ଦିଲ୍ଲୀ ମଦ ଦୁର୍ନୀତି ମାମଲାରେ ଦିଲ୍ଲୀ ସିଏମଙ୍କୁ ପଞ୍ଚମ ଥର ପାଇଁ ସମନ
ଅର୍ଗସ ବ୍ୟୁରୋ: ଦୁର୍ନୀତିଗ୍ରସ୍ତ ଇଣ୍ଡି ନେତାଙ୍କ ମୁଣ୍ଡ ଉପରେ ଝୁଲୁଛି ଇଡି ଖଣ୍ଡା । ଖଣି ଟଙ୍କା ଡିଲ୍ ଦୁର୍ନୀତି ମାମଲାରେ ଶେଷରେ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ସୋରେନଙ୍କୁ ପ୍ରଶ୍ନବାଣରେ ଘାଇଲା କରିଛି ଇଡି । ଦଶ ଥର ସମନ ଜାରି ପରେବି ଇଡିରେ ହାଜର ହୋଇନଥିବାରୁ ଶେଷରେ ରାଞ୍ଚିସ୍ଥିତ ବାସଭବନରେ ପହଞ୍ଚି ସୋରେନଙ୍କ ବୟାନ ରେକର୍ଡ କରିଛନ୍ତି ଇଡି ଅଧିକାରୀ । ଇଡି ଜେରାରେ ବିଚଳିତ ହୋଇ ତଦନ୍ତକାରୀ ଅଧିକାରୀଙ୍କ ବିରୋଧରେ SC/ST ଆକ୍ଟରେ ମାମଲା ରୁଜୁ କରି ନିଜକୁ ନିର୍ଦୋଷ ପ୍ରମାଣିତ କରିବାକୁ ବିଫଳ ଚେଷ୍ଟା କରିଛନ୍ତି ହେମନ୍ତ । ମୁଖ୍ୟମନ୍ତ୍ରୀଙ୍କ ଗିରଫ ଆଶଙ୍କା ନେଇ ଦଳୀୟ କର୍ମୀ ବିଭିନ୍ନ ସ୍ଥାନରେ ନାରାବାଜି କରିଛନ୍ତି । ସୁରକ୍ଷା ଦୃଷ୍ଟିରୁ ସିଏମ ନିବାସ, ରାଜଭବନ ଓ ଇଡି କାର୍ଯ୍ୟାଳୟ ପରିସରର ଶହେ ମିଟର ଅଞ୍ଚଳରେ 144 ଧାରା ହୋଇଛି । ମଙ୍ଗଳବାର ହେମନ୍ତଙ୍କ ନୂଆଦିଲ୍ଲୀ ସ୍ଥିତ ବାସଭବନରୁ ବିଏମଡବ୍ଲୁ ଗାଡ଼ି ଓ 36 ଲକ୍ଷ ଟଙ୍କାର କ୍ୟାସ୍ ଜବତ ପରଠାରୁ ଗିରଫଦାରି ଆଶଙ୍କା ବଢ଼ିଥିଲା । ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇ ପତ୍ନୀ କଳ୍ପନା ସୋରେନଙ୍କୁ ଗାଦିରେ ବସାଇବାକୁ ସୋରେନ ପ୍ଲାନ ବି କରିଥିବା ଚର୍ଚ୍ଚା ହେଉଛି ।
ଆଉ ଚଳିବନି ଲୁଚକାଳି ଖେଳ । ହେମନ୍ତଙ୍କୁ ଇଡି ଜେରା କରିଥିବାବେଳେ ପଞ୍ଚମ ଥର ପାଇଁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରୀୱାଲଙ୍କୁ ସମନ ଜାରି କରି ଆକ୍ସନକୁ ଜୋରଦାର କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଦିଲ୍ଲୀ ମଦ ଦୁର୍ନୀତି ମାମଲାରେ ଇଡିରେ ହାଜର ହେବାକୁ ପୁଣିଥରେ ନୋଟିସ ଜାରି କରିଛି ଇଡି । ମାମଲାରେ ପୂର୍ବରୁ ସତ୍ୟେନ୍ଦ୍ର ଜୈନ, ମନୀଷ ସିସୋଦିଆ, ସଂଜୟ ସିଂହଙ୍କ ପରି ବଡ଼ ନେତାଙ୍କ ସମେତ 10ରୁ ଅଧିକ ଗିରଫ ହୋଇଥିବାବେଳେ ମୁଖ୍ୟମନ୍ତ୍ରୀ କେଜ୍ରିୱାଲ ମଧ୍ୟ ଗିରଫ ହେବା ସମ୍ଭାବନା ବୃଦ୍ଧି ପାଇଛି ।
ଇଡିର ହାଜର ହେବାକୁ 2023 ଜାନୁଆରୀ 3, ଜାନୁଆରୀ 17 , ନଭେମ୍ବର 2 ଓ ଡିସେମ୍ବର 21ରେ ସମନ ଜାରି କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ ।ସୋରେନ ଓ କେଜ୍ରିୱାଲଙ୍କ ଗିରଫ ଆଶଙ୍କା ବଢୁଥିବାବେଳେ ଚାକିରି ପାଇଁ ଜମି ଦୁର୍ନୀତିକୁ ନେଇ ବଢିଛି ଲାଲୁ ପରିବାର ସଂକଟ । ସୋମବାର ଆରଜେଡି ସୁପ୍ରିମୋ ତଥା ପୂର୍ବତନ ରେଳମନ୍ତ୍ରୀ ଲାଲୁ ପ୍ରସାଦଙ୍କ ପରେ ମଙ୍ଗଳବାର ପୁଅ ତେଜସ୍ବୀଙ୍କୁ ଜେରା କରି ଦୁର୍ନୀତି ମାମଲାରେ ଏକାଧିକ ପ୍ରମାଣ ହାତେଇଛି ପ୍ରବର୍ତ୍ତନ ନିର୍ଦ୍ଦେଶାଳୟ । କୌଣସି ମୁହୂର୍ତ୍ତରେ ବି ଗିରଫ ହୋଇପାରନ୍ତି ତେଜସ୍ବୀ ଯାଦବ ।
ଅଧିକ ପଢ଼ନ୍ତୁ ଦେଶ ଖବର:
