Rare Ants / ଅଜବ ଚୋରି.... ସୁନା, ରୁପା କି ଟଙ୍କା ନୁହେଁ, ଚୋରି ହେଲେ ହଜାର ହଜାର ବିରଳ ପିମ୍ପୁଡ଼ିଙ୍କ ବସା

ଚୋରି କଥା ଶୁଣିଲେ ଆମ ମନକୁ ପ୍ରଥମେ ସୁନା, ରୁପା, ଟଙ୍କା କିମ୍ବା ଗହଣା କଥା ଆସିଥାଏ । କିନ୍ତୁ ଯଦି କେହି ଗହଣା ବଦଳରେ ମାଟି ତଳୁ ପିମ୍ପୁଡ଼ିଙ୍କ ପୂରା ବସା ଉଖାଡ଼ି ଚୋରି କରିନିଏ, ତେବେ ଆପଣ ନିଶ୍ଚୟ ଆଶ୍ଚର୍ଯ୍ୟ ହେବେ । ଏଭଳି ଏକ ଅଜବ ଘଟଣା ବ୍ରିଟେନରେ ଘଟିଛି । ଏକ ସୁରକ୍ଷିତ ପ୍ରାକୃତିକ ଅଭୟାରଣ୍ୟରୁ ଚୋରମାନେ ଦୁନିଆର ଅତି ବିରଳ ପ୍ରଜାତିର ପିମ୍ପୁଡ଼ିଙ୍କ ପୂରା ବସା ଚୋରି କରି ନେଇଛନ୍ତି । ଏହି ଘଟଣା ବନ୍ୟଜନ୍ତୁ ପ୍ରେମୀଙ୍କଠାରୁ ଆରମ୍ଭ କରି ପୋଲିସ ପର୍ଯ୍ୟନ୍ତ ସମସ୍ତଙ୍କୁ ଚକିତ କରିଦେଇଛି ।

ଇଂଲଣ୍ଡରୁ ଗାଏବ ହେଲା ବିରଳ ପିମ୍ପୁଡ଼ିଙ୍କ ଘର
ରିପୋର୍ଟ ଅନୁଯାୟୀ, ଏହି ଘଟଣା ଇଂଲଣ୍ଡର ଡେଭନ ଅଞ୍ଚଳରେ ଘଟିଛି । ଏଠାରେ ଥିବା ଚୁଡଲି ନାଇଟନ୍ ହିଥ୍ ନେଚର ରିଜର୍ଭ (Chudleigh Knighton Heath Nature Reserve) ରେ ଏକ ଅତ୍ୟନ୍ତ ବିରଳ ପ୍ରଜାତିର ପିମ୍ପୁଡ଼ି 'ନ୍ୟାରୋ-ହେଡେଡ୍ ଆଣ୍ଟ୍' (Narrow-headed Ant) ଦେଖିବାକୁ ମିଳନ୍ତି । ଇଂଲଣ୍ଡରେ ଏହି ପ୍ରଜାତି ପାଇଁ ଏହା ଶେଷ ଆଶ୍ରୟସ୍ଥଳୀ ବୋଲି କୁହାଯାଉଛି ।

ଅକ୍ଟୋବର ମାସର ମଧ୍ୟଭାଗରେ ଗବେଷକମାନେ ନିୟମିତ ଯାଞ୍ଚ ପାଇଁ ଅଭୟାରଣ୍ୟକୁ ଯାଇଥିଲେ । ହେଲେ ସେଠାରେ ପହଞ୍ଚିବା ପରେ ସେମାନେ ଯାହା ଦେଖିଲେ, ତାହା ସେମାନଙ୍କୁ ଆଶ୍ଚର୍ଯ୍ୟ କରିଦେଲା । ପିମ୍ପୁଡ଼ିଙ୍କ ପୁରୁଣା ବସା ଥିବା ସ୍ଥାନରେ ଏକ ବଡ଼ ଗାତ ଥିଲା ଏବଂ ମାଟିରେ କୋଦାଳରେ ଖୋଳାଯାଇଥିବା ଚିହ୍ନ ମଧ୍ୟ ରହିଥିଲା । ଚୋରମାନେ ମାଟି ଖୋଳି ପୂରା ବସାକୁ ଉଠାଇ ନେଇଥିବା ସନ୍ଦେହ କରାଯାଉଛି ।

କାହିଁକି ଏତେ ଖାସ୍ ଏହି ବିରଳ ପିମ୍ପୁଡ଼ି ?
ବନ୍ୟଜନ୍ତୁ ବିଶେଷଜ୍ଞଙ୍କ ଅନୁଯାୟୀ, ନ୍ୟାରୋ-ହେଡେଡ୍ ଆଣ୍ଟ୍ ସାଧାରଣ ପିମ୍ପୁଡ଼ି ନୁହନ୍ତି । ଏହି ପ୍ରଜାତିର ଏକ ବସାରେ ପ୍ରାୟ ୧,୦୦୦ରୁ ୫,୦୦୦ ପର୍ଯ୍ୟନ୍ତ ପିମ୍ପୁଡ଼ି ରହିପାରନ୍ତି । ଏମାନଙ୍କ ବସାରେ ଗୋଟିଏ କିମ୍ବା ଏକାଧିକ ରାଣୀ ପିମ୍ପୁଡ଼ି ମଧ୍ୟ ରହିଥାନ୍ତି । ଆଶ୍ଚର୍ଯ୍ୟର କଥା, ଗୋଟିଏ ରାଣୀ ପିମ୍ପୁଡ଼ି ପ୍ରାୟ ୨୫ ବର୍ଷ ପର୍ଯ୍ୟନ୍ତ ବଞ୍ଚିପାରେ । ତେଣୁ ଏକ ପୂରା ବସା ଚୋରି ହେବା କେବଳ କିଛି ପିମ୍ପୁଡ଼ି ହଜିଯିବା ଘଟଣା ନୁହେଁ, ବରଂ ସମଗ୍ର ପ୍ରଜାତିର ଅସ୍ତିତ୍ୱ ପ୍ରତି ବଡ଼ ବିପଦ ବୋଲି ବିଶେଷଜ୍ଞମାନେ ଚିନ୍ତା ପ୍ରକାଶ କରିଛନ୍ତି ।

ବର୍ଷ ବର୍ଷର ପରିଶ୍ରମ ନଷ୍ଟ
ଡେଭନ୍ ୱାଇଲ୍ଡଲାଇଫ୍ ଟ୍ରଷ୍ଟର ଅଧିକାରୀ ଜୁଲିଆ ବାଲଫୋର କହିଛନ୍ତି ଯେ, ଏହି ଚୋରି ଜଙ୍ଗଲୀ ପକ୍ଷୀଙ୍କ ଅଣ୍ଡା ଚୋରାଚାଲାଣ ଭଳି ଗମ୍ଭୀର ଘଟଣା । ଏହି ପ୍ରଜାତିର ସଂଖ୍ୟା ବହୁତ ଧୀରେ ଧୀରେ ବଢ଼ିଥାଏ । ତେଣୁ ଗୋଟିଏ ପୂରା ବସା ଚୋରି ହୋଇଯିବା ଫଳରେ ବର୍ଷ ବର୍ଷ ଧରି ହୋଇଥିବା ସଂରକ୍ଷଣ ଓ ଗବେଷଣା ପ୍ରୟାସ ଉପରେ ପାଣି ପଡ଼ିଛି ।

ପୋଲିସ କରୁଛି ତଦନ୍ତ, ବଢ଼ିଲା ଅଭୟାରଣ୍ୟର ସୁରକ୍ଷା
ଘଟଣାର ଗମ୍ଭୀରତାକୁ ଦେଖି ମାମଲାଟିକୁ ଡେଭନ୍ ଏବଂ କର୍ଣ୍ଣୱାଲ୍ ପୋଲିସକୁ ହସ୍ତାନ୍ତର କରାଯାଇଛି । ପୋଲିସ ଏହି ଅଜବ ଚୋରି ଘଟଣାର ତଦନ୍ତ କରୁଛି । ଅଧିକାରୀମାନେ କହିଛନ୍ତି ଯେ, ସଂରକ୍ଷିତ ପ୍ରାକୃତିକ ସ୍ଥାନକୁ କ୍ଷତି ପହଞ୍ଚାଇବା ଏକ ଗମ୍ଭୀର ଅପରାଧ ।

ଏଥିସହ ପୋଲିସ ସାଧାରଣ ଲୋକଙ୍କୁ ଏହି ଚୋରି ସମ୍ପର୍କରେ କୌଣସି ସୂଚନା ଥିଲେ ଜଣାଇବାକୁ ଅନୁରୋଧ କରିଛି । ଅନ୍ୟପଟେ, ବାକି ରହିଥିବା ପିମ୍ପୁଡ଼ିଙ୍କ କଲୋନୀକୁ ସୁରକ୍ଷିତ ରଖିବା ପାଇଁ ୱାଇଲ୍ଡଲାଇଫ୍ ଟ୍ରଷ୍ଟ ପକ୍ଷରୁ ଅଭୟାରଣ୍ୟର ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରାଯାଇଛି । ଏବେ ସବୁଠାରୁ ବଡ଼ ପ୍ରଶ୍ନ ହେଉଛି, ହଜାର ହଜାର ବିରଳ ପିମ୍ପୁଡ଼ିଙ୍କୁ ଚୋରି କରିଥିବା ଏହି ଚୋରମାନେ କିଏ ଏବଂ ସେମାନେ ଏହି ବସାକୁ କେଉଁଠାକୁ ନେଇଛନ୍ତି ?