Govt Employees Laptop / କେନ୍ଦ୍ର ସରକାରୀ କର୍ମଚାରୀଙ୍କ ପାଇଁ ବଡ଼ ଖୁସି ଖବର... ୧.୮ ଲକ୍ଷ ଟଙ୍କାର ମିଳିବ ଲାପଟପ୍

କେନ୍ଦ୍ର ସରକାରୀ କର୍ମଚାରୀଙ୍କ ପାଇଁ ଆସିଛି ଏକ ବଡ଼ ଖୁସି ଖବର । ଅଫିସ୍ କାମ ପାଇଁ ଲାପଟପ୍ ଓ ଟାବଲେଟ୍ କିଣିବା ନେଇ କେନ୍ଦ୍ର ସରକାର ନୂଆ ନୀତିକୁ ଅନୁମୋଦନ କରିଛନ୍ତି । ଅର୍ଥ ମନ୍ତ୍ରଣାଳୟର ବ୍ୟୟ ବିଭାଗ (Department of Expenditure) ପକ୍ଷରୁ ଏହି ନୂଆ ଡିଭାଇସ୍ କ୍ରୟ ନୀତିକୁ ମଞ୍ଜୁରୀ ମିଳିଛି । ଏହା ଅନୁଯାୟୀ, ଯୋଗ୍ୟ ଅଧିକାରୀମାନେ ୧.୮ ଲକ୍ଷ ଟଙ୍କା ପର୍ଯ୍ୟନ୍ତ ମୂଲ୍ୟର ହାଇ-ଏଣ୍ଡ ଲାପଟପ୍ କିମ୍ବା ଟାବଲେଟ୍ ବ୍ୟବହାର ପାଇଁ ପାଇପାରିବେ । ସବୁଠାରୁ ବଡ଼ କଥା ହେଉଛି, ୪ ବର୍ଷ ବ୍ୟବହାର ପରେ ଏହାକୁ ମାଗଣାରେ ନିଜ ପାଖରେ ରଖିପାରିବେ ।

୧.୮ ଲକ୍ଷ ଟଙ୍କା ପର୍ଯ୍ୟନ୍ତ ମୂଲ୍ୟର ଲାପଟପ୍
ନୂଆ ନୀତିରେ ସରକାର ଲାପଟପ୍ ଓ ଅନ୍ୟାନ୍ୟ ଡିଭାଇସ୍ କିଣିବା ପାଇଁ ବଜେଟ୍ ସୀମା ବୃଦ୍ଧି କରିଛନ୍ତି । ଯେଉଁ ଡିଭାଇସ୍‌ରେ ୪୦ ପ୍ରତିଶତରୁ ଅଧିକ ମେକ୍-ଇନ୍-ଇଣ୍ଡିଆ ଉପାଦାନ ରହିଥିବ, ସେଗୁଡ଼ିକ ପାଇଁ ସରକାର ଟିକସ ସହିତ ସର୍ବାଧିକ ୧.୮ ଲକ୍ଷ ଟଙ୍କା ଖର୍ଚ୍ଚ କରିପାରିବେ । ଅନ୍ୟ ସାଧାରଣ ଡିଭାଇସ୍ ପାଇଁ ସର୍ବାଧିକ ବଜେଟ୍ ସୀମା ୧.୫ ଲକ୍ଷ ଟଙ୍କା ରଖାଯାଇଛି । ଏହି ବଜେଟ୍‌ରେ ଆପଲ୍‌ର ମ୍ୟାକ୍‌ବୁକ୍ ଏୟାର ଓ ମ୍ୟାକ୍‌ବୁକ୍ ପ୍ରୋ ଭଳି ଉଚ୍ଚମାନର ଲାପଟପ୍ ମଧ୍ୟ ସାମିଲ ହୋଇପାରିବ । ଏହା ପୂର୍ବରୁ ଜୁଲାଇ ୨୦୨୩ରେ ଏହି ସୀମା ଯଥାକ୍ରମେ ୧ ଲକ୍ଷ ଓ ୧.୩ ଲକ୍ଷ ଟଙ୍କା ଥିଲା । ନୂଆ ନୀତିରେ ଲାପଟପ୍, ଟାବଲେଟ୍, ନୋଟ୍‌ବୁକ୍ ଓ ଅଲ୍ଟ୍ରାବୁକ୍‌କୁ ସାମିଲ କରାଯାଇଛି । କିନ୍ତୁ ମୋବାଇଲ୍ ଫୋନ୍‌କୁ ଏହି ତାଲିକାରୁ ବାଦ୍ ଦିଆଯାଇଛି ।

୪ ବର୍ଷ ପରେ ଲାପଟପ୍ ହୋଇଯିବ ନିଜର
ଏହି ନୂଆ ନିୟମର ସବୁଠାରୁ ଆକର୍ଷଣୀୟ ବ୍ୟବସ୍ଥା ହେଉଛି ଡିଭାଇସ୍‌ର ମାଲିକାନା ସମ୍ପର୍କିତ ନିୟମ । ଜଣେ କର୍ମଚାରୀ ୪ ବର୍ଷ ପର୍ଯ୍ୟନ୍ତ ସରକାରୀ କାର୍ଯ୍ୟରେ ଲାପଟପ୍ କିମ୍ବା ଟାବଲେଟ୍ ବ୍ୟବହାର କରିବା ପରେ ତାହାକୁ ବିନା କୌଣସି ଅତିରିକ୍ତ ଟଙ୍କାରେ ନିଜ ପାଖରେ ରଖିପାରିବେ । ତେବେ ଡିଭାଇସ୍‌ଟି କର୍ମଚାରୀଙ୍କୁ ହସ୍ତାନ୍ତର କରିବା ପୂର୍ବରୁ ବିଭାଗ ପକ୍ଷରୁ ସମସ୍ତ ସରକାରୀ ଫାଇଲ୍, ତଥ୍ୟ ଓ ଗୋପନୀୟ ସୂଚନାକୁ ସମ୍ପୂର୍ଣ୍ଣ ଭାବେ ଡିଲିଟ୍ କରାଯିବ ।

୪ ବର୍ଷ ପୂର୍ବରୁ ଚାକିରି ଛାଡ଼ିଲେ କ'ଣ ହେବ ?
ଯଦି କୌଣସି ଅଧିକାରୀ ୪ ବର୍ଷ ପୂର୍ବରୁ ଅବସର ନିଅନ୍ତି କିମ୍ବା ଚାକିରି ଛାଡ଼ନ୍ତି, ତେବେ ତାଙ୍କୁ ଲାପଟପ୍ ଫେରାଇବାକୁ ପଡ଼ିବ ନାହିଁ । କିନ୍ତୁ ଡିଭାଇସ୍‌ଟିକୁ ନିଜ ପାଖରେ ରଖିବା ପାଇଁ ପ୍ରତିବର୍ଷ ୨୫ ପ୍ରତିଶତ ହିସାବରେ ମୂଲ୍ୟହ୍ରାସ (Depreciation) କରି ବାକି ରହିଥିବା ମୂଲ୍ୟ ଦେବାକୁ ପଡ଼ିବ ।

କେଉଁ କର୍ମଚାରୀମାନେ ପାଇବେ ଏହି ସୁବିଧା ?
ଏହି ଯୋଜନା ସମସ୍ତ ସରକାରୀ କର୍ମଚାରୀଙ୍କ ପାଇଁ ଏକାସାଙ୍ଗରେ ଲାଗୁ ହେବ ନାହିଁ । ପଦବୀ ଓ ପେ-ଲେଭଲ୍ ଅନୁସାରେ ଡିଭାଇସ୍ ପ୍ରଦାନ କରାଯିବ ।
- ପେ-ଲେଭଲ୍ ୧୨ ଓ ତା'ଠାରୁ ଉପରେ: ଏହି ସ୍ତରର ସମସ୍ତ ଅନୁମୋଦିତ ପଦବୀରେ ଥିବା ଅଧିକାରୀମାନେ ଏହି ସୁବିଧା ପାଇବେ ।
- ପେ-ଲେଭଲ୍ ୮ରୁ ୧୧: ଏହି ସ୍ତରର ମୋଟ ଅନୁମୋଦିତ ପଦବୀର ୫୦ ପ୍ରତିଶତ କର୍ମଚାରୀଙ୍କୁ ଡିଭାଇସ୍ ଦିଆଯିବ । କାର୍ଯ୍ୟର ଆବଶ୍ୟକତା ଅଧିକ ଥିଲେ ବିଭାଗର ଉଚ୍ଚ ଅଧିକାରୀ ଏହି ସୀମାକୁ ୭୫ ପ୍ରତିଶତ ପର୍ଯ୍ୟନ୍ତ ବଢ଼ାଇପାରିବେ ।

ନୂଆ ନିୟମରେ ରହିଛି ଆଉ କିଛି ସର୍ତ୍ତ
- ଗୋଟିଏ ଲାପଟପ୍ କିମ୍ବା ଟାବଲେଟ୍ ପାଇବାର ୪ ବର୍ଷ ମଧ୍ୟରେ ଦ୍ୱିତୀୟ ନୂଆ ଡିଭାଇସ୍ ମିଳିବ ନାହିଁ ।
- ପୁରୁଣା ଡିଭାଇସ୍ ସମ୍ପୂର୍ଣ୍ଣ ଅଚଳ ହୋଇଯାଇଥିଲେ ଏବଂ ମରାମତି କରିବା ସମ୍ଭବ ନଥିଲେ ନୂଆ ଡିଭାଇସ୍ ଦିଆଯାଇପାରିବ ।
- ଏହି ନୀତି କେବଳ କେନ୍ଦ୍ର ସରକାରଙ୍କ ମନ୍ତ୍ରଣାଳୟ, ବିଭାଗ ଓ ସେମାନଙ୍କ ଅଧୀନସ୍ଥ କାର୍ଯ୍ୟାଳୟ ପାଇଁ ଲାଗୁ ହେବ ।
- ରାଜ୍ୟ ସରକାରୀ କର୍ମଚାରୀ, ସରକାରୀ ଉଦ୍ୟୋଗ (PSU) ଓ ଘରୋଇ ପରାମର୍ଶଦାତାମାନେ ଏହି ନୀତିର ପରିସରଭୁକ୍ତ ନୁହନ୍ତି ।

ମୋଟାମୋଟି କହିବାକୁ ଗଲେ, କେନ୍ଦ୍ର ସରକାରଙ୍କ ଏହି ନୂଆ ଡିଭାଇସ୍ ନୀତି ଯୋଗ୍ୟ ଅଧିକାରୀଙ୍କୁ ଉନ୍ନତ ଡିଜିଟାଲ୍ ସୁବିଧା ଯୋଗାଇବା ସହ ୪ ବର୍ଷ ପରେ ଡିଭାଇସ୍‌ର ମାଲିକାନା ନିଜ ପାଖରେ ରଖିବାର ସୁଯୋଗ ଦେବ ।