ବିଳାସପୂର୍ଣ୍ଣ ଜୀବନ ଛାଡି ବାବା ହୋଇଗଲେ ବିଜନେସମ୍ୟାନ, ସ୍ଵପ୍ନ ବଦଳାଇ ଦେଲା ଜୀବନ

ଜାପାନର ଜଣେ ବ୍ୟକ୍ତି ଶିବଭକ୍ତି ପାଇଁ ନିଜର ବିଳାସପୂର୍ଣ୍ଣ ଜୀବନ ତ୍ୟାଗ କରିଛନ୍ତି । ଦିନେ ସେ ଜଣେ ବିଜନେସମ୍ୟାନ ଥିଲେ, କୋଟି କୋଟି ଟଙ୍କାର ବିଜନେସ ଥିଲା , ହେଲେ ଆଧ୍ୟାତ୍ମିକତା ତାଙ୍କ ଜୀବନର ମୋଡ ବଦଳେଇ ଦେଇଛି । ହୋସି ତାକାୟୁକି ଭାବେ ଜଣାଶୁଣା ବିଜନେସମ୍ୟାନ ଏବେ ବାଳ କୁମ୍ଭ ଗୁରୁମୁନି ନାଁରେ ପରିଚିତ । ଜୁଲାଇରେ ସେ କନୱାର ଯାତ୍ରାରେ ଯୋଗ ଦେଇଥିଲେ , ଯେଉଁଠି ଭକ୍ତମାନେ ଦେବାଧି ଦେବ ମହାଦେବଙ୍କ ଉପରେ ଗଙ୍ଗାଜଳ ଲାଗି କରିଥାନ୍ତି । ବର୍ତ୍ତମାନ ସେ ସାଫ୍ରନ ପୋଷାକ ପିନ୍ଧିବା ସହ ଖାଲିପାଦରେ କନୱାର ଯାତ୍ରା କରୁଛନ୍ତି, ତାଙ୍କସହ ୨୦ ଜଣ ଜାପାନର ଅନୁଗାମୀ ରହିଛନ୍ତି । ଏଥିସହ ସେ ଉତ୍ତରାଖଣ୍ଡ ଡେରାଡୁନରେ କନୱାର ବାସୀଙ୍କୁ ୨ ଦିନ ମାଗଣା ଖାଦ୍ୟ ବଣ୍ଟନ କରିଥିଲେ ।

୪୧ ବର୍ଷୀୟ ହୋସି ତାକାୟୁକି ଜାପାନର ୧୫ଟି ବିୟୁଟି ପ୍ରଡକ୍ଟର ବିଜନେସ କରୁଥିଲେ । ଖୁବ ବିଳାସପୂର୍ଣ୍ଣ ଭାବେ ତାଙ୍କର ଜୀବନ ଅତିବାହିତ ହେଉଥିଲା । ହେଲେ ଭାରତରେ ଘଟିଥିବା ଗୋଟେ ଘଟଣା ତାଙ୍କ ଜୀବନର ମୋଡ ବଦଳାଇ ଦେଇଥିଲା । ୨୦ ବର୍ଷ ତଳେ ଯେତେବେଳେ ସେ ତାମିଲନାଡୁ ଭ୍ରମଣରେ ଆସିଥିଲେ, ସେଠାରେ ଜଣେ ଜ୍ୟୋତିଷ୍ୟ ତାଙ୍କୁ କହିଥିଲେ ଯେ, ସେ ପୂର୍ବ ଜନ୍ମରେ ହିମାଳୟରେ ରହୁଥିଲେ । ଏଥିସହ ହିନ୍ଦୁ ଆଧ୍ୟାତ୍ମିକତାକୁ ଅନୁସରଣ କରୁଥିଲେ । ଏହାପରେ ସେ ଟୋକିଓ ଫେରି ଯାଇଥିଲେ । ସେଠାରେ ସେ ଏକ ସ୍ବପ୍ନ ଦେଖିଥିଲେ । ସ୍ଵପ୍ନରେ ସେ ହିମାଚଳରେ ନିଜ ପୂର୍ବଜନ୍ମର କଥା ଦେଖିଥିଲେ । ଏହାପରେ ତାଙ୍କ ଜୀବନ ପରିବର୍ତ୍ତନ ହୋଇଥିଲା । ସେ ନିଜ ଘରକୁ ଶିବଙ୍କ ମନ୍ଦିର ଭଳି ତିଆରି କରିଥିଲେ । ବର୍ତ୍ତମାନ ସେ ଟୋକିଓରେ ରହୁଛନ୍ତି, କିନ୍ତୁ ଅଧିକାଂଶ ସମୟ ଉତ୍ତରାଖଣ୍ଡ ଦେବଭୂମିରେ ବିତାଇଥାନ୍ତି ।