Employee Bonus / ଗରିବୀରୁ ଶିଖିଲେ ମାନବିକତା, ୨୦ କର୍ମଚାରୀଙ୍କୁ ଲକ୍ଷାଧିକ ଟଙ୍କାର ବୋନସ୍ ଦେଇ ଚର୍ଚ୍ଚାରେ ବ୍ୟବସାୟୀ

ଦୀପାବଳି ଅବସରରେ ସାଧାରଣତଃ କମ୍ପାନୀଗୁଡ଼ିକ ନିଜ କର୍ମଚାରୀଙ୍କୁ ମିଠା, ନୂଆ ପୋଷାକ କିମ୍ବା କିଛି ଟଙ୍କା ବୋନସ୍ ଭାବେ ଦେଇଥାନ୍ତି । କିନ୍ତୁ ଗୁଜରାଟର ସୁରତର ଜଣେ କପଡ଼ା ବ୍ୟବସାୟୀ ନିଜ କର୍ମଚାରୀଙ୍କୁ ଏମିତି ଏକ ଉପହାର ଦେଇଛନ୍ତି, ଯାହା ଦେଖି ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି । ସେ ନିଜର ୨୦ ଜଣ କର୍ମଚାରୀଙ୍କୁ ଦୀପାବଳି ବୋନସ୍ ଭାବେ ଜଣ ପିଛା ଏକ ଲକ୍ଷ ଟଙ୍କାରୁ ଅଧିକ ନଗଦ ଅର୍ଥ ପ୍ରଦାନ କରିଛନ୍ତି । ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେଉଛି।

ସୁରତରେ ଟେକ୍ସଟାଇଲ୍ ବ୍ୟବସାୟ କରୁଥିବା ରାମସ୍ୱରୂପ ମୁଣ୍ଡେ ଦୀପାବଳି ଅବସରରେ ନିଜ କର୍ମଚାରୀଙ୍କ ପାଇଁ ଏହି ବିଶେଷ ବ୍ୟବସ୍ଥା କରିଥିଲେ । ୧୦, ୨୦, ୫୦, ୧୦୦, ୨୦୦ ଓ ୫୦୦ ଟଙ୍କିଆ ନୋଟ୍‌ର ବିଡ଼ାକୁ ଏକ ରୂପା ଭଳି ଦେଖାଯାଉଥିବା ଥାଳିରେ ସୁନ୍ଦର ଭାବେ ସଜାଇ ରଖାଯାଇଥିଲା । ପରେ ପ୍ରତ୍ୟେକ କର୍ମଚାରୀଙ୍କୁ ଏକ ଲକ୍ଷ ଟଙ୍କାରୁ ଅଧିକ ଟଙ୍କା ବୋନସ୍ ଭାବେ ଦିଆଯାଇଥିଲା ।

ଏତେ ପରିମାଣର ଟଙ୍କା ଦେଖି କର୍ମଚାରୀମାନେ ଆଶ୍ଚର୍ଯ୍ୟଚକିତ ହୋଇପଡ଼ିଥିଲେ । କେହି ଖୁସିରେ ହସି ଉଠିଥିବା ବେଳେ ଜଣେ ମହିଳା କର୍ମଚାରୀ ଟଙ୍କା ଗ୍ରହଣ କରିବା ସମୟରେ ଭାବବିହ୍ୱଳ ହୋଇ କାନ୍ଦି ପକାଇଥିଲେ । ଏହି ସମୟରେ ବ୍ୟବସାୟୀଙ୍କ ପରିବାର ସଦସ୍ୟ ମଧ୍ୟ ଉପସ୍ଥିତ ଥିଲେ ।

ନିଜ ପିଲାଦିନର ଦାରିଦ୍ର୍ୟ ଶିଖାଇଛି ଅନ୍ୟଙ୍କ ଦୁଃଖ ବୁଝିବା
ଆଲୋଚନା ବେଳେ ରାମସ୍ୱରୂପ ମୁଣ୍ଡେ କହିଥିଲେ ଯେ, ଏଭଳି ବୋନସ୍ ଦେବା ପଛରେ ତାଙ୍କ ନିଜ ଜୀବନର ଅନୁଭୂତି ରହିଛି । ତାଙ୍କ ପିଲାଦିନ ଅତ୍ୟନ୍ତ ଗରିବୀରେ କଟିଥିଲା । ତେଣୁ ପର୍ବପର୍ବାଣୀ ସମୟରେ ପରିବାରର ଆବଶ୍ୟକତା ପୂରଣ କରିବା କେତେ କଷ୍ଟକର, ତାହା ସେ ଭଲଭାବେ ବୁଝିପାରନ୍ତି ।

ତାଙ୍କ କହିବା ଅନୁଯାୟୀ, କର୍ମଚାରୀମାନେ କେବଳ ଦୋକାନରେ କାମ କରୁଥିବା ଲୋକ ନୁହନ୍ତି, ସେମାନେ ତାଙ୍କ ପରିବାରର ଏକ ଅଂଶ । ବ୍ୟବସାୟକୁ ଆଗକୁ ବଢ଼ାଇବାରେ ସେମାନଙ୍କର ବର୍ଷସାରା ପରିଶ୍ରମ ଓ ନିଷ୍ଠାର ବଡ଼ ଅବଦାନ ରହିଛି । ସେଥିପାଇଁ ଦୀପାବଳିରେ ପ୍ରତ୍ୟେକ କର୍ମଚାରୀଙ୍କ ହାତରେ ଏତେ ଟଙ୍କା ରହୁ, ଯାହାଦ୍ୱାରା ସେମାନେ ନିଜ ପରିବାର ପାଇଁ ଖୁସିରେ ପର୍ବର କିଣାକିଣି କରିପାରିବେ, ଏହା ହିଁ ତାଙ୍କର ଉଦ୍ଦେଶ୍ୟ ଥିଲା ।

କର୍ମଚାରୀଙ୍କ ଖୁସି ହିଁ ମୁଖ୍ୟ, ଭାଇରାଲ୍ ହେଉଛି ଭିଡିଓ
ବ୍ୟବସାୟୀ କହିଛନ୍ତି ଯେ, ପ୍ରତ୍ୟେକ କର୍ମଚାରୀଙ୍କୁ ଏକ ଲକ୍ଷ ଟଙ୍କାରୁ ଅଧିକ ବୋନସ୍ ଦେବା ତାଙ୍କ ପାଇଁ କେବଳ ଏକ ଖର୍ଚ୍ଚ ନୁହେଁ, ବରଂ କର୍ମଚାରୀଙ୍କ ଖୁସି ଓ ପରିଶ୍ରମକୁ ସମ୍ମାନ ଜଣାଇବାର ଏକ ମାଧ୍ୟମ । ଏହି ନିଆରା ଉପହାରର ଭିଡିଓ ଏବେ ସୋସିଆଲ ମିଡିଆରେ ବେଶ୍ ଚର୍ଚ୍ଚା ସାଉଁଟୁଛି । ଲୋକମାନେ ବ୍ୟବସାୟୀଙ୍କ ଏହି ମହାନ ପଦକ୍ଷେପକୁ ପ୍ରଶଂସା କରୁଛନ୍ତି । କର୍ମଚାରୀଙ୍କୁ ପରିବାରର ସଦସ୍ୟ ଭାବେ ଗ୍ରହଣ କରି ଏତେ ବଡ଼ ଉପହାର ଦେବା ଏବେ ସମସ୍ତଙ୍କ ପାଇଁ ଏକ ଉଦାହରଣ ପାଲଟିଛି ।