ଅର୍ଗସ ବ୍ୟୁରୋ: ଦୁଇ ଦିନରେ ତିନି ବଡ ବଡ ବ୍ୟବସାୟୀଙ୍କୁ ହରାଇଲା ଦେଶ । ଏହା ଏକ ସାଧାରଣ ଘଟଣା ନୁହେଁ । ସେମାନେ ସାଧାରଣ ବ୍ୟବସାୟୀ ନଥିଲେ । ନିଜ ନିଜ କ୍ଷେତ୍ରରେ ବେଶ ସୁନାମ ଅର୍ଜନ କରିଥିଲେ । ବଡ ବଡ କମ୍ପାନୀକୁ ଟକ୍କର ଦେଉଥିଲେ । ଛୋଟ ବ୍ୟବସାୟକୁ କେମିତି ଜାତୀୟ ଆନ୍ତର୍ଜାତୀୟ ସ୍ତରରେ ପହଞ୍ଚାଇ ହୁଏ ସେ ବାଟ ଦେଖାଇଥିଲେ । ସଂଘର୍ଷରୁ ସଫଳତାର ସ୍ୱାଦ ଚାଖିଥିଲେ । ବ୍ୟବସାୟୀଙ୍କ ପାଇଁ ଆଦର୍ଶ ସାଜିଥିଲେ । ଆଜା ତାଙ୍କ ନିଧନରେ ପୁରା ଦେଶ ଝୁରୁଛି ।

1- ବିକାନେରୱାଲା ପ୍ରତିଷ୍ଠାତା କେଦାରନାଥ ଅଗ୍ରୱାଲ୍ । 86 ବର୍ଷ ବୟସରେ ସେ ଆଖିବୁଜିଛନ୍ତି । 1950 ଦିଲ୍ଲୀରୁ ସେ ତାଙ୍କ କ୍ୟାରିଅର ଆରମ୍ଭ କରିଥିଲେ । କିନ୍ତୁ ମୁଳଦୁଆ ଖୁବ ଆଗରୁ ପଡିଥିଲା । 1905 ମସିହାରେ ସହରର ଗଳିରେ ତାଙ୍କ ପରିବାର ଲୋକ ଏକ ମିଠା ଦୋକାନ ଖୋଲିଥିଲେ । ଏହି ଦୋକାନର ନାଁ ବିକାନେର ନମକିନ୍ ଭଣ୍ଡାର ଥିଲା ।
ଲାଲା କେଦାରନାଥ 1950 ମସିହାରେ ତାଙ୍କ ଭାଇଙ୍କ ସହ ମନରେ ଅସୁମାରୀ ସ୍ୱପ୍ନ ନେଇ ଦିଲ୍ଲୀ ଚାଲିଆସିଥିଲେ । ପ୍ରଥମେ ପ୍ରଥମେ ଦୁଇ ଭାଇ ବାଲ୍ଟିରେ ବୁଜିଆ ଓ ରସଗୋଲା ଧରି ପୁରୁଣା ଦିଲ୍ଲୀର ଗଳିରେ ବୁଲୁଥିଲେ । ଏହାପରେ ଚାନ୍ଦିନୀଚୌକରେ ଦୁହେଁ ନିଜର ଏକ ଦୋକାନ ଦେଇଥିଲେ ।

ଭାରତରେ ବିକାନେରୱାଲାଙ୍କର 60 ରୁ ଅଧିକ ଦୋକାନ ଅଛି । ଏହାବାଦ ଆମେରିକା, ନ୍ୟୁଜିଲାଣ୍ଡ, ସିଙ୍ଗାପୁର, ନେପାଲ ଓ ୟୁଏଇ ଭଳି ଦେଶରେ ମଧ୍ୟ ଏହାର ଦୋକନ ଅଛି । ତାଙ୍କ ଦକ୍ଷତା, ଦୂରଦର୍ଶିତା ଓ ନେତ୍ୱତ୍ତ୍ୱ ବେପାରକୁ ଖୁବ ଉଚ୍ଚାକୁ ନେଇଥିବାବେଳେ ତାଙ୍କ ନିଧନରେ ପୁରା ବିକାନେରୱାଲା ପରିବାର ଯେମିତି ଭାଙ୍ଗିପଡିଛି ।

2-ସେହିପରି ଓବରଏ ଗ୍ରୁପ୍ ଚେୟାରମ୍ୟାନ୍ ପ୍ରୀତି ରାଜ ସିଂ ଓବରୋଇଙ୍କର ମଙ୍ଗଳବାର ଦେହାନ୍ତ ହୋଇଛି । 94 ବର୍ଷ ବୟସରେ ସେ ଆଖିବୁଜିଛନ୍ତି । ପର୍ଯ୍ୟଟନ ଏବଂ ଆତିଥ୍ୟ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଓବରଏଙ୍କୁ ପଦ୍ମଭୂଷଣଙ୍କ ସମେତ ଅନେକ ପ୍ରମୁଖ ପୁରସ୍କାର ପ୍ରଦାନ କରାଯାଇଥିଲା । ତାଙ୍କର ଅତୁଳନୀୟ ନେତୃତ୍ୱ ଏବଂ ଦୂରଦୃଷ୍ଟି ପାଇଁ ତାଙ୍କୁ ଆନ୍ତର୍ଜାତୀୟ ବିଳାସପୂର୍ଣ୍ଣ ଟ୍ରାଭେଲ ମାର୍କେଟ (ଆଇଏଲଟିଏମ୍) ରେ ଲାଇଫ୍ ଟାଇମ୍ ଆଚିଭମେଣ୍ଟ ଆୱାର୍ଡ ମଧ୍ୟ ପ୍ରଦାନ କରାଯାଇଥିଲା ।

3-ସେହିପରି ସାହାର ଗ୍ରୁପର ମୁଖ୍ୟ ସୁବ୍ରତ ରାୟ 75 ବର୍ଷ ବୟସରେ ଆଖିବୁଜିଛନ୍ତି । ଦୀର୍ଘ ଦିନ ଧରି ଉଚ୍ଚ ରକ୍ତଚାପ ଏବଂ ମଧୁମେହ ଭଳି ଅନେକ ରୋଗରେ ପୀଡିତ ସୁବ୍ରତ ରୟଙ୍କ ହୃଦଘାତ ହେତୁ ମୃତ୍ୟୁ ଘଟିଛି । ସେ ଖୁଚୁରା, ରିଏଲ୍ ଇଷ୍ଟେଟ୍ ଏବଂ ଫାଇନାନ୍ସ, ହାଉସିଂ ଏବଂ ମିଡିଆ କ୍ଷେତ୍ରରେ ତାଙ୍କର ବ୍ୟବସାୟ ସାମ୍ରାଜ୍ୟ ବିସ୍ତାର କରିଥିଲେ ।

ଆହୁରି ପଢନ୍ତୁ ଭାରତ ଖବର...

Argus News | argus news | Odisha Latest News, Breaking News, Trending News, Live TV