Accident News / ସାମାନ୍ୟ ବଚସା ପରେ ୭ମ ମହଲାରୁ ଖସି ଜଣେ ମୃତ, ଅନ୍ୟ ଜଣେ ଗୁରୁତର

କର୍ଣ୍ଣାଟକର ବେଙ୍ଗାଲୁରୁ ହ୍ୱାଇଟଫିଲ୍ଡ ଅଞ୍ଚଳରେ ଘଟିଛି ଏକ ଦୁଃଖଦ ଘଟଣା । ଏକ ପ୍ରାଇଭେଟ୍ କୋ-ଲିଭିଂ ପିଜିର ସପ୍ତମ ମହଲାରୁ ଖସିପଡ଼ି ୨୩ ବର୍ଷୀୟା ଜଣେ ମହିଳା ସଫ୍ଟୱେର ଇଞ୍ଜିନିୟରଙ୍କ ମୃତ୍ୟୁ ହୋଇଛି । ଏହି ଘଟଣାରେ ତାଙ୍କ ୩୦ ବର୍ଷୀୟ ବନ୍ଧୁ ଗୁରୁତର ଆହତ ହୋଇଛନ୍ତି। ଆହତ ଯୁବକଙ୍କୁ ନିକଟସ୍ଥ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି ।

ପୁଡୁଚେରୀର ବାସିନ୍ଦା ଥିଲେ ଉଭୟ
ମୃତ ଯୁବତୀଙ୍କ ପରିଚୟ ଜନନୀ ଭାବେ । ସେ ସଫ୍ଟୱେର ଇଞ୍ଜିନିୟର ଭାବେ କାମ କରୁଥିଲେ । ସେ ମୂଳତଃ ପୁଡୁଚେରୀର ଉଲଇଭକ୍କଲ ଅଞ୍ଚଳର ବାସିନ୍ଦା ଥିଲେ । ଗତ ଜାନୁଆରୀ ମାସରୁ ସେ ହ୍ୱାଇଟଫିଲ୍ଡର ଇସିସି ରୋଡ୍‌ସ୍ଥିତ ମାଉଣ୍ଟେନ୍ ପିଜିରେ ରହୁଥିଲେ । ଅନ୍ୟପଟେ ଆହତ ଯୁବକଙ୍କ ପରିଚୟ ମଣିକଭେଲୁ ଭାବେ ହୋଇଛି । ସେ ଏକ ଲଜିଷ୍ଟିକ୍ସ କମ୍ପାନୀରେ କାମ କରୁଥିବାବେଳେ ତାଙ୍କ ଘର ମଧ୍ୟ ପୁଡୁଚେରୀର ନଲ୍ଲାଥୁର ଅଞ୍ଚଳରେ ବୋଲି ଜଣାପଡ଼ିଛି ।

ବିବାଦ ପରେ ଘଟିଲା ଅଘଟଣ
ପୋଲିସର ପ୍ରାଥମିକ ତଦନ୍ତ ଅନୁସାରେ, ଘଟଣା ଦିନ ସକାଳେ ଜନନୀ ଓ ମଣିକଭେଲୁଙ୍କ ମଧ୍ୟରେ କୌଣସି କଥାକୁ ନେଇ ବଚସା ହୋଇଥିଲା । ବିବାଦ ବଢ଼ିବା ପରେ ଜନନୀ ବିଲ୍ଡିଂର ଧାର ଆଡ଼କୁ ଯାଇଥିଲେ । ପୋଲିସର ଆଶଙ୍କା ଅନୁସାରେ, ସେଠାରୁ ଡେଇଁବାକୁ ଚେଷ୍ଟା କରିବା ସମୟରେ ଜନନୀ ମଣିକଭେଲୁଙ୍କୁ ମଧ୍ୟ ସାଙ୍ଗରେ ଟାଣି ନେଇଥାଇପାରନ୍ତି । ଫଳରେ ଉଭୟେ ସପ୍ତମ ମହଲାରୁ ତଳକୁ ଖସିପଡ଼ିଥିଲେ ।

ଏହି ଘଟଣାରେ ଜନନୀଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ମଣିକଭେଲୁ ତଳକୁ ଖସିବା ସମୟରେ ଏକ ଗଛର ଡାଳରେ ଅଟକି ଯାଇଥିଲେ । ଫଳରେ ତାଙ୍କ ଜୀବନ ବଞ୍ଚିଯାଇଥିଲା । ତେବେ ସେ ଗୁରୁତର ଭାବେ ଆହତ ହୋଇଛନ୍ତି ।

ମାମଲା ରୁଜୁ କରି ତଦନ୍ତ କରୁଛି ପୋଲିସ
ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସର ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା । ଜନନୀଙ୍କ ମୃତଦେହକୁ ପୋଷ୍ଟମର୍ଟମ ପାଇଁ ପଠାଯାଇଛି । ପୋଲିସ ମାମଲା ରୁଜୁ କରିବା ସହ ଉଭୟଙ୍କ ମଧ୍ୟରେ କେଉଁ କାରଣରୁ ବିବାଦ ହୋଇଥିଲା ଏବଂ ଘଟଣାଟି ପ୍ରକୃତରେ କିପରି ଘଟିଲା, ସେନେଇ ତଦନ୍ତ ଜାରି ରଖିଛି। ଘଟଣାର ସମ୍ପୂର୍ଣ୍ଣ ସତ୍ୟ ପୋଲିସ ତଦନ୍ତ ପରେ ସ୍ପଷ୍ଟ ହେବ ।