ରାଜଧାନୀ ଦିଲ୍ଲୀରେ ଦୀର୍ଘ 27ବର୍ଷ ପରେ ଆରମ୍ଭ ହେବାକୁ ବିଜେପି ଶାସନ । 48ଟି ସିଟ ହାସଲ କରି ଐତିହାସିକ ବିଜୟ ହାସଲ କରିଛି ବିଜେପି । ଆପକୁ ମାତ୍ର 22ଟି ଆସନରେ ସନ୍ତୁଷ୍ଟ ହେବାକୁ ପଡିଛି । ସିଧା ସିଧା କହିବାକୁ ଗଲେ ମୋଦିଙ୍କ ଝାଡ଼ୁରେ ଆପ ସଫା । ଚଳିତ ନିର୍ବାଚନରେ ଆପ ପାଇଁ ମହଙ୍ଗା ସାବ୍ୟସ୍ତ ହୋଇଛି ଭ୍ରଷ୍ଟାଚାର, କେଜ୍ରିଓ୍ବାଲଙ୍କ ରାଜମହଲ, ମଦ ଦୁର୍ନୀତି ଓ ଯମୁନା ପ୍ରଦୂଷଣ । ଲଗାତାର ଆପ କୁ 3ଥର ବିଜୟୀ କରିବା ପରେ ଦିଲ୍ଲୀ ବାସୀ ଏଥର ପରିବର୍ତ୍ତନ ଆଣିଛନ୍ତି । ଭ୍ରଷ୍ଟାଚାର ଓ ଦୁର୍ନୀତି ପ୍ରସଙ୍ଗରେ ଦିଲ୍ଲୀବାସୀଙ୍କୁ ସନ୍ତୁଷ୍ଟ କରିପାରିନି ଆପ । ଯାହାର ପରିଣାମ ଭୋଗିବାକୁ ପଡିଛି ଏଥର ନିର୍ବାଚନରେ । ସ୍ଥିତି ଏପରି ହୋଇଥିଲା ଯେ ଖୋଦ ଅରବିନ୍ଦ କେଜ୍ରିଓ୍ବାଲ ଓ ପୁର୍ବତନ ଉପମୁଖ୍ୟମନ୍ତ୍ରୀ ମନିଷ ସିସୋଡିଆଙ୍କୁ ମଧ୍ୟ ପରାଜୟର ସାମନା କରିବାକୁ ପଡିଲା ।

ଆପର ପରାଜୟ ପଛର ମୁଖ୍ୟ କାରଣ ହେଲା ଦିଲ୍ଲୀ ବାସୀଙ୍କ ପାଖରେ ମୌଳିକ ସୁବିଧା ନପହଞ୍ଚିବା । ଯାହାକୁ ପ୍ରସଙ୍ଗ କରିଥିଲା ବିଜେପି । ଆପ ସରକାରରେ ଥିବା ବେଳେ ଦିଲ୍ଲୀବାସୀଙ୍କ ପାଖରେ ଭଲ ପାଣି ପହଂଚିନଥିଲା । ଲୋକଙ୍କୁ ଘର ମିଳିନଥିଲା । ଜଲ ଜୀବନ ମିଶନରେ ବାଧକ ସାଜିଥିଲେ ତତ୍କାଳୀନ ଆପ ସରକାର । ଦୁର୍ନୀତିରେ ଉବୁଟୁବୁ ତତ୍କାଳୀନ ଆପ ସରକାର ଲୋକଙ୍କ କଥା ବୁଝିବାରେ ଅକ୍ଷମ ହୋଇଥିଲା । ଯାହାର ଫଳ ସ୍ବରୁପ ଏହି ପରାଜୟ ।

ବସ୍ତି, ମହିଳା ଓ ମଧ୍ୟବିତ୍ତଙ୍କ ପାଇଁ ବିଜେପିର ଏଜେଣ୍ଡା ସ୍ପଷ୍ଟ ଥିଲା । ମୋଦି ଗ୍ୟାରେଣ୍ଟିକୁ ଦିଲ୍ଲୀ ବାସୀ ଭରସା କରିଥିଲେ । ଲଗାତାର 3ଥର ଆପକୁ ଶାସନ ଗାଦିରେ ବସାଇଥିବା ଦିଲ୍ଲୀବାସୀ ଡବଲ ଇଞ୍ଜିନ ସରକାରର ନିର୍ବାଚନୀ ପ୍ରତିଶ୍ରୁତିକୁ ଗ୍ରହଣ କରିଥିଲେ । ବସ୍ତି, ମହିଳା ଓ ମଧ୍ୟବିତ୍ତ ହୋଇଥିଲେ ଏହି ନିର୍ବାଚନର ଗେମଚେଞ୍ଜର । 1998 ପରେ ଏବେ ପୁଣିଥରେ ଦିଲ୍ଲୀରେ ଚାଲିବ ବିଜେପି ରାଜ ।