Shocking Crime / ଦିନ ମଜୁରୀ ବେଳେ ପ୍ରେମ, ପତ୍ନୀର ବିରୋଧରୁ ୨୦ ହଜାର ନେଇ ସାଙ୍ଗ ହାତକୁ ଟେକି ଦେଲା

ନୂଆଦିଲ୍ଲୀ: ଛତିଶଗଡ଼ରେ ଦିନ ମଜୁରୀ ବେଳେ ପ୍ରେମ । ଉତ୍ତରପ୍ରଦେଶର ବାନ୍ଦାରେ ପ୍ରେମିକାକୁ ବିକ୍ରି । ମାତ୍ର ୨୦ ହଜାର ଟଙ୍କାରେ ସାଙ୍ଗ ହାତକୁ ଟେକି ଦେଲା ପ୍ରେମିକ । ପ୍ରେମ, ପ୍ରତାରଣାର ଏ ଘଟଣାରେ ପୋଲିସ ମୋଟ ୪ ଜଣଙ୍କୁ ଗିରଫ କରିଛି ।

ସୂଚନା ଅନୁସାରେ, ଯୁବକ ଜଣଙ୍କ ଦିନ ମଜୁରି ଖଟିବା ଲାଗି ଛତିଶଗଡ଼ ଆସିଥିଲେ । ସେଠାରେ ଜଣେ ଯୁବତୀଙ୍କୁ ଭଲ ପାଇ ବସିଥିଲେ । ପରେ ଦୁହିଁଙ୍କ ମଧ୍ୟରେ ସମ୍ପର୍କ ବଢ଼ିଥିଲା । ଯାହାପରେ ଯୁବତୀଙ୍କୁ ନେଇ ଘରେ ପହଞ୍ଚିଥିଲେ ଯୁବକ । ଯାହାକୁ ବିରୋଧ କରିଥିଲେ ପତ୍ନୀ । ବିରୋଧ, ବିବାଦ ପରେ ଅଭିଯୁକ୍ତ ଯୁବକ, ଯୁବତୀ ଜଣଙ୍କୁ ୨୦ ହଜାର ଟଙ୍କାରେ ବିକ୍ରି କରି ଦେଇଥିବା ଅଭିଯୋଗ ହୋଇଛି ।

ଘଟଣା କେବଳ ଯୁବତୀଙ୍କୁ ଥରୁଟିଏ ବିକ୍ରିରେ ସରିନି । ଅଭିଯୋଗ ଅନୁସାରେ, ପ୍ରଥମଥର ବିକ୍ରିରେ ସମ୍ପୂର୍ଣ୍ଣ ଟଙ୍କା ନ ମିଳିବାରୁ ପୁଣି ଅନ୍ୟ ଜଣଙ୍କୁ ବିକ୍ରି କରାଯାଇଛି । କଥା ପୋଲିସ କାନରେ ପଡ଼ିବା ପରେ ଯୁବତୀ ଜଣଙ୍କ ଉଦ୍ଧାର ହୋଇଛନ୍ତି । ମାମଲାରେ ମୋଟ ୪ ଜଣଙ୍କୁ ଗିରଫ କରିଛି ପୋଲିସ ।

ଏଥିସହ ପଢ଼ନ୍ତୁ: ମୃତ ଦିବ୍ୟାଙ୍କ ଭଉଣୀ ପ୍ରଜ୍ଞା ଖୋଲିଲେ ରହସ୍ୟ: ଚତୁର୍ଥୀ ରାତିରେ ଏମିତି କରିଥିଲେ ମାନସ... 

ମୁଖ୍ୟ ଅଭିଯୁକ୍ତ ବିନୟ, ଛତିଶଗଡ଼ର ଏକ ଲୁହା କାରଖାନାରେ ଶ୍ରମିକ ବାବେ କାମ କରୁଥିଲା । ସେଠାରେ ସେ ଯୁବତୀଙ୍କ ପ୍ରେମରେ ପଡ଼ିଥିଲା । ଏନେଇ ବିନୟଙ୍କ ପତ୍ନୀ ଜାଣିବା ପରେ ଯୁବତୀଙ୍କୁ ରାମଭବନଙ୍କୁ ୨୦ ହଜାର ଟଙ୍କାରେ ବିକ୍ରି କରି ଦେଇଥିଲା ।

ପୋଲିସର ପଚରାଉଚରା ବେଳେ ଜଣାପଡ଼ିଛି, ଯୁବତୀଙ୍କ ବଦଳରେ ରାମଭବନ ସମ୍ପୂର୍ଣ୍ଣ ୨୦ ହଜାର ଟଙ୍କା ଦେଇ ନଥିଲେ । ଫଳରେ ବିନୟ ପୁଣି ଥରେ ଯୁବତୀଙ୍କୁ ଗରିବ ଦାସଙ୍କୁ ବିକ୍ରି କରି ଦେଇଥିଲେ । ଏଥିରେ ଉଦିତ୍ ନାମକ ଅନ୍ୟ ଜଣେ ଯୁବକଙ୍କ ସମ୍ପୃକ୍ତି ଥିବା ଜଣାପଡ଼ିବା ପରେ ପୋଲିସ ତାଙ୍କୁ ବି ଗିରଫ କରିଛି ।

ପୋଲିସ ତଦନ୍ତରେ ଯୁବତୀଙ୍କୁ ବିକ୍ରିରେ ବିନୟ, ରାମଭବନ, ଗରିବ ଦାସ ଓ ଉଦିତ୍‌ଙ୍କ ସମ୍ପୃକ୍ତି ରହିଛି । ଯୁବତୀଙ୍କୁ ବିକ୍ରି ନେଇ ପୋଲିସକୁ ୧୧୨ ହେଲ୍ପଲାଇନ୍‌ରେ କଲ୍ ଆସିଥିଲା । ମାନବ ଚାଲାଣ ଅଭିଯୋଗ ପରେ ପୋଲିସ ସକ୍ରିୟ କାର୍ଯ୍ୟାନୁଷ୍ଠାନ ଗ୍ରହଣ କରି ଯୁବତୀଙ୍କୁ ଉଦ୍ଧାର କରି ୱାନ୍ ଷ୍ଟପ୍ ସେଣ୍ଟରରେ ରଖାଯାଇଛି ।