କ'ଣ ଆପଣଙ୍କର ବେବି ହେବାକୁ ଯାଉଛନ୍ତି କି ? ସିଜରିଆନ ନା ନର୍ମାଲ କେଉଁଟି ନିରାପଦ ? ଅନ୍ୟକୁ ଏକଥା ଗୁଡା ପଚାରିବା ହୁଏତ ବହୁତ ସହଜ । କିନ୍ତୁ ଯେତେବେଳେ ନିଜ କଥା ଆସେ ସେତେବେଳେ ଏହି ମୁହୂର୍ତ୍ତ ଗୁଡିକ କେତେ ଗୁରୁତ୍ୱପୂର୍ଣ୍ଣ ତାହା ସେତେବେଳେ ଜଣାପଡେ । ଆଜିକାଲି ନର୍ମାଲ ଡେଲିଭରି କମ୍ ସି - ସେକ୍ସନ ବହୁତ ହେଉଛି ।

ଏଥିପାଇଁ ଡାକ୍ତରମାନେ ମଧ୍ୟ ପୂର୍ବରୁ ହିଁ ଡେଟ୍ ଦେଇ ଦେଉଛନ୍ତି । ହେଲେ ଆସାମର ଜଣେ ବରିଷ୍ଠ ଚିକିତ୍ସକ 10 ଘଣ୍ଟା ମଧ୍ୟରେ 21ଟି ସି ସେକ୍ସନ କରି ଚର୍ଚ୍ଚାକୁ ଆସିଛନ୍ତି । ମାଆ ଓ ଶିଶୁର ସ୍ୱାସ୍ଥ୍ୟ, ନିରାପତ୍ତାକୁ ନେଇ ଚିନ୍ତା ପ୍ରକଟ କରିଛନ୍ତି ଜିଲ୍ଲା କମିସନର । ବରିଷ୍ଠ ସ୍ତ୍ରୀରୋଗ ବିଶେଷଜ୍ଞ ଡାକ୍ତର କାନ୍ତେଶ୍ୱର ବୋରଦୋଲୋଇଙ୍କୁ ଏହି ନୋଟିସ୍ ଦିଆଯାଇଛି ।

ସୂଚନାନୁସାରେ ଡାକ୍ତର ଜଣଙ୍କ ଓଟିରେ ସେପ୍ଟେମ୍ବର 5 ଅପରାହ୍ନ 3 ଟା 40 ରୁ ସେପ୍ଟେମ୍ବର 6 ରାତି 1 ଟା 50 ପର୍ଯ୍ୟନ୍ତ 10 ଘଣ୍ଟା ମଧ୍ୟରେ 21ଟି ଜରୁରୀକାଳୀନ ଲୋୟର ସେଗମେଣ୍ଟ ସିଜରିଆନ ସେକ୍ସନ ଡେଲିଭରି କରିଥିଲେ । ଡାକ୍ତରଙ୍କୁ ପ୍ରତ୍ୟେକ ମାମଲାର ପୃଥକ୍ ବିବରଣୀ ଦାଖଲ କରିବାକୁ କୁହାଯାଇଛି । ହେଲେ ଡାକ୍ତର ଜଣଙ୍କ ତାଙ୍କ ଯୁକ୍ତି ବାଢିଛନ୍ତି । ତାଙ୍କ କହିବା କଥା ତାଙ୍କ ଅଭିଜ୍ଞତା ଅନୁସାରେ ସେ ଏକ ସୀମିତ ସମୟ ମଧ୍ୟରେ ଏକାଧିକ ଅସ୍ତ୍ରୋପଚାର କରିବାକୁ ସମ୍ପୂର୍ଣ୍ଣ ସକ୍ଷମ ।

ସାଧାରଣ ସିଜରିଆନ୍ ପ୍ରକ୍ରିୟା 25 ମିନିଟ୍ ସମୟ ନେଇଥାଏ, କିନ୍ତୁ କମ୍ ଜଟିଳ କେସ୍ ଗୁଡିକରେ 15 ମିନିଟ୍ ସମୟ ଲାଗେ । ସେ କରିଥିବା 21 ଟି ଡେଲିଭରି କେସ୍ ରୁ 19 ଜଣ ମା ଛୁଆ ସୁରକ୍ଷିତ ଅଛନ୍ତି । ତାଙ୍କୁ ସୁସ୍ଥ ଅବସ୍ଥାରେ ଡିସଚାର୍ଜ କରାଯାଇଛି । ଏତେ ବର୍ଷ ଚାକିରି ପରେ ତାଙ୍କ ଅଭିଜ୍ଞତାକୁ ନେଇ ଏମିତି ପ୍ରଶ୍ନ ତାଙ୍କୁ କଷ୍ଟ ଦେଇଛି ବୋଲି ସେ କହିଛନ୍ତି ।