Road Accident / CNG ସିଲିଣ୍ଡର ବୋଝେଇ ଟ୍ରକ୍ ଉପରେ ଭାଙ୍ଗି ପଡ଼ିଲା ବଡ଼ ଗଛ ଅଉ ତା'ପରେ...

ଉତ୍ତରପ୍ରଦେଶର ବାନ୍ଦାରେ ଶନିବାର ପ୍ରବଳ ବର୍ଷା ମଧ୍ୟରେ ଘଟିଛି ଏକ ବଡ଼ ଅଘଟଣ । ରାସ୍ତା କଡ଼ରେ ଥିବା ଏକ ବିଶାଳ ଗଛ ହଠାତ୍ ଉପୁଡ଼ି ପଡ଼ିବାରୁ ରାସ୍ତାରେ ଯାଉଥିବା CNG ସିଲିଣ୍ଡର ବୋଝେଇ ଏକ ଟ୍ରକ୍ ତଳେ ଚାପି ଯାଇଥିଲା । ଗଛଟି ଟ୍ରକ୍ ଉପରେ ପଡ଼ିବା ପରେ ଆଖପାଖରେ ଥିବା ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଥିଲା । ତେବେ ଟ୍ରକ୍‌ର ଡ୍ରାଇଭର ଓ ହେଲପର କୌଣସିମତେ ଟ୍ରକ୍‌ରୁ ଡେଇଁ ନିଜ ଜୀବନ ବଞ୍ଚାଇଥିଲେ । ଘଟଣାଟି ବାନ୍ଦାର ତିନ୍ଦୱାରୀ ଥାନା ଅଞ୍ଚଳର ତେରହୀ ମୋଡ଼ ନିକଟରେ ଥିବା ବାନ୍ଦା-ଫତେହପୁର ଟାଣ୍ଡା ନ୍ୟାସନାଲ ହାଇୱେରେ ଘଟିଛି । 

CNG ସିଲିଣ୍ଡରକୁ ନେଇ ଲୋକଙ୍କ ମଧ୍ୟରେ ଆତଙ୍କ
ଶନିବାର ଅଞ୍ଚଳରେ ମୂଷଳଧାରାରେ ବର୍ଷା ହେଉଥିଲା । ଏହି ସମୟରେ ରାସ୍ତା କଡ଼ରେ ଥିବା ବିଶାଳ ଗଛଟି ହଠାତ୍ ଉପୁଡ଼ି ହାଇୱେ ଉପରେ ପଡ଼ିଥିଲା । ଠିକ୍ ସେହି ସମୟରେ CNG ସିଲିଣ୍ଡର ନେଇ ଏକ ଟ୍ରକ୍ ସେହି ରାସ୍ତା ଦେଇ ଯାଉଥିଲା। ଗଛଟି ସିଧାସଳଖ ଟ୍ରକ୍ ଉପରେ ପଡ଼ିଥିଲା ।

ଟ୍ରକ୍‌ରେ ଥିବା ଡ୍ରାଇଭର ଓ ହେଲପର ଭୟଭୀତ ହୋଇ ତୁରନ୍ତ ଟ୍ରକ୍‌ରୁ ବାହାରି ଆସିଥିଲେ । ଟ୍ରକ୍‌ରେ CNG ସିଲିଣ୍ଡର ଥିବାରୁ ଯଦି ସିଲିଣ୍ଡର କ୍ଷତିଗ୍ରସ୍ତ ହୋଇ ଗ୍ୟାସ୍‌ରେ ନିଆଁ ଲାଗିଥାନ୍ତା, ତେବେ ବଡ଼ ଦୁର୍ଘଟଣା ଘଟିପାରିଥାନ୍ତା ବୋଲି ଘଟଣାସ୍ଥଳରେ ଥିବା ଲୋକମାନେ ଆଶଙ୍କା କରିଥିଲେ । ତେବେ ସୌଭାଗ୍ୟବଶତଃ ସେଭଳି କୌଣସି ଘଟଣା ଘଟିନଥିଲା ।

ବାଇକ୍ ମରାମତି ଦୋକାନ ମଧ୍ୟ କ୍ଷତିଗ୍ରସ୍ତ
ଗଛର ଏକ ବଡ଼ ଅଂଶ ରାସ୍ତା କଡ଼ରେ ଥିବା ଏକ ବାଇକ୍ ମେକାନିକ୍ ଦୋକାନ ଉପରେ ମଧ୍ୟ ପଡ଼ିଥିଲା । ଫଳରେ ଦୋକାନରେ ମରାମତି ପାଇଁ ରଖାଯାଇଥିବା ଅନେକ ବାଇକ୍ ଗଛ ତଳେ ଚାପି ଯାଇଥିଲା ।

ଦୋକାନୀଙ୍କ କହିବା ଅନୁସାରେ, ଏହି ବାଇକ୍‌ଗୁଡ଼ିକ ଗ୍ରାହକମାନେ ମରାମତି ପାଇଁ ଛାଡ଼ି ଯାଇଥିଲେ। ଗଛ ପଡ଼ିବା ଯୋଗୁଁ ଏବେ ସେହି ଗାଡ଼ିଗୁଡ଼ିକ ମଧ୍ୟ କ୍ଷତିଗ୍ରସ୍ତ ହୋଇଛି । ଦୋକାନ ଚାରିପାଖରେ ମଧ୍ୟ ବହୁ ପରିମାଣରେ ମାଟି ଓ ଗଛର ଡାଳପତ୍ର ଜମା ହୋଇଥିଲା ।

ହାଇୱେରେ ଲମ୍ବା ଜାମ୍, ପାଣି ଭର୍ତ୍ତି ଗାତରେ ଫସୁଛି ଗାଡ଼ି
ଗଛଟି ହାଇୱେ ଉପରେ ପଡ଼ିବା ପରେ ବାନ୍ଦା-ଫତେହପୁର ଟାଣ୍ଡା ହାଇୱେର ଉଭୟ ପାର୍ଶ୍ୱରେ ଲମ୍ବା ଟ୍ରାଫିକ୍ ଜାମ୍ ସୃଷ୍ଟି ହୋଇଥିଲା । ଦେଖୁ ଦେଖୁ ଅନେକ ଗାଡ଼ି ରାସ୍ତାରେ ଅଟକି ଯାଇଥିଲା ।

ବର୍ଷା ଯୋଗୁଁ ହାଇୱେରେ ଥିବା ବଡ଼ ବଡ଼ ଗାତରେ ପାଣି ଜମି ଯାଇଥିବାରୁ ଇ-ରିକ୍ସା ଓ ଛୋଟ ଗାଡ଼ିଗୁଡ଼ିକ ସେଥିରେ ଫସିଯାଉଛନ୍ତି। କେତେକ ଗାଡ଼ି ଭାରସାମ୍ୟ ହରାଇ ଓଲଟି ପଡ଼ୁଥିବା ମଧ୍ୟ ଜଣାପଡ଼ିଛି ।

ସ୍ଥାନୀୟ ଲୋକଙ୍କ ଅଭିଯୋଗ, ରାସ୍ତାରେ ଜଳ ଜମିବା ଓ ବଡ଼ ବଡ଼ ଗାତ ଥିବାରୁ ବର୍ଷା ସମୟରେ ଦୁର୍ଘଟଣାର ଆଶଙ୍କା ବଢ଼ିଯାଉଛି । ତେଣୁ ହାଇୱେରେ ତୁରନ୍ତ ଜଳ ନିଷ୍କାସନ ବ୍ୟବସ୍ଥା କରିବା ସହ ରାସ୍ତାର ଗାତଗୁଡ଼ିକୁ ମରାମତି କରିବାକୁ ସେମାନେ ଦାବି କରିଛନ୍ତି ।

ପୋଲିସ ଓ ବନ ବିଭାଗର ଟିମ୍ ପହଞ୍ଚିଲା
ଘଟଣାର ସୂଚନା ପାଇବା ପରେ ତିନ୍ଦୱାରୀ ଥାନା ପୋଲିସ ଓ ବନ ବିଭାଗର ଟିମ୍ ଘଟଣାସ୍ଥଳରେ ପହଞ୍ଚିଥିଲେ । ରେସ୍କ୍ୟୁ ଅଭିଯାନ ଚଳାଇ ଗଛକୁ କାଟି ରାସ୍ତାରୁ ହଟାଯାଇଥିଲା । ଏହାପରେ ହାଇୱେରେ ଯାତାୟାତ ପୁଣି ସ୍ୱାଭାବିକ କରାଯାଇଥିଲା । ତିନ୍ଦୱାରୀ ଥାନା ପ୍ରଭାରୀ ସନ୍ଦୀପ କୁମାର କହିଛନ୍ତି ଯେ, ମୂଷଳଧାରାରେ ବର୍ଷା ସମୟରେ ଏକ ଗଛ ରାସ୍ତା ଉପରେ ପଡ଼ିଯିବାରୁ ହାଇୱେରେ ଜାମ୍ ଲାଗିଥିଲା ।

ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ରେସ୍କ୍ୟୁ କରି ଗଛକୁ ହଟାଇଥିଲା । ବର୍ଷା ସମୟରେ ରାସ୍ତାର ଅନେକ ସ୍ଥାନରେ ପାଣି ଜମିଥିବାରୁ ଗାଡ଼ି ଚଳାଇବା ବେଳେ ସତର୍କ ରହିବାକୁ ସେ ଲୋକମାନଙ୍କୁ ଅପିଲ୍ କରିଛନ୍ତି ।