର ରହିଥାଏ । ଏହାର ଅର୍ଥ ହେଉଛି ଭାରତ ଏବଂ ଚୀନ୍ ଆଇଫୋନର ମୋଟ ମୂଲ୍ୟର ମାତ୍ର 3 ପ୍ରତିଶତ ପାଇଥାଆନ୍ତି। ଏହି ଆଧାରରେ କୁହାଯାଏ ଯେ ଯଦି ଭାରତରେ ନିର୍ମିତ ଆଇଫୋନଗୁଡ଼ିକ ଉପରେ ଆମେରିକା ଅଧିକ ଶୁଳ୍କ ଲଗାଏ, ତଥାପି ଆପଲ କମ୍ପାନୀ ଲାଭରେ ରହିବ |

ଆମେରିକାରେ ତିଆରି ଆଇଫୋନ ମହଙ୍ଗା ହେବ

ଭାରତ ଏବଂ ଆମେରିକାର ଲେବର କସ୍ଟ ମଧ୍ୟରେ ବଡ଼ ପାର୍ଥକ୍ୟ ରହିଛି। ଭାରତରେ, ଜଣେ ଫୋନ୍ ଆସେମ୍ବଲି କରୁଥିବା କର୍ମଚାରୀକୁ ପ୍ରାୟ 230 ଡଲାର ମିଳିଥାଏ । ଅନ୍ୟପଟେ ଆମେରିକାର କାଲିଫର୍ନିଆରେ ଯଦି ଫୋନ ନିର୍ମାଣ କରାଯାଏ, ତେବେ ସେଠାରେ ଲେବର କସ୍ଟ ପ୍ରାୟ 2900 ଡଲାର ରହିଥାଏ | ଯାହା ଭାରତ ତୁଳନାରେ 13 ଗୁଣ ଅଧିକ। ଏହି ଖର୍ଚ୍ଚ ସର୍ବନିମ୍ନ ମଜୁରୀ ଆଇନ ଯୋଗୁଁ।

ଭାରତରେ ଏକ ଆଇଫୋନର ଆସେମ୍ବଲୀ ଖର୍ଚ୍ଚ 30 ଡଲାର ଥିବା ବେଳେ ଆମେରିକାରେ ଏହି ଖର୍ଚ୍ଚ 390 ଡଲାର ପର୍ଯ୍ୟନ୍ତ ପହଞ୍ଚିଥାଏ। ଏହା ବ୍ୟତୀତ, ଆପଲକୁ ଭାରତରେ PLI ଯୋଜନାର ମଧ୍ୟ ଲାଭ ହୋଇଥାଏ । ଯଦି ଆପଲ୍ ଏହାର ଉତ୍ପାଦନକୁ ଆମେରିକାକୁ ସ୍ଥାନାନ୍ତର କରେ, ତେବେ କମ୍ପାନୀର ଲାଭ 450 ଡଲାରରୁ ହ୍ରାସ ପାଇ 60 ଡଲାର ହେବାର ସମ୍ଭାବନା ରହିଛି ।

Argus News | argus news | Odisha Latest News, Breaking News, Trending News, Live TV