ଅର୍ଗସ ବ୍ୟୁରୋ: ନିର୍ବାଚନ ତାରିଖ ଘୋଷଣା ହେବା ପରେ ଆଜି ପ୍ରଥମ ଥର ଲାଗି ଓଡ଼ିଶାକୁ ନେଇ ଦିଲ୍ଲୀରେ ବସୁଛି ବଡ଼ ମିଟିଂ । ରାଜ୍ୟରେ ୧୪୭ ବିଧାନସଭା ଓ ୨୧ ଲୋକସଭା ଆସନକୁ ନେଇ ହେବ ଗୁରୁତ୍ଵପୂର୍ଣ୍ଣ ଆଲୋଚନା । କେଉଁ ସ୍ଥାନରୁ କିଏ ପ୍ରାର୍ଥୀ ହେବ ସେନେଇ ହେବ ଆଲୋଚନା । ସେଇଥି ଲାଗି ତ ହାତରେ ପ୍ରାର୍ଥୀଙ୍କ ତାଲିକା ନେଇ ଦିଲ୍ଲୀ ଗସ୍ତ କରିଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ । 

ଚର୍ଚ୍ଚାରେ ମନମୋହନ ସାମଲଙ୍କ ଦିଲ୍ଲୀ ଗସ୍ତ । କାରଣ ଆଜି ଦିଲ୍ଲୀରେ ବସୁଛି ବିଜେପିର କୋର କମିଟି ବୈଠକ । ଆଉ ବୈଠକରେ ଗୃହମନ୍ତ୍ରୀ ଅମିତ ଶାହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଓ ବିଏଲ୍ ସନ୍ତୋଷ ପ୍ରମୁଖ ସାମିଲ ହେବେ । ଏହି ବୈଠକରେ ଓଡ଼ିଶା, ଉତ୍ତର-ପ୍ରଦେଶ, ପଶ୍ଚିମବଙ୍ଗର ଲୋକସଭା ଆସନ ନେଇ ଆଲୋଚନା ହେବ । ଖାଲି ଏତିକି ନୁହେଁ ବରଂ ଏହା ସହ ଆଉ କିଛି ରାଜ୍ୟର ଆସନ ଉପରେ ମଧ୍ୟ ଆଲୋଚନା ହେବାର ସମ୍ଭାବନା ରହିଛି । ଖାସ କରି ଆଡିର ବୈଠକରେ ଓଡ଼ିଶାକୁ ନେଇ ବଡ଼ ଆଲୋଚନା ହୋଇପାରେ । ପୂର୍ବରୁ ଦୁଇଟି ପର୍ଯ୍ୟାୟରେ ବିଭିନ୍ନ ରାଜ୍ୟ ପାଇଁ ବିଜେପି ଲୋକସଭା ପ୍ରାର୍ଥୀ ଘୋଷଣା କରିସାରିଛି । କିନ୍ତୁ ଏଥିରେ ଓଡ଼ିଶା ପାଇଁ ପ୍ରାର୍ଥୀ ଘୋଷଣା ହୋଇନଥିଲା । ତେଣୁ ଆଜିର ବୈଠକ ଉପରେ ସମସ୍ତଙ୍କ ନଜର ରହିଛି । 

ଶନିବାର ରାଜ୍ୟ ବିଜେପି କାର୍ଯ୍ୟାଳୟରେ ନିର୍ବାଚନ କମିଟି ବୈଠକ ବସିଥିଲା । ଏଥିରେ ୧୪୭ ବିଧାନସଭା ଓ ୨୧ ଲୋକସଭା ଆସନ ପାଇଁ ପ୍ରାର୍ଥୀଙ୍କ ତାଲିକା ପ୍ରସ୍ତୁତ ହୋଇଥିବା କୁହାଯାଇଛି । ଗତକାଲି ମଧ୍ୟ ବିଜେପି କାର୍ଯ୍ୟାଳୟରେ ବରିଷ୍ଠ ନେତାମାନେ ଆଲୋଚନା କରିଥିଲେ । ଆଉ ବିଜେପି ରାଜ୍ୟ ନିର୍ବାଚନ ପ୍ରଭାରୀ କହିଥିଲେ ବିଜେପି ନିର୍ବାଚନ ଲାଗି ପୂରା ପ୍ରସ୍ତୁତ ଅଛି । ଖାଲି ତୋମାର ନୁହେଁ ବରଂ କୋର କମିଟିର ସଦସ୍ୟ ପ୍ରତାପ ଷଡଙ୍ଗୀ କହିଥିଲେ, ଚୂଡାନ୍ତ ତାଲିକା ଉପରେ କେନ୍ଦ୍ରୀୟ ସଂସଦୀୟ କମିଟିର ମୋହର ବାଜିବା ପରେ ପ୍ରାର୍ଥୀ ଘୋଷଣା ହେବ । ତେଣୁ ତୃତୀୟ ତାଲିକାରେ ଓଡ଼ିଶାର ନାଁ ଆସିପାରେ ବୋଲି କୁହାଯାଉଛି । ହେଲେ ଆଜିର ବୈଠକକୁ ନେଇ ଚର୍ଚ୍ଚା ଜୋର ଧରିଛି ।