Success Story / ଅଟୋ ଚାଳକ ବାପାଙ୍କ ସ୍ୱପ୍ନ ପୂରଣ: କୋଟାରୁ ମେଡିକାଲ୍ କଲେଜ୍, ପରିଶ୍ରମରେ ଲେଖିଲେ ସଫଳତା କାହାଣୀ

ସୀମିତ ସମ୍ବଳ ମଧ୍ୟରେ ପରିଶ୍ରମ ଓ ଦୃଢ଼ ଲକ୍ଷ୍ୟ ରଖି ସଫଳତା ହାସଲ କରିଛନ୍ତି ଉତ୍ତରପ୍ରଦେଶର ଜୌନପୁର ଜିଲ୍ଲା ଦେବକୀପୁର ଗାଁର ପ୍ରଭାତ କୁମାର ଯାଦବ । NEET UG 2026ରେ ୬୨୭ ମାର୍କ ରଖି ସେ ଅଲ୍ ଇଣ୍ଡିଆ ରାଙ୍କ ୩୮୬୪ ହାସଲ କରିଛନ୍ତି । ଏହି ସଫଳତା ପରେ ପ୍ରଭାତ ଲକ୍ଷ୍ନୌସ୍ଥିତ କିଙ୍ଗ ଜର୍ଜ ମେଡିକାଲ୍ ୟୁନିଭର୍ସିଟି (KGMU)ରେ MBBS ପଢ଼ିବାର ସୁଯୋଗ ପାଇଛନ୍ତି ।

ପ୍ରଭାତଙ୍କ ସଫଳତା ପଛରେ ରହିଛି ତାଙ୍କ ବାପାଙ୍କ ପ୍ରାୟ ଦୁଇ ଦଶନ୍ଧିର ପରିଶ୍ରମ, ପରିବାରର ସହଯୋଗ ଏବଂ କୋଟାରେ ମିଳିଥିବା କୋଚିଂ । ପ୍ରଭାତଙ୍କ ବାପା ମହେନ୍ଦ୍ର କୁମାର ଯାଦବ ଗତ ପ୍ରାୟ ୨୦ ବର୍ଷ ଧରି ମୁମ୍ବାଇରେ ଅଟୋ ରିକ୍ସା ଚଳାଇ ପରିବାରର ଭରଣପୋଷଣ କରୁଛନ୍ତି । ପରିବାରଠାରୁ ଦୂରରେ ଏକ ଛୋଟ ଚାଳିରେ ରହି ସେ ପୁଅର ପାଠପଢ଼ା ପାଇଁ ଅର୍ଥ ଯୋଗାଇ ଆସୁଥିଲେ ।

ପ୍ରଭାତଙ୍କ ଦାଦା ଇନ୍ଦ୍ର ବାହାଦୁର ଯାଦବ, ମା’ ବଂଶରାଜୀ ଏବଂ ଭାଇଭଉଣୀମାନେ ଗାଁରେ ରହୁଛନ୍ତି । ପ୍ରଭାତଙ୍କ ସଫଳତାର ଖବର ପହଞ୍ଚିବା ପରେ ପରିବାରରେ ଖୁସିର ମାହୋଲ ଦେଖିବାକୁ ମିଳିଛି । ସୋସିଆଲ୍ ମିଡିଆରେ ଭାଇରାଲ୍ ଭିଡିଓରେ ବାପା ଭାବବିହ୍ୱଳ ହୋଇଥିବା ବେଳେ ଦାଦା ନାତିର ସଫଳତାରେ ଖୁସିରେ ନାଚୁଥିବା ଦେଖାଯାଇଛି ।

ଗାଁରୁ କୋଟା, କୋଟାରୁ ମେଡିକାଲ୍ କଲେଜ
ପ୍ରଭାତ ନିଜ ଗାଁରେ ରହି ପ୍ରାରମ୍ଭିକ ଶିକ୍ଷା ଶେଷ କରିଥିଲେ । ଦଶମ ଶ୍ରେଣୀରେ ସେ ୮୯.୪୪ ପ୍ରତିଶତ ଏବଂ ଦ୍ୱାଦଶରେ ୮୩.୪୪ ପ୍ରତିଶତ ମାର୍କ ରଖିଥିଲେ । ଡାକ୍ତର ହେବାର ଲକ୍ଷ୍ୟ ନେଇ ସେ ପ୍ରାୟ ଦୁଇ ବର୍ଷ ଧରି NEET ପାଇଁ ପ୍ରସ୍ତୁତି କରିଥିଲେ ।

ପରେ ସେ କୋଟା ଯାଇ ଆଲେନ୍ କ୍ୟାରିୟର ଇନଷ୍ଟିଚ୍ୟୁଟ୍‌ର କ୍ଲାସରୁମ୍ ପ୍ରୋଗ୍ରାମରେ NEET ପ୍ରସ୍ତୁତି ନେଇଥିଲେ । ତାଙ୍କୁ ଅନୁଷ୍ଠାନ ପକ୍ଷରୁ ୫୦ ପ୍ରତିଶତ ଫିସ୍ ରିହାତି ମିଳିଥିଲା । ବାକି ଫିସ୍ ମଧ୍ୟ ତାଙ୍କ ବାପା କିସ୍ତିରେ ପୈଠ କରିଥିଲେ । କୋଟାରେ ପଢ଼ିବା ସମୟରେ ପ୍ରଭାତଙ୍କ ରହିବା ଓ ଖାଇବା ବ୍ୟବସ୍ଥା ତାଙ୍କ ମାମୁଁ ଦୟାରାମ ଯାଦବ କରିଥିଲେ ।

ଦ୍ୱିତୀୟ ପ୍ରୟାସରେ ବଡ଼ ସଫଳତା
NEETର ପ୍ରଥମ ପ୍ରୟାସରେ ପ୍ରଭାତ ୫୦୪ ମାର୍କ ପାଇଥିଲେ । ପ୍ରଥମ ପ୍ରୟାସର ଫଳାଫଳ ପରେ ନିଜ ଦୁର୍ବଳତାକୁ ଚିହ୍ନଟ କରି ସେ ପ୍ରସ୍ତୁତିକୁ ଆହୁରି ମଜବୁତ କରିଥିଲେ । ଏହାର ଫଳ NEET UG 2026ରେ ମିଳିଛି । ସେ ୬୨୭ ମାର୍କ ସହ ଅଲ୍ ଇଣ୍ଡିଆ ରାଙ୍କ ୩୮୬୪ ହାସଲ କରିଛନ୍ତି ।

ପ୍ରଭାତ କହିଛନ୍ତି ଯେ ତାଙ୍କ ସଫଳତାରେ ପରିବାରର ପରିଶ୍ରମ ଓ ସମର୍ଥନ ସହ କୋଟାରେ ମିଳିଥିବା ମାର୍ଗଦର୍ଶନର ବଡ଼ ଭୂମିକା ରହିଛି । ଆଗାମୀ ଦିନରେ ଜଣେ ଭଲ ଡାକ୍ତର ହୋଇ ନିଜ ଗାଁ ଓ ସମାଜର ସେବା କରିବା ତାଙ୍କ ଲକ୍ଷ୍ୟ ।

ପ୍ରଭାତଙ୍କ ଏହି ସଫଳତାରେ ଦେବକୀପୁର ସମେତ ଆଖପାଖର ପ୍ରାୟ ଚାରିଟି ଗାଁରେ ମଧ୍ୟ ଖୁସିର ମାହୋଲ ସୃଷ୍ଟି ହୋଇଛି । ସମ୍ପର୍କୀୟ, ଗ୍ରାମବାସୀ ଓ ଅଞ୍ଚଳବାସୀ ପରିବାରକୁ ଅଭିନନ୍ଦନ ଜଣାଉଛନ୍ତି ।