Student Credit Card / ୧୦ ଦିନରେ ୟୁ-ଟର୍ଣ୍ଣ ନେଲେ ସରକାର... ବଦଳିଲା ଷ୍ଟୁଡେଣ୍ଟ କ୍ରେଡିଟ୍ କାର୍ଡ ନିୟମ

ବିହାରର ସମ୍ରାଟ ସରକାର ଛାତ୍ରଛାତ୍ରୀଙ୍କୁ ପୁଣିଥରେ ବଡ଼ ରାହତ ଦେଇଛନ୍ତି । ମାତ୍ର ୧୦ ଦିନ ମଧ୍ୟରେ ସରକାର ନିଜ ନିଷ୍ପତ୍ତିରେ ୟୁ-ଟର୍ଣ୍ଣ ନେଇଛି । ଷ୍ଟୁଡେଣ୍ଟ କ୍ରେଡିଟ୍ କାର୍ଡ ଯୋଜନା ଅଧୀନରେ ଏଣିକି ଛାତ୍ର ଓ ଛାତ୍ରୀମାନେ ପୂର୍ବଭଳି ସର୍ବାଧିକ ୪ ଲକ୍ଷ ଟଙ୍କା ପର୍ଯ୍ୟନ୍ତ ସୁଧମୁକ୍ତ ଶିକ୍ଷା ଋଣ ପାଇପାରିବେ ।

ଉଚ୍ଚଶିକ୍ଷା ବିଭାଗ ଅଗଷ୍ଟ ୨୯ ତାରିଖରେ ଏନେଇ ଏକ ନୂଆ ନୋଟିଫିକେସନ୍ ଜାରି କରିଛି । ଏହା ପରେ ଅଗଷ୍ଟ ୧୯ରେ ଜାରି ହୋଇଥିବା ପୂର୍ବ ନିଷ୍ପତ୍ତିକୁ ରଦ୍ଦ କରାଯାଇଛି । ଅଗଷ୍ଟ ୧୯ର ନିଷ୍ପତ୍ତି ଅନୁସାରେ ଷ୍ଟୁଡେଣ୍ଟ କ୍ରେଡିଟ୍ କାର୍ଡ ଯୋଜନାରେ ଋଣ ସୀମା ୪ ଲକ୍ଷରୁ କମାଇ ୨ ଲକ୍ଷ ଟଙ୍କା କରାଯାଇଥିଲା ।

ବିରୋଧୀ ଉଠାଇଥିଲେ ପ୍ରଶ୍ନ
ଋଣ ରାଶି କମାଯିବାକୁ ନେଇ ବିରୋଧୀ ଦଳ ସରକାରକୁ ଘେରିଥିଲା । ଷ୍ଟୁଡେଣ୍ଟମାନଙ୍କୁ ମିଳୁଥିବା ଶିକ୍ଷା ଋଣର ସୀମା କମାଇ ଦିଆଯାଇଥିବା ନେଇ ପ୍ରଶ୍ନ ଉଠିଥିଲା । ଏହାର ମାତ୍ର ୧୦ ଦିନ ପରେ ସରକାର ପୁଣି ଋଣ ସୀମାକୁ ୪ ଲକ୍ଷ ଟଙ୍କା କରିଛନ୍ତି ।

ଉଚ୍ଚଶିକ୍ଷା ବିଭାଗ ସ୍ପଷ୍ଟ କରିଛି ଯେ ବିହାରରେ ଉଚ୍ଚଶିକ୍ଷା ପାଇଁ ଛାତ୍ରଛାତ୍ରୀମାନେ ପୂର୍ବଭଳି ବିହାର ଷ୍ଟେଟ୍ ଏଜୁକେସନ୍ ଫାଇନାନ୍ସ କର୍ପୋରେସନ୍ ମାଧ୍ୟମରେ ସର୍ବାଧିକ ୪ ଲକ୍ଷ ଟଙ୍କାର ଶିକ୍ଷା ଋଣ ପାଇପାରିବେ ।

ଏହି ପ୍ରସଙ୍ଗରେ ବିହାରର ବିରୋଧୀ ଦଳ ନେତା ତେଜସ୍ୱୀ ଯାଦବ ସମ୍ରାଟ ସରକାରଙ୍କୁ ଟାର୍ଗେଟ୍ କରିଥିଲେ । ରାଜ୍ୟର ରାଜକୋଷ ଖାଲି ହୋଇଯାଇଛି ଏବଂ ବିହାର ଋଣରେ ବୁଡ଼ି ରହିଛି ବୋଲି ସେ ଅଭିଯୋଗ କରିଥିଲେ । ଏହି କାରଣରୁ ଷ୍ଟୁଡେଣ୍ଟ କ୍ରେଡିଟ୍ କାର୍ଡ ଯୋଜନାର ରାଶି କମାଯାଇଥିବା ଏବଂ ସ୍କଲାରସିପ୍ ବନ୍ଦ କରାଯାଉଥିବା ନେଇ ସେ ଦାବି କରିଥିଲେ । ଏହା ଦ୍ୱାରା ଉଚ୍ଚଶିକ୍ଷା ଜାରି ରଖିବାକୁ ଚାହୁଁଥିବା ଗରିବ ଓ ମଧ୍ୟବିତ୍ତ ପରିବାରର ଛାତ୍ରଛାତ୍ରୀମାନେ ସମସ୍ୟାରେ ପଡ଼ୁଥିବା ସେ କହିଥିଲେ ।

ସରକାର ଦେଇଥିଲା କ'ଣ ସଫେଇ ?
ବିରୋଧୀଙ୍କ ଅଭିଯୋଗ ମଧ୍ୟରେ ଅଗଷ୍ଟ ୧୯ରେ ଜାରି ହୋଇଥିବା ନୋଟିଫିକେସନ୍ ନେଇ ସରକାର ସଫେଇ ଦେଇଥିଲା । ସରକାର କହିଥିଲା ଯେ ଶିକ୍ଷା ଋଣର ମୋଟ ରାଶି କମାଯାଇନାହିଁ, ବରଂ ଋଣ ପ୍ରଦାନର ପ୍ରକ୍ରିୟାରେ ପରିବର୍ତ୍ତନ କରାଯାଇଛି ।

ସରକାରଙ୍କ କହିବା ଅନୁସାରେ, ପୂର୍ବରୁ ରାଜ୍ୟ ଶିକ୍ଷା ଅର୍ଥ ନିଗମ ଷ୍ଟୁଡେଣ୍ଟ କ୍ରେଡିଟ୍ କାର୍ଡ ଯୋଜନା ମାଧ୍ୟମରେ ୪ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଦେଉଥିଲା । ଏହାକୁ ୨ ଲକ୍ଷ ଟଙ୍କା ପର୍ଯ୍ୟନ୍ତ କରାଯାଇଥିଲା । ଯଦି କୌଣସି ଛାତ୍ର ୨ ଲକ୍ଷ ଟଙ୍କାରୁ ଅଧିକ ଋଣ ଆବଶ୍ୟକ କରନ୍ତି, ତେବେ କେନ୍ଦ୍ର ସରକାରଙ୍କ ପିଏମ୍ ବିଦ୍ୟାଲକ୍ଷ୍ମୀ ପୋର୍ଟାଲ୍ ମାଧ୍ୟମରେ ବାଣିଜ୍ୟିକ ବ୍ୟାଙ୍କଗୁଡ଼ିକ ଜରିଆରେ ଶିକ୍ଷା ଋଣର ବ୍ୟବସ୍ଥା କରାଯିବ ବୋଲି ସରକାର ସ୍ପଷ୍ଟ କରିଥିଲା । ତେବେ ଅଗଷ୍ଟ ୨୯ର ନୂଆ ନୋଟିଫିକେସନ୍ ପରେ ଛାତ୍ରଛାତ୍ରୀମାନେ ପୁଣି ପୂର୍ବଭଳି ୪ ଲକ୍ଷ ଟଙ୍କା ପର୍ଯ୍ୟନ୍ତ ସୁଧମୁକ୍ତ ଶିକ୍ଷା ଋଣ ପାଇବାର ରାସ୍ତା ସ୍ପଷ୍ଟ ହୋଇଛି ।