Hostel Menu / ତାମିଲନାଡୁ ସରକାରୀ ହଷ୍ଟେଲ୍ ମେନୁରେ ବିଫ୍ ସାମିଲ ଦାବିକୁ ନେଇ ବିବାଦ

ତାମିଲନାଡୁର ସରକାରୀ ହଷ୍ଟେଲ୍‌ଗୁଡ଼ିକର ଖାଦ୍ୟ ମେନୁରେ ବିଫ୍ ସାମିଲ କରିବା ଦାବିକୁ ନେଇ ନୂଆ ଚର୍ଚ୍ଚା ଆରମ୍ଭ ହୋଇଛି । ରାଜ୍ୟର ସାମାଜିକ ନ୍ୟାୟ ମନ୍ତ୍ରୀ ବନ୍ନି ଆରାସୁ ଶୁକ୍ରବାର କହିଛନ୍ତି ଯେ କିଛି ଛାତ୍ର ସରକାରୀ ହଷ୍ଟେଲ୍‌ର ମେନୁରେ ବିଫ୍ ସାମିଲ କରିବାକୁ ଦାବି କରିଛନ୍ତି । ଏନେଇ ଅଧିକାରୀମାନଙ୍କ ସହ ଆଲୋଚନା ପରେ ଖୁବ୍‌ଶୀଘ୍ର ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି ।

ବନ୍ନି ଆରାସୁ ସୈଦାପେଟ୍‌ସ୍ଥିତ ଏମ୍‌.ସି. ରାଜା ସୋସିଆଲ୍ ଜଷ୍ଟିସ୍ ହଷ୍ଟେଲ୍‌ର ସୁବିଧା ଓ ବ୍ୟବସ୍ଥାର ସମୀକ୍ଷା କରିଥିଲେ । ଏହା ପରେ ସେ ସାମ୍ବାଦିକମାନଙ୍କ ସହ କଥା ହୋଇଥିଲେ । ତାଙ୍କ କହିବା ଅନୁସାରେ, ଛାତ୍ରମାନଙ୍କ ପରାମର୍ଶ ଓ ମତାମତ ଆଧାରରେ ହଷ୍ଟେଲ୍‌ର ଖାଦ୍ୟ ମେନୁରେ ପରିବର୍ତ୍ତନ କରାଯାଉଛି ।

ବନ୍ନି ଆରାସୁ କ’ଣ କହିଲେ ?
ମନ୍ତ୍ରୀ କହିଛନ୍ତି ଯେ ଗ୍ରାମାଞ୍ଚଳରୁ ଆସି ହଷ୍ଟେଲ୍‌ରେ ରହୁଥିବା କିଛି ଛାତ୍ର ନନ୍‌ଭେଜ୍‌ ସହିତ ବିଫ୍‌କୁ ମଧ୍ୟ ମେନୁରେ ସାମିଲ କରିବାକୁ ଦାବି କରିଛନ୍ତି । ବର୍ତ୍ତମାନ ସରକାରୀ ହଷ୍ଟେଲ୍‌ଗୁଡ଼ିକରେ ମଟନ୍ ଓ ଚିକେନ୍ ପରିବେଷଣ କରାଯାଉଛି । ସେହିପରି ପ୍ରତି ସପ୍ତାହରେ ବିରିୟାନି ମଧ୍ୟ ଦିଆଯାଉଛି । ଆରାସୁଙ୍କ କହିବା ଅନୁସାରେ, କିଛି ଗ୍ରାମାଞ୍ଚଳର ଛାତ୍ର ମଟନ୍‌ର ଦାମ ଅଧିକ ଥିବାରୁ ତାହା ଖାଉନାହାନ୍ତି ଏବଂ ଏହା ବଦଳରେ ବିଫ୍‌କୁ ମେନୁରେ ସାମିଲ କରିବାକୁ ଚାହୁଁଛନ୍ତି ।

ତେବେ ହଷ୍ଟେଲ୍‌ରେ ରହୁଥିବା ସମସ୍ତ ଛାତ୍ରଙ୍କ ମତ ଏକାଭଳି ନୁହେଁ। ତେଣୁ ସମସ୍ତ ପକ୍ଷର ମତାମତ ଓ ଅଧିକାରୀମାନଙ୍କ ସହ ଆଲୋଚନା ପରେ ଏନେଇ ନିଷ୍ପତ୍ତି ନିଆଯିବ ବୋଲି ମନ୍ତ୍ରୀ କହିଛନ୍ତି ।

ଛାତ୍ରଙ୍କ ମତ ଆଧାରରେ ବଦଳୁଛି ମେନୁ
ବନ୍ନି ଆରାସୁ କହିଛନ୍ତି ଯେ ବିଭାଗ ପକ୍ଷରୁ ଛାତ୍ରମାନଙ୍କ ଫିଡ୍‌ବ୍ୟାକ୍‌କୁ ଗୁରୁତ୍ୱ ଦେଇ ହଷ୍ଟେଲ୍‌ର ଖାଦ୍ୟ ମେନୁରେ ପର୍ଯ୍ୟାୟକ୍ରମେ ପରିବର୍ତ୍ତନ କରାଯାଉଛି । ପୂର୍ବରୁ ଉପମା ଓ ସେମିଆ ଖିଚୁଡ଼ି ଭଳି କିଛି ଖାଦ୍ୟକୁ ମେନୁରୁ ହଟାଇ ଇଡ୍‌ଲି ଓ ଦୋସା ଭଳି ଖାଦ୍ୟକୁ ଜଳଖିଆରେ ସାମିଲ କରାଯାଇଛି ବୋଲି ସେ କହିଛନ୍ତି ।

ବିଫ୍ ସାମିଲ ଦାବିକୁ ନେଇ ବିରୋଧ
ଏହି ଚର୍ଚ୍ଚା ମଧ୍ୟରେ ପୁଥିୟା ତାମିଲଗମ୍‌ର ପ୍ରତିଷ୍ଠାତା ତଥା ଅଧ୍ୟକ୍ଷ ଡ. କେ. କୃଷ୍ଣସାମୀ ହଷ୍ଟେଲ୍‌ ମେନୁରେ ବିଫ୍ ସାମିଲ କରିବାର ସମ୍ଭାବନା ନେଇ ମନ୍ତ୍ରୀ ବନ୍ନି ଆରାସୁଙ୍କ ବକ୍ତବ୍ୟକୁ ବିରୋଧ କରିଛନ୍ତି । କୃଷ୍ଣସାମୀ ଏନେଇ ଆପତ୍ତି ପ୍ରକାଶ କରିବା ସହ ଯଦି ସରକାର ଏଭଳି କୌଣସି ନିଷ୍ପତ୍ତି ନିଏ, ତେବେ ଏହାର ପରିଣାମ ଭଲ ହେବ ନାହିଁ ବୋଲି ଚେତାବନୀ ଦେଇଥିବା ଜଣାପଡ଼ିଛି ।

ସେ କହିଛନ୍ତି ଯେ ହଷ୍ଟେଲ୍‌ରେ ରହୁଥିବା ଛାତ୍ରଛାତ୍ରୀଙ୍କୁ ସନ୍ତୁଳିତ ଖାଦ୍ୟ ଆବଶ୍ୟକ । ମେନୁରେ ପ୍ରୋଟିନ୍ ଓ ଭିଟାମିନ୍‌ରେ ସମୃଦ୍ଧ ଖାଦ୍ୟ ସାମିଲ କରାଯିବା ଉପରେ ଗୁରୁତ୍ୱ ଦିଆଯିବା ଦରକାର ବୋଲି ସେ ମତ ଦେଇଛନ୍ତି ।

ବର୍ତ୍ତମାନ ବିଫ୍‌କୁ ହଷ୍ଟେଲ୍ ମେନୁରେ ସାମିଲ କରିବା ନେଇ କୌଣସି ଚୂଡ଼ାନ୍ତ ନିଷ୍ପତ୍ତି ହୋଇନଥିବାବେଳେ, ଛାତ୍ରମାନଙ୍କ ମତାମତ ଓ ଅଧିକାରୀମାନଙ୍କ ସହ ଆଲୋଚନା ପରେ ଏନେଇ ପଦକ୍ଷେପ ନିଆଯିବ ବୋଲି ମନ୍ତ୍ରୀ କହିଛନ୍ତି ।