ଅନେକ ତର୍କ ବିତର୍କ, ଆରୋପ ପ୍ରତ୍ୟାରୋପ ପରେ ଶେଷରେ ସଫଳ ହେଲା। ଆଉ ଆଇନରେ ପରିଣତ ହେଲା ଓ୍ୱକଫ୍ ସଂଶୋଧିତ ବିଲ୍। ଓ୍ୱକଫ ସଂଶୋଧିତ ବିଲକୁ ମିଳିଲା ରାଷ୍ଟ୍ରପତିଙ୍କ ମଞ୍ଜୁରୀ।
ସଂସଦର ଉଭୟ ଗୃହରେ ବିଲ୍ ପାସ୍ ପରେ ମଞ୍ଜୁରୀ ଦେଲେ ରାଷ୍ଟ୍ରପତି। ଏନେଇ ଖୁବଶୀଘ୍ର ପ୍ରକାଶ ପାଇବ ବିଜ୍ଞପ୍ତି। ରାଜ୍ୟସଭାରେ ୧୭ ଘଣ୍ଟା ଓ ଲୋକସଭାରେ ୧୩ ଘଣ୍ଟା ଧରି ଏହି ଓ୍ୱକଫ୍ ବିଲ୍ ଉପରେ ବିତର୍କ ଚାଲିଥିଲା। ବିରୋଧୀ ଏହି ବିଲକୁ ବିରୋଧ ମଧ୍ୟ କରିଥିଲେ। ହେଲେ ଶେଷରେ ଆଇନରେ ପରିଣତ ହୋଇଛି ଏହି ବିଲ୍।
ଏହି ନୂତନ ଆଇନକୁ କଂଗ୍ରେସ, AIMIM ଏବଂ ଆମ ଆଦମୀ ପାର୍ଟି (AAP) ପୃଥକ ପୃଥକ ଆବେଦନ ସହିତ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛନ୍ତି। ଦେଶର ବିଭିନ୍ନ ରାଜ୍ୟରେ ଅନେକ ମୁସଲିମ ସଂଗଠନ ମଧ୍ୟ ଏହାର ପ୍ରତିବାଦ କରୁଛନ୍ତି।
କେନ୍ଦ୍ର ସରକାରଙ୍କ ଅନୁଯାୟୀ, ଏହି ଆଇନ ମୁସଲମାନ ବିରୋଧୀ ନୁହେଁ ଏବଂ ଏହାର ଉଦ୍ଦେଶ୍ୟ ୱାକଫ ସମ୍ପତ୍ତିର ଭେଦଭାବ ଏବଂ ଅପବ୍ୟବହାରକୁ ରୋକିବା।
କେତେ ଭୋଟ୍ ପାଇଲା: ଏହି ଆଇନ ଉପରେ ଚିନ୍ତା ପ୍ରକାଶ କରିବା ପାଇଁ ଅଲ୍ ଇଣ୍ଡିଆ ମୁସଲିମ୍ ପର୍ସନାଲ ଲ’ ବୋର୍ଡ (AIMPLB) ମଧ୍ୟ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସହ ଏକ ଜରୁରୀ ବୈଠକ କରିବାକୁ ଅନୁରୋଧ କରିଥିଲା।
ଲୋକସଭାରେ ୱାକଫ ସଂଶୋଧନ ବିଲ୍ ସପକ୍ଷରେ ୨୮୮ଟି ଭୋଟ ପଡ଼ିଥିଲା ଏବଂ ବିପକ୍ଷରେ ୨୩୨ଟି ଭୋଟ ପଡ଼ିଥିଲା।ଯେତେବେଳେ ରାଜ୍ୟସଭାରେ ବିଲ୍ ସପକ୍ଷରେ ୧୨୮ ଏବଂ ବିପକ୍ଷରେ ୯୫ ଭୋଟ ପଡ଼ିଥିଲା। ରାଜ୍ୟସଭାରେ ବିରୋଧୀ ଦଳ ଆଣିଥିବା ସମସ୍ତ ସଂଶୋଧନ ପ୍ରସ୍ତାବକୁ ଭଏସ୍ ଭୋଟ ଦ୍ୱାରା ଖାରଜ କରାଯାଇଥିଲା।
ଆନ୍ଦୋଳନର ଚେତାବନୀ: ଅଲ୍ ଇଣ୍ଡିଆ ମୁସଲିମ୍ ପର୍ସନାଲ୍ ଲ’ ବୋର୍ଡ (AIMPLB) ଶନିବାର (୫ ଏପ୍ରିଲ୍, ୨୦୨୫) ଏହି ବିଲ୍ ବିରୋଧରେ ଦେଶବ୍ୟାପୀ ଆନ୍ଦୋଳନ କରିବାକୁ ଚେତାବନୀ ଦେଇଛି।
AIMPLB ଦିଲ୍ଲୀ, ମୁମ୍ବାଇ, କୋଲକାତା, ହାଇଦ୍ରାବାଦ, ବେଙ୍ଗାଲୁରୁ, ଚେନ୍ନାଇ, ବିଜୟୱାଡା, ମଲାପ୍ପୁରମ, ପାଟନା, ରାଞ୍ଚି, ମାଲେରକୋଟଲା ଏବଂ ଲକ୍ଷ୍ନୌରେ ବିଶାଳ ପ୍ରତିବାଦ କରିବ।
କଂଗ୍ରେସ ରାଜ୍ୟସଭା ସାଂସଦ ଅଭିଷେକ ମନୁ ସିଂଘଭି କହିଛନ୍ତି, ‘ଶାସକ ଦଳ ବହୁମତକୁ ଅପବ୍ୟବହାର କରିଛି ଏବଂ ବିଲ୍‌କୁ ବଳପୂର୍ବକ ଲାଗୁ କରାଯାଇଛି।’ ହେଲେ ସରକାର କହିଛନ୍ତି ଯେ ଏହି ଆଇନ ମୁସଲିମ ମହିଳାମାନଙ୍କୁ ଲାଭ ଦେବ ଏବଂ ୱାକଫ ସମ୍ପତ୍ତି ପରିଚାଳନାରେ ସ୍ୱଚ୍ଛତା ସୁନିଶ୍ଚିତ କରିବ।
ୱାକଫ ସଂଶୋଧନ ବିଲ୍‌କୁ ଗୋଟିଏ ମାସ ପୂର୍ବରୁ ନବୀନ ପଟ୍ଟନାୟକଙ୍କ ଦଳ ବିଜୁ ଜନତା ଦଳ (ବିଜେଡି) ବିରୋଧ କରିଥିଲା। ତଥାପି, ବିଲ୍ ଉପରେ ଆଲୋଚନା ପରେ, ବିଜେଡି ଦଳର କିଛି ସାଂସଦ ଏହି ବିଲ୍ ବିପକ୍ଷରେ ଭୋଟ ଦେଇଥିବା ବେଳେ, କିଛି ସାଂସଦ ସପକ୍ଷରେ ଭୋଟ ଦେଇଛନ୍ତି।

Argus News | argus news | Odisha Latest News, Breaking News, Trending News, Live TV