ସୋମବାର ଗୁଜରାଟର ସୁରତ ବିମାନବନ୍ଦରରେ ଏକ ଅଜବ ଘଟଣା ଦେଖିବାକୁ ମିଳିଥିଲା। ସୁରଟରୁ ଜୟପୁର ଯାଉଥିବା ଏକ ଇଣ୍ଡିଗୋ ବିମାନ ମହୁମାଛି ଯୋଗୁ ଠିକ ସମୟରେ ଉଡ଼ାଣ କରି ପାରି ନଥିଲା। ଅନେକ ମହୁମାଛି ବିମାନର ଖୋଲା ଲଗେଜ ଦ୍ୱାରକୁ ଆକ୍ରମଣ କରିଥିଲେ, ଯାହା ଫଳରେ ବିମାନଟି ୧ ଘଣ୍ଟା ବିଳମ୍ବରେ ଉଡିଥିଲା। ସୋମବାର ୪ଟା୨୦ ରେ ସୁରତରୁ ଜୟପୁର ଯାଉଥିବା ଇଣ୍ଡିଗୋର ଏୟାରବସ ବିମାନ A320 ଜୟପୁର ପାଇଁ ଉଡ଼ାଣ ଭରିବାକୁ ଥିଲା। କିନ୍ତୁ, ମହୁମାଛି ଯୋଗୁ ଏହା ବିଳମ୍ବ ହୋଇଥିଲା ଏବଂ ବିମାନଟି ୧ ଘଣ୍ଟା ପରେ ୫ଟା୨୬ରେ ସୁରତ ବିମାନବନ୍ଦରରୁ ଉଡ଼ିଥିଲା। ଏପର୍ଯ୍ୟନ୍ତ ମିଳିଥିବା ସୂଚନା ଅନୁଯାୟୀ, ସମସ୍ତ ଯାତ୍ରୀ ବିମାନରେ ଚଢ଼ି ସାରିଥିଲେ ଏବଂ ସେମାନଙ୍କର ଲଗେଜ ମଧ୍ୟ ରଖାଯାଇଥିଲା। ତା’ପରେ ହଠାତ ଖୋଲା ଲଗେଜ ଦ୍ୱାର ଉପରେ ମହୁମାଛି ବସି ପଡ଼ିଥିଲେ। ଏହି ଘଟଣା ପରେ ବିମାନବନ୍ଦରରେ ହଇଚଇ ସୃଷ୍ଟି ହୋଇଥିଲା।

ଶେଷରେ, ମହୁମାଛିମାନଙ୍କୁ ଘଉଡ଼ାଇବା ପାଇଁ ଧୂଆଁର ସାହାଯ୍ୟ ନିଆଯାଇଥିଲା, କିନ୍ତୁ ଏହି ପ୍ରୟାସ ମଧ୍ୟ ବିଫଳ ପ୍ରମାଣିତ ହୋଇଥିଲା। ଏହା ପରେ, ଅଗ୍ନିଶମ ବିଭାଗ ମଧ୍ୟ ସତର୍କ ହୋଇଗଲା। ଅଗ୍ନିଶମ ବାହିନୀର କର୍ମଚାରୀମାନେ ରନୱେକୁ ଯାଇ ମହୁମାଛିମାନଙ୍କ ଉପରେ ପାଣି ସିଞ୍ଚନ କରିଥିଲେ, ଯାହା ପରେ ମହୁମାଛିମାନେ ସେଠାରୁ ଚାଲିଯାଇଥିଲେ। ତଥାପି, ଏହି ସମ୍ପୂର୍ଣ୍ଣ ପ୍ରକ୍ରିୟା ପ୍ରାୟ ୧ ଘଣ୍ଟା ସମୟ ନେଇଥିଲା। ମହୁମାଛିମାନେ ଚାଲିଯିବା ପରେ, କର୍ମଚାରୀମାନେ ଆଶ୍ୱସ୍ତିର ନିଶ୍ୱାସ ମାରିଥିଲେ, ଯାହା ପରେ ATS ମଧ୍ୟ ଉଡ଼ାଣ ପାଇଁ ବିମାନକୁ ସବୁଜ ସଙ୍କେତ ଦେଇଥିଲା। ଏପର୍ଯ୍ୟନ୍ତ ଏହି ଘଟଣାକୁ ନେଇ ଇଣ୍ଡିଗୋ ପକ୍ଷରୁ କୌଣସି ପ୍ରତିକ୍ରିୟା ଆସିନାହିଁ। ସୁରତରୁ ଉଡ଼ାଣ ଆରମ୍ଭ କରିବା ପରେ, ବିମାନଟି ୧ ଘଣ୍ଟା ବିଳମ୍ବରେ ଜୟପୁରରେ ଅବତରଣ କରିଥିଲା। ସମସ୍ତ ଯାତ୍ରୀ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି।